RCB vs RR: స్టన్నింగ్ క్యాచ్‌తో కోహ్లిని ఔట్ చేసిన తివాతియా.. మ్యాచ్‌లో కీలక మలుపు!

Share Icons:
రాయల్ ఛాలెంజర్స్ బెంగళూరుతో జరుగుతోన్న మ్యాచ్‌లో అద్భుతం చేశాడు. విరాట్ కోహ్లి ఆడిన భారీ షాట్‌ను బౌండరీ లైన్ దగ్గర మ్యాచ్‌ను మలుపు తిప్పే క్యాచ్ అందుకున్నాడు. కార్తీక్ త్యాగి వేసిన ఇన్నింగ్స్ 14 ఓవర్ తొలి బంతికి విరాట్ కోహ్లి డీప్ మిడ్ వికెట్ దిశగా సిక్స్ కొట్టే ప్రయత్నం చేశాడు. కానీ బౌండరీ లైన్ దగ్గరున్న తివాతియా.. పరిగెడుతూ క్యాచ్ అందుకున్నాడు. బ్యాలెన్స్ కోల్పోతానని గ్రహించి.. బంతిని గాల్లోకి విసిరి.. బౌండరీలైన్ బయట పాదం మోపాడు. వెంటనే తిరిగి బౌండరీ లైన్ లోపలికి వచ్చి క్యాచ్ అందుకున్నాడు. దీంతో 32 బంతుల్లో 43 పరుగులు చేసిన కోహ్లి నిరాశగా పెవిలియన్ చేరాడు.

అంతకు ముందు ఓవర్ బౌలింగ్ చేసిన తివాతియా.. ఆఖరి బంతికి దేవ్‌దత్ పడిక్కల్ (37 బంతుల్లో 35)ను ఔట్ చేశాడు. సాధించాల్సిన రన్ రేట్ పెరిగిపోతుండటంతో.. భారీ షాట్‌కు యత్నించిన పడిక్కల్ స్టోక్స్‌కు క్యాచ్ ఇచ్చి వెనుదిరిగాడు. వరుస బంతుల్లో రెండు కీలక వికెట్లు పడిపోవడంతో బెంగళూరు ఒత్తిడిలో పడింది. ఈ రెండు వికెట్లు పడటంలోనూ తివాతియా భాగస్వామ్యం ఉండటం విశేషం.

ఈ సీజన్లో తివాతియా చక్కగా రాణిస్తోన్న సంగతి తెలిసిందే. కింగ్స్ ఎలెవన్ పంజాబ్‌తో జరిగిన మ్యాచ్‌లో ఒకే ఓవర్లో 5 సిక్సులు బాదిన తివాతియా అసాధ్యమనుకున్న లక్ష్యాన్ని చేధించడంలో కీలక పాత్ర పోషించాడు. సన్‌రైజర్స్ హైదరాబాద్‌తో జరిగిన మ్యాచ్‌లోనూ ఆఖరి ఓవర్లలో చెలరేగి రాజస్థాన్‌ను గెలిపించాడు. బెంగళూరుతో జరిగిన మ్యాచ్‌లో తివాతియా 11 బంతుల్లో 19 రన్స్‌తో నాటౌట్‌గా నిలిచాడు.