చే యెత్తి జైకొట్టిన తెలుగోడు.. వేనోళ్ళ కీర్తించిన మొనగాడు..

Share Icons:

చే యెత్తి జైకొట్టిన తెలుగోడు.. వేనోళ్ళ కీర్తించిన మొనగాడు..

వేములపల్లి శ్రీ కృష్ణ  

“చేయెత్తి జైకొట్టు తెలుగోడా! గతమెంతో ఘనకీర్తి గలవోడా” గీతం తెలుగు సాహిత్య కీర్తికిరీటంలో కలికి తురాయి.  ఆ గీతంతో తెలుగుజాతి చైతన్యాన్ని మేల్కొల్పిన ప్రజాకవి అని ఈ తరంలో చాలా మందికి తెలీక పోవచ్చు.   ఆయన రాసిన ఒక గేయం దశాబ్దాలపాటు తెలుగునేల నాలుగు దిక్కులా పిక్కటిల్లింది. అన్ని భావాలు, అన్ని వాదాలు కలగలిపి సువిశాలాంధ్ర గళం వినిపించారు. తెలుగు పటిమను, ధైర్య సాహసాలను, పాండిత్య ప్రతిభను, తెలుగు సంస్కృతీ వెలుగుజిలుగులను వేనోళ్ళ కొనియాడారు. “చేయెత్తి జైకొట్టు తెలుగోడా..!!” అన్న ఆయన పిలుపునకు యువత పౌరుషంతో పరుగులెత్తింది ఆ రోజుల్లో. తెలుగుతనాన్ని తట్టిలేపి దేశ రాజకీయాల్లో చైతన్యం కలిగించిన ఆంధ్రప్రదెశ్ పూర్వ ముఖ్య మంత్రి ఎన్ టి రామారావు నోట నర్తించిన ఆ గేయం మూలాల్లోకి వెళితే…

తెలుగుజాతి చైతన్యాన్ని మేల్కొల్పిన ప్రజాకవి, ఆయన ఒక నిబద్ధత కలిగిన పాత్రికేయుడు, నిరాడంబరంగా  నిజాయితీ ఊపిరికలిగిన కమ్యూనిస్టుగా జీవితం సాగించి, మూడుసార్లు శాసనసభ ప్రజాప్రతినిధిగా సేవలందించిన మహనీయుడు వేములపల్లి శ్రీకృష్ణ. విస్తృత జీవితానుభవాలతో, రాజకీయ ఉద్యమానుభావాలతో రాటుదేలిన శ్రీకృష్ణ ఎలా ఉండేవారో పాత కమ్యూనిస్టు తరానికి; తలపండిన పాత్రికేయ మిత్రులకు మాత్రమే స్ఫురణకు వస్తారు. కొద్దిమందికి ఆయన ఒక పాత్రికేయునిగా గుర్తు. విశాలంధ్ర ఎడిటర్ గా రాష్ట్రంలో పాతకాలం పత్రికా పాఠకులకు తెలిసుండవచ్చు. తరతరాల సాహితీవేత్తలకూ, ప్రజాప్రతినిధులకు ఆదర్శనీయులుగా నిలిచారు. ఆయన కామ్రేడ్ శ్రీకృష్ణగా అందరికి పరిచితులు.

శ్రీకృష్ణ రేపల్లెలోని బేతపూడిలో మధ్యతరగతి రైతు కుటుంబంలో 1917లో జన్మించారు. పాఠశాలలో  బసవపున్నయ్య, మోటూరు హనుమంతరావు, పరంధామయ్య, పమిడిముక్కల లక్ష్మణరావు, కంఠంనేని వెంకటరత్నం తదితర ప్రముఖులు శ్రీకృష్ణకు సీనియర్లు. వారితో పరిచయం, ఆనాటి జాతీయోద్యమం, అతివాద సాహిత్యం ఆయనపై ప్రభావం చూపి కమ్యూనిజం వైపు అడుగులు వేయించాయి. గుంటూరులో బ్రాడీపేటలో చదువుతున్న కాలంలో పులుపుల శివయ్య, ప్రభల కృష్ణమూర్తి, ప్రతాప రామసుబ్బయ్య, ఏటుకూరి బలరామమూర్తి, అమరవాది కృష్ణమూర్తి తదితరులతో ఏర్పడిన బంధాలు, సంబంధాలు కారణంగా 1935-36లో పార్టీ అగ్జిలరీ విభాగంలో  ప్రవేశించారు. 1938లో పార్టీ సభ్యత్వం పొందారు.

చీరాల ఐ.ఎల్‌.టి.డి. కార్మికుల సమ్మె పోరాటంలో పోలీసు కాల్పులు జరిగిన సమయంలో సమ్మెలోని కార్మికుల సహాయార్ధం కన్యాశుల్కం నాటకం ప్రదర్శించి వచ్చిన ఆదాయమంతా కార్మికులకందించారు. బి.ఏ.పట్టా అందుకున్న తరువాత కొంతకాలం బందరు మ్యూచువల్‌ ఇన్సూరెన్సు కంపెనీలో ఉద్యోగం చేసారు. ఆ సమయంలో గుంటూరు నుంచి కామ్రేడ్‌ శివయ్య పిలుపుతో ఉద్యోగానికి రాజీనామా చేసి పార్టీ రహస్య యంత్రాంగ నిర్వహణ బాధ్యత చేపట్టారు. 1937లో  కొత్తపట్నంలో నిర్వహించిన రాజకీయ పాఠశాలకు హాజరై, ప్రభుత్వ నిషేధాజ్ఞలను ధిక్కరించి లాఠీఛార్జ్జి లో గాయపడ్డారు..

