Rohit Sharma అరుదైన ఘనత.. ఐసీసీ అవార్డ్

Share Icons:
భారత జట్టు సీనియర్ ఓపెనర్ రోహిత్ శర్మకి అరుదైన ఘనత దక్కింది. 2019లో వన్డే ఫార్మాట్‌లో టాప్ స్కోరర్‌గా నిలిచిన రోహిత్ శర్మని ఐసీసీ ‘వన్డే ప్లేయర్ ఆఫ్ ద ఇయర్‌’గా ప్రకటించింది. ఇక టెస్టు ప్లేయర్ ఆఫ్ ద ఇయర్ అవార్డుని ఆస్ట్రేలియా ఫాస్ట్ బౌలర్ పాట్ కమిన్స్ దక్కించుకోగా.. టీమిండియా కెప్టెన్ విరాట్ కోహ్లీకి ‘స్పిరిట్ ఆఫ్ క్రికెట్ అవార్డు’ దక్కింది. గత ఏడాది వన్డే ప్రపంచకప్ సమయంలో ఆస్ట్రేలియా మాజీ కెప్టెన్ స్టీవ్‌స్మిత్‌ ఫీల్డింగ్ చేస్తుండగా.. అతడ్ని గేలి చేస్తున్న అభిమానుల్ని వారించిన కోహ్లీ.. చప్పట్లు కొట్టాల్సిందిగా సైగలు చేసిన విషయం తెలిసిందే.

2019లో 28 వన్డేలాడిన 57.30 సగటుతో ఏకంగా 1,490 పరుగులు చేశాడు. ఇందులో ఏడు సెంచరీలు, ఆరు హాఫ్ సెంచరీలు ఉన్నాయి. ముఖ్యంగా.. గత ఏడాది ఇంగ్లాండ్ వేదికగా జరిగిన వన్డే ప్రపంచకప్‌లో రోహిత్ శర్మ ఏకంగా ఐదు శతకాలు బాదేశాడు. వరల్డ్‌కప్ చరిత్రలో ఇలా ఏ బ్యాట్స్‌మెన్ కూడా 5 సెంచరీలు నమోదు చేయలేదు. గత ఏడాది రోహిత్ శర్మ తర్వాత వన్డేల్లో టాప్ స్కోరర్‌గా కెప్టెన్ విరాట్ కోహ్లీ 1,377 పరుగులతో ఉన్నాడు.

టెస్టుల్లో పాట్ కమిన్స్ గత ఏడాది 23 ఇన్నింగ్స్‌ల్లో 59 వికెట్లు పడగొట్టాడు. అతని తర్వాత ఆస్ట్రేలియాకే చెందిన స్పిన్నర్ నాథన్ లయన్ 45 వికెట్లతో ఉన్నాడు. అతను కూడా 23 ఇన్నింగ్స్‌ల్లోనే ఈ వికెట్లు సాధించాడు. ప్రస్తుతం భారత్, ఆస్ట్రేలియా మధ్య మూడు వన్డేల సిరీస్ జరుగుతుండగా.. రెండో వన్డే శుక్రవారం రాజ్‌కోట్ వేదికగా జరగనుంది.