RCB అతణ్ని వదులుకుంది.. ఢిల్లీ తరఫున అదరగొడుతున్నాడు: లారా

Share Icons:
సన్‌రైజర్స్ హైదరాబాద్‌తో జరిగిన రెండో క్వాలిఫైయర్ మ్యాచ్‌లో మార్కస్ స్టోయినిస్‌‌ను ఓపెనర్‌గా బరిలో దింపిన ఢిల్లీ క్యాపిటల్స్ అద్భుత విజయం సాధించింది. ఐపీఎల్‌లో తొలిసారి ఓపెనర్‌గా బరిలో దిగిన ఈ ఆస్ట్రేలియన్ ఆల్‌‌రౌండర్ 38 రన్స్ చేయడంతోపాటు.. బౌలింగ్‌లో 3 వికెట్లు పడగొట్టి ప్లేయర్ ఆఫ్ ది మ్యాచ్‌గా నిలిచాడు. స్టోయినిస్ ఆల్‌రౌండ్ ప్రదర్శన వెస్టిండీస్ దిగ్గజం బ్రియాన్ లారాకు ఎంతగానో నచ్చింది.

మిడిలార్డర్‌లో కీలకమైన స్టోయినిస్‌ను ఓపెనర్‌ పంపడం ఎంతో ధైర్యంతో కూడుకున్న నిర్ణయమని లారా కొనియాడాడు. స్టోయినిస్‌ను వదులుకొని రాయల్ ఛాలెంజర్స్ బెంగళూరు తప్పు చేసిందన్నాడు. 2020 ఐపీఎల్ వేలానికి ముందు స్టోయినిస్‌, హెట్మేయర్‌ను ఆర్సీబీ రిలీజ్ చేయగా.. ఢిల్లీ క్యాపిటల్స్ కొనుగోలు చేసింది.

సన్‌రైజర్స్‌, ఢిల్లీ మ్యాచ్ అనంతరం ఈ విషయమై లారా మాట్లాడుతూ… ‘ఆర్సీబీ అతణ్ని వదులుకుంది.. ఈ ఏడాది అతడు ఢిల్లీ కోసం ఏం చేస్తున్నాడో చూడండి’ అని వ్యాఖ్యానించాడు.

ఈ సీజన్లో 352 రన్స్ చేసిన స్టోయినిస్.. 12 వికెట్లు పడగొట్టాడు. ఢిల్లీ క్యాపిటల్స్ తొలిసారి ఐపీఎల్ ఫైనల్ చేరడంలో ఈ ఆస్ట్రేలియన్ ఆల్‌రౌండర్ కీలక పాత్ర పోషించాడు.

ఢిల్లీ ఓపెనర్ పృథ్వీ షా పదే పదే విఫలం అవుతుండటంతో.. 2018 నుంచి బిగ్ బాష్ లీగ్‌లో ఓపెనర్‌గా ఆడుతున్న స్టోయినిస్‌ను ఓపెనర్‌గా ఆడించారు. అంతకు ముందు సన్‌రైజర్స్‌తో జరిగిన లీగ్ మ్యాచ్‌లో స్టోయినిస్ మూడో స్థానంలో బ్యాటింగ్‌కు దిగినప్పటికీ సరిగా ఆడలేకపోయాడు.

2018 ఐపీఎల్ వేలానికి ముందు షేన్ వాట్సన్‌ను ఆర్సీబీ రిలీజ్ చేయగా.. ఆ ఏడాది చెన్నైకి అతడు కప్ అందించాడు. 2019 సీజన్‌కు ముందు క్వింటన్ డికాక్‌ను వదులుకోగా.. ముంబై ఇండియన్స్ అతణ్ని సొంతం చేసుకుంది. 2019లో ముంబై కప్ కొట్టగా.. ఈ సఫారీ ఓపెనర్ ముంబై జట్టులో కీలక బ్యాట్స్‌మెన్‌గా మారాడు.