RCB vs RR: తప్పిదాన్ని సరిచేసుకున్న రాజస్థాన్.. బౌండరీలతో చెలరేగిన ఉతప్ప

Share Icons:
ఐపీఎల్ 2020లో రాజస్థాన్ రాయల్స్ కీలక తప్పిదాన్ని సరి చేసుకుంది. రాయల్ ఛాలెంజర్స్ బెంగళూరుతో జరిగిన మ్యాచ్‌లో రాబిన్ ఉతప్పను ఓపెనర్‌గా బరిలో దింపింది. ఇప్పటి వరకూ ఆడిన మ్యాచ్‌ల్లో ఉతప్పను మిడిలార్డర్‌లో దింపిన రాజస్థాన్.. ఈ సీజన్లో తొలిసారి ఉతప్పను ఓపెనర్‌గా ఆడించింది. బెన్ స్టోక్స్‌తో కలిసి ఓపెనింగ్ చేసిన ఉతప్ప.. జట్టుకు శుభారంభం ఇచ్చాడు. వీరిద్దరూ తొలి వికెట్‌కు 50 పరుగులు జోడించారు. రాజస్థాన్ ఓపెనర్లు 50కిపైగా పరుగుల భాగస్వామ్యం నెలకొల్పడం ఈ సీజన్లో ఇదే తొలిసారి కావడం విశేషం

ఓ ఎండ్‌లో స్టోక్స్ నిదానంగా ఆడగా.. ఉతప్ప చెలరేగాడు. రాజస్థాన్ బ్యాట్స్‌మెన్‌ను ఇబ్బంది పెట్టడం కోసం కోహ్లి తొలి ఓవరే వాషింగ్టన్ సుందర్‌తో వేయించగా.. ఆ ఓవర్ ఆచితూచి ఆడిన ఉతప్ప.. సుందర్ వేసిన ఇన్నింగ్స్ మూడో ఓవర్లో చెలరేగాడు. 4,4,0,4,0,4 చొప్పున బాది 16 పరుగులు రాబట్టాడు. ఉడానా వేసిన తర్వాతి ఓవర్లో ఓ ఫోర్, ఓ సిక్సు బాదిన ఉతప్ప.. సైనీ బౌలింగ్‌లోనూ బ్యాక్ టు బ్యాక్ బౌండరీలు బాదాడు. 22 బంతుల్లోనే 41 పరుగులు చేసిన ఉతప్ప.. చాహల్ బౌలింగ్‌లో ఔటయ్యాడు. ఆ తర్వాతి బంతికే శాంసన్ ఔటయ్యాడు. దీంతో 8 ఓవర్లలో 69 పరుగులకే రాజస్థాన్ 3 వికెట్లు కోల్పోయింది.

గతంలో కోల్‌కతా నైట్ రైడర్స్‌కు శుభారంభాలు అందించిన రాబిన్ ఉతప్పను.. ఈ సీజన్లో రాజస్థాన్ ఓపెనర్‌గా ఆడించాలని అభిమానులు ఎప్పటి నుంచో డిమాండ్ చేస్తున్నారు. 9 మ్యాచ్‌ల్లో ఐదు ఓపెనింగ్ కాంబినేషన్లు ప్రయత్నించిన రాజస్థాన్.. బెంగళూరు స్పిన్ అటాక్‌ను ఎదుర్కోవడం కోసం ఈ మ్యాచ్‌లో ఉతప్పను ఓపెనర్‌గా ఆడించింది. తన ఫేవరేట్ స్థానంలో ఆడిన ఉతప్ప… మునుపటి జోరు కనబర్చాడు. కానీ హాఫ్ సెంచరీ చేస్తాడనుకున్న దశలో అవనసర షాట్ ఆడి ఔటయ్యాడు.