Mumbai Indians: జట్టును గెలిపించావ్ సరే.. ఇదేం పని? డికాక్‌కు జయవర్ధనే వార్నింగ్

Share Icons:
కోల్‌కతా నైట్ రైడర్స్‌తో జరిగిన మ్యాచ్‌లో అజేయ హాఫ్ సెంచరీతో జట్టును గెలిపించిన క్వింటన్ డికాక్‌కు ముంబై ఇండియన్స్‌ హెడ్ కోచ్ మహేల జయవర్దనే వార్నింగ్ ఇచ్చాడు. ఇంకెప్పుడూ ఇలా చేయొద్దని సున్నితంగా హెచ్చరించాడు. 44 బంతుల్లో 78 రన్స్‌తో అజేయంగా నిలిచి ముంబైను విజయతీరాలకు చేర్చిన డికాక్‌కు కోచ్ వార్నింగ్ ఇవ్వడం ఏంటని అనుకుంటున్నారా..?

ఈ మ్యాచ్‌లో ప్రాక్టీస్ మ్యాచ్‌లో వేసుకునే ప్యాంట్‌తో బ్యాటింగ్‌కు దిగాడు. మ్యాచ్‌లో ధరించే ప్యాంట్‌ మీద గోల్డ్ కలర్‌లో గీతలు ఉంటే.. ప్రాక్టీస్ మ్యాచ్‌లో ధరించే ప్యాంట్ మీద ఆరెంజ్ కలర్ గీతలుంటాయి. దీంతో ఇవి కనిపించకుండా ఉండటం కోసం డికాక్ జెర్సీని కిందకు వదిలేశాడు.

ఆటగాళ్ల దుస్తులపై లోగోలతో స్పాన్సర్లు తమ బ్రాండ్లను ప్రమోట్ చేసుకుంటారనే సంగతి తెలిసిందే. ఇందుకోసం భారీ మొత్తం ఫ్రాంచైజీలకు ముట్టజెబుతారు. కాబట్టి ఆటగాళ్లు నిర్దేశిత దుస్తులనే ధరించాలి. లేదంటే మార్కెటింగ్ విభాగంపై ఒత్తిడి పడుతుంది. అందుకే మళ్లీ ఇలా చేయొద్దని డికాక్‌ను జయవర్దనే హెచ్చరించాడు.

డికాక్‌కు జయవర్దనే నవ్వుతూ వార్నింగ్ ఇచ్చిన వీడియోను ట్వీట్ చేసిన ముంబై ఇండియన్స్.. తమ జట్టు తరఫున ట్రైనింగ్స్ ట్రౌజర్స్‌తో మ్యాచ్ ఆడిన తొలి ఆటగాడంటూ డికాక్‌ను ఆటపట్టించింది.

కోల్‌కతాతో జరిగిన మ్యాచ్‌లో 20 ఓవర్లపాటు వికెట్ కీపింగ్ చేసిన డికాక్.. 17 ఓవర్లపాటు బ్యాటింగ్ చేశాడు. 44 బంతుల్లో 9 ఫోర్లు, 3 సిక్సులతో 78 రన్స్‌తో నాటౌట్‌గా నిలిచి ముంబైకు విజయాన్ని అందించి మ్యాన్ ఆఫ్ ది మ్యాచ్‌గా నిలిచాడు. అంతకు ముందు ఢిల్లీతో జరిగిన మ్యాచ్‌లోనూ 36 బంతుల్లో 53 పరుగులు చేసిన డికాక్.. మ్యాన్ ఆఫ్ ది మ్యాచ్ అవార్డు సొంతం చేసుకున్నాడు.