RCB కెప్టెన్ కోహ్లీకి .. ఏబీ డివిలియర్స్ స్పెషల్ రిక్వెస్ట్

Share Icons:
రాయల్ ఛాలెంజర్స్ బెంగళూరు కెప్టెన్ విరాట్ కోహ్లీకి ఐపీఎల్ 2020 సీజన్ ముంగిట అతని సహచరుడు నుంచి స్పెషల్ రిక్వెస్ట్ వచ్చింది. యూఏఈ వేదికగా సెప్టెంబరు 19 నుంచి నవంబరు 10 వరకూ ఐపీఎల్ 2020 సీజన్ మ్యాచ్‌లు జరగనుండగా.. సెప్టెంబరు 21న సన్‌రైజర్స్ హైదరాబాద్‌తో దుబాయ్ వేదికగా తన తొలి మ్యాచ్‌లో బెంగళూరు తలపడనుంది. గత రెండు సీజన్లతో పోలిస్తే ఈ ఏడాది బెంగళూరు టీమ్ మంచి సమతూకంతో కనిపిస్తోంది.

ఇటీవల బెంగళూరు టీమ్ ప్రాక్టీస్ సెషన్‌లో వికెట్ కీపింగ్ ప్రాక్టీస్ చేసిన ఏబీ డివిలియర్స్.. ఐపీఎల్ 2020 సీజన్‌లో బౌలింగ్ చేసే అవకాశం తనకి ఇవ్వాలని కెప్టెన్ కోహ్లీని కోరినట్లు స్వయంగా వెల్లడించాడు. బ్యాటింగ్‌లో మైదానం నలువైపులా సిక్సర్లు బాదగల ఏబీ డివిలియర్స్‌ని అభిమానులు ముద్దుగా ‘‘మిస్టర్ 360°’’గా పిలుస్తుంటారు. ఇక దక్షిణాఫ్రికా టీమ్‌కి వికెట్ కీపర్‌గానూ కొంతకాలం సేవలు అందించిన ఏబీ డివిలియర్స్.. వన్డే, టెస్టుల్లో అప్పుడప్పుడు బౌలింగ్ చేసేవాడు. కానీ.. టీ20ల్లో మాత్రం ఏబీడీ ఇప్పటి వరకూ కనీసం ఒక్క ఓవర్‌ కూడా బౌలింగ్ చేయలేదు. అయితే.. ఐపీఎల్ 2020లో మాత్రం బౌలింగ్ చేయాలని ఏబీ ఆశపడుతున్నట్లు తెలుస్తోంది.

# డివిలియర్స్ బౌలింగ్

కెప్టెన్ విరాట్ కోహ్లీతో సరదాగా తనని కూడా బౌలింగ్ విభాగంలో సభ్యుడిగా చూడాలని తరచూ చెప్తుంటానని తాజాగా ‘బోల్డ్ డైరీస్’ ఎపిసోడ్‌లో వెల్లడించిన ఏబీ డివిలియర్స్.. రెండు రోజుల క్రితం కూడా ఈ విషయమై కోహ్లీతో మాట్లాడినట్లు చెప్పుకొచ్చాడు. ‘‘విరాట్ కోహ్లీతో జోక్‌గా ప్రతిసారి నేను ఒక మాట చెప్తుంటా. నాతో బౌలింగ్ చేయించాలని నువ్వు బంతిని చేతిలోకి తీసుకుంటే.. బౌలింగ్ చేసేందుకు నేను రెడీ అని. అయితే… నేను గొప్ప బౌలర్‌ని కాదు. కానీ.. భిన్నమైన వ్యూహాలతో ఫలితాలు రాబట్టడాన్ని నేను ఇష్టపడతా’’ అని డివిలియర్స్ వెల్లడించాడు. గంటకి 120కిమీ వేగంతో డివిలియర్స్ బంతిని విసరగలడు. అయితే.. ఐపీఎల్‌లో మాత్రం ఒక్కసారి కూడా ఏబీడీ బౌలింగ్ చేయలేదు.