SRH vs RR: రాజస్థాన్‌తో సన్‌రైజర్స్ కీలక పోరు.. విలియమ్సన్ ఆడతాడా?

Share Icons:
ఐపీఎల్ ఫ్లేఆఫ్స్ రేసులో నిలవాలంటే ప్రతి మ్యాచ్‌లో గెలవాల్సిన పరిస్థితిలో ఉన్న , రాజస్థాన్ రాయల్స్ జట్లు నేడు (అక్టోబర్ 22న) దుబాయ్‌లో తలపడనున్నాయి. 10 మ్యాచ్‌ల్లో 4 విజయాలు సాధించిన రాజస్థాన్ 8 పాయింట్లతో.. ఆరో స్థానంలో ఉండగా.. 9 మ్యాచ్‌ల్లో 3 విజయాలు సాధించిన సన్‌రైజర్స్ చివరి నుంచి రెండోస్థానంలో ఉంది. ఈ మ్యాచ్‌లో సన్‌రైజర్స్ విజయం సాధిస్తే.. పాయింట్ల పట్టికలో ఐదో స్థానానికి చేరుకుంటుంది.

గత మూడు మ్యాచ్‌ల్లో ఓడిన సన్‌రైజర్స్.. ఈ మ్యాచ్‌లో ఎలాగైనా గెలవాలనే కసితో బరిలో దిగుతోంది. కోల్‌కతాతో జరిగిన మ్యాచ్‌లో సూపర్ ఓవర్లో ఓడిన ఆరెంజ్ ఆర్మీ ఈ మ్యాచ్‌లో తప్పిదాలు పునరావృతం చేయొద్దని భావిస్తోంది. కోల్‌కతాతో మ్యాచ్‌లో గాయపడిన కేన్ విలియమ్సన్ స్థానంలో అప్ఘానిస్థాన్ ఆల్‌రౌండర్ మహ్మద్ నబీ లేదా జేసన్ హోల్డర్ బరిలో దిగే అవకాశం ఉందని తెలుస్తోంది. థంపీకి మరో ఛాన్స్ ఇచ్చే అవకాశం ఉంది.

చివరి మూడు మ్యాచ్‌ల్లో ఒకే విజయం సాధించిన రాజస్థాన్.. సన్‌రైజర్స్‌తో జరిగిన మ్యాచ్‌లో విజయం సాధించింది. చెన్నైతో జరిగిన మ్యాచ్లో 7 వికెట్ల తేడాతో సునాయాసంగా గెలుపొందింది. బట్లర్ ఫామ్‌లో ఉండటం.. స్మిత్ రాణించడం.. తెవాతియా ఆల్‌రౌండర్ పాత్రలో ఒదిగిపోవడం.. బౌలింగ్‌లో జోఫ్రా ఆర్చర్, శ్రేయస్ గోపాల్ ఆకట్టుకుంటుండటం రాజస్థాన్‌కు కలిసొచ్చే అంశాలు.

బౌలింగ్, బ్యాటింగ్‌ విభాగాల్లో సన్‌రైజర్స్ కంటే రాజస్థాన్ రాయల్స్ ఒకింత మెరుగ్గా కనిపిస్తోంది. కానీ ఒత్తిడిలో రాణించలేకపోవడం ఇరు జట్లకు బలహీనతగా మారింది. బ్యాటింగ్‌లో వార్నర్, బెయిర్‌స్టో, పాండే రాణించడంతోపాటు.. బౌలర్లు సత్తా చాటితే ఈ మ్యాచ్‌లో రాజస్థాన్‌పై సన్‌రైజర్స్ గెలవడం కష్టమేం కాదు. కానీ జోఫ్రా ఆర్చర్‌తోపాటు స్పిన్ ద్వయం తివాతియా, శ్రేయస్ గోపాల్‌ను సన్‌రైజర్స్ బ్యాట్స్‌మెన్ ఎలా ఎదుర్కొంటారో చూడాలి.