1942 –          -43 లో హిట్లర్‌ సైన్యాలను మాస్కో వద్ద రెడ్‌ ఆర్మీ అటకాయించితిప్పికొడుతున్న రోజుల్లో ‘మాస్కో పొలిమేరల్లోనా’కోలాటం పాట, బెంగాల్‌ కరవుపై ‘బ్రహ్మపట్నం పోదామంటే’ అంటూ, కయ్యూరు వీరులపై… ఇలా ఎన్నోపాటలు  రాశారు.   1948లో కమ్యూనిస్టు పార్టీ గుంటూరు జిల్లా కార్యదర్శిగా, అనంతరం  రెండుసార్లు రాష్ట్ర పార్టీ కార్యదర్శివర్గ సభ్యులుగా, రెండుసార్లు జాతీయ సమితి సభ్యులుగా ఎన్నికై  సమర్థతతో బాధ్యతలు  నిర్వర్తించారు. విశాలాంధ్ర పాత్రికేయునిగా, పత్రిక ప్రధాన ఎడిటర్ గా, పాత్రికేయ ప్రతిభను కనబరచారు. గుంటూర్ జిల్లాపెదకాకాని  హేమలత టెక్స్‌టైల్‌ మిల్‌వర్కర్స్‌ యూనియన్  ఉపాధ్యక్షులుగా వ్యవహరించారు.

1952లో బాపట్ల నుంచి, 1962, 1972లో మంగళగిరి నుంచి శాసనసభకు ఎన్నికయ్యారు. శాసనసభలో కమ్యూనిస్టు పక్ష నాయకునిగా, పబ్లిక్‌ ఎకౌంట్స్‌ కమిటీ చైర్మన్‌గా వ్యవహరించారు. 1964-65లో విశాఖ ఉక్కు ఫ్యాక్టరీ ఉద్యమం సందర్భంగా  శాసనసభ సభ్యత్వానికి రాజీనామా చేశారు. సి.ఆర్‌.ఫౌండేషన్‌ ప్రధాన కార్యదర్శిగా బాధ్యతలు చేపట్టి దాని నిర్మాణానికి విశేష కృషి చేశారు. భారత్‌- సోవియట్‌ మిత్రమండలి, శాంతి స్నేహ సంఘాల అభివృద్ధికి శ్రమించారు. ‌ శ్రీకృష్ణ 2000లో ఏప్రిల్‌ 8న హైద్రాబాద్‌లో కన్నుమూశారు.

“మనసులోని అభిప్రాయాన్ని నిర్మొహమాటంగా చెప్పటం అలవర్చుకోండి. ప్రజల దైనందిన సమస్యలు తెల్సుకుని సాన్నిహిత్యం పెంచుకోండి. చెప్పే మాటలకూ, చేసే పనులకూ దూరం పెరిగే కొద్దీ మీకు ప్రజలు దూరమవుతారు. సిద్ధాంత పరిజ్ఞానంతోపాటు వాస్తవ పరిస్థితుల అధ్యయనం అవసరం.” అనే స్ఫూర్తిదాయక వ్యాఖ్యలు ఆయన్ను చిరస్మరణీయునిగా నిలిపాయి.

వేములపల్లి రాసిన ఈపాట ఘంటసాల గళంలో 1952లో “పల్లెటూరు”చిత్రంలో తెలుగునేల నాలుగు చెరగులా మార్మోగింది.

“చేయెత్తి జైకొట్టు తెలుగోడా… గతమెంతో ఘనకీర్తి గలవోడా…

వీర రక్తపుధార …వారబోసిన సీమ, పలనాడు నీదెరా …వెలనాడు నీదెరా

బాలచంద్రుడు చూడ ఎవడోయి…  తాండ్ర పాపయ్య గూడ నీవొడోయ్…

నాయకీ నాగమ్మ… మల్లమాంబా… మొల్ల … మగువ మాంచాల… నీ తోడబుట్టినవోళ్ళే…

వీరవనితలగన్న తల్లేరా… ధీరమాతల జన్మభూమేరా…

కల్లోల గౌతమీ… వెల్లువల కృష్ణమ్మ తుంగభద్రా తల్లి …పొంగివారిన చాలు

ధాన్యరాసులే పండు దేశానా…. కూడు గుడ్డకు కొదవలేదోయి

ముక్కోటి బలగమోయ్… ఒక్కటై మనముంటే

ఇరుగు పొరుగులోన … వూరు పేరుంటాది

తల్లి ఒక్కతే నీకు తెలుగోడా… సవతి బిడ్డల పోరు మనకేలా…

పెనుగాలి వీచింది … అణగారి పోయింది నట్టనడి సంద్రాన … నావ నిలుచుండాది

చుక్కాని బట్టారా తెలుగోడా… నావ దరిజేర్చరా … మొనగాడా…

చేయెత్తి జైకొట్టు తెలుగోడా… గతమెంతో ఘనకీర్తి గలవోడా…

గతమెంతో ఘనకీర్తి గలవోడా…. “

-నందిరాజు రాధాకృష్ణ

Leave a Reply