RCBపై మ్యాచ్‌లో క్రిస్‌గేల్ ఓపెనర్‌గా దిగకపోవడానికి కారణం వెలుగులోకి..!

Share Icons:
ఐపీఎల్ 2020 సీజన్‌లో 8వ మ్యాచ్‌కిగానీ కింగ్స్ ఎలెవన్ పంజాబ్ టీమ్ క్రిస్‌గేల్‌కి తుది జట్టులో అవకాశం ఇవ్వలేదు. షార్జా వేదికగా రాయల్ ఛాలెంజర్స్ బెంగళూరుతో గురువారం రాత్రి జరిగిన మ్యాచ్‌లో క్రిస్‌గేల్‌కి ఛాన్స్‌ ఇచ్చిన పంజాబ్.. అతడ్ని ఫస్ట్ డౌన్‌లో బ్యాటింగ్‌కి దింపడం అందర్నీ ఆశ్చర్యపరిచింది. సుదీర్ఘ కెరీర్‌లో ఓపెనర్‌గా అసాధారణ రికార్డులు నెలకొల్పిన క్రిస్‌గేల్.. ఐపీఎల్‌లోనూ ఆరంభం నుంచి ఓపెనర్‌గా కొనసాగుతున్నాడు. అయితే.. ఓపెనర్‌గానే కాకుండా నెం.3లోనూ తాను రాణించగలనని బెంగళూరుతో మ్యాచ్‌లో క్రిస్‌గేల్ (53: 45 బంతుల్లో 1×4, 5×6) హాఫ్ సెంచరీతో నిరూపించాడు.

మ్యాచ్‌లో తన బ్యాటింగ్ ఆర్డర్‌ని మార్చడానికి గల కారణాన్ని తాజా క్రిస్‌గేల్ వెల్లడించాడు. ‘‘పిచ్ చాలా స్లోగా కనిపించింది. అయినప్పటికీ.. సెకండ్ ఇన్నింగ్స్‌లో బ్యాటింగ్ ఏమీ కష్టంగా అనిపించలేదు. టీమ్ మేనేజ్‌మెంట్ నన్ను నెం.3లో బ్యాటింగ్ చేయమని కోరింది. నాకేమీ అభ్యంతరం లేదని చెప్పాను. పంజాబ్ ఓపెనర్లు తాజా సీజన్ ఆరంభం నుంచి మెరుగ్గా ఆడుతున్నారు. దాంతో వారిని డిస్ట్రబ్ చేయకూడదని టీమ్‌తో పాటు నేను కూడా భావించా. మ్యాచ్‌లో నాకో బాధ్యత (నెం.3లో బ్యాటింగ్) అప్పగించారు.. దాన్ని పూర్తి చేశాను’’ అని ఈ వెస్టిండీస్ విధ్వంసక హిట్టర్ స్పష్టం చేశాడు. గేల్ బ్యాటింగ్ ఆర్డర్‌ మార్పు కోచ్ అనిల్ కుంబ్లే ఆలోచనేనని సమాచారం.

హాఫ్ సెంచరీ తర్వాత బ్యాట్‌పై ఉన్న బాస్ స్టిక్కర్‌ని చూపిస్తూ సంబరాలు చేసుకోవడంపై కూడా క్రిస్‌గేల్ వివరణ ఇచ్చాడు. ‘‘నేను ఎప్పుడూ చెప్తుంటాను.. ఆ పేరు(బాస్‌)కి గౌరవం ఇవ్వాలని. అంతే’’ అని చెప్పుకొచ్చాడు ఈ యూనివర్సల్ బాస్. మ్యాచ్‌లో తొలుత విరాట్ కోహ్లీ (48: 39 బంతుల్లో 3×4), క్రిస్ మోరీస్ (25 నాటౌట్: 8 బంతుల్లో 1×4, 3×6) సమయోచిత ఇన్నింగ్స్ ఆడటంతో టాస్ గెలిచి మొదట బ్యాటింగ్‌ చేసిన బెంగళూరు 6 వికెట్ల నష్టానికి 171 పరుగులు చేసింది. ఛేదనలో క్రిస్‌గేల్‌తో పాటు కెప్టెన్ కేఎల్ రాహుల్ (61 నాటౌట్: 49 బంతుల్లో 1×4, 5×6) రాణించడంతో లక్ష్యాన్ని పంజాబ్ 177/2తో ఛేదించింది.