KXIP vs RCB: కోహ్లిపై రివేంజ్ తీర్చుకున్న కుంబ్లే..? తెర మీదకు కోచ్ ఉద్వాసన జ్ఞాపకాలు!

Share Icons:
రాయల్ ఛాలెంజర్స్ బెంగళూరుతో జరిగిన మ్యాచ్‌లో కింగ్స్ ఎలెవన్ పంజాబ్ 8 వికెట్ల తేడాతో విజయం సాధించింది. ఈ విజయంతో ప్లేఆఫ్స్ ఆశలను సజీవంగా ఉంచుకుంది. ఈ సీజన్లో పంజాబ్ గెలిచిన రెండు మ్యాచ్‌లూ బెంగళూరుపైనే కావడం విశేషం. పేరుకే పంజాబ్ అయినా.. ఆ జట్టులో ఎక్కువ మంది ఆటగాళ్లు కర్ణాటకకు చెందిన వారే. కోచ్ , కెప్టెన్ కేఎల్ రాహుల్, ఓపెనర్ మయాంక్ అగర్వాల్‌తోపాటు కరుణ్ నాయర్, క్రిష్ణప్ప గౌతమ్, సుచిత్ లాంటి ఆటగాళ్లు కర్ణాటకకు చెందిన వారే. దీంతో ఆర్సీబీపై కర్ణాటక ఆటగాళ్లు గెలిచినట్లయ్యింది.

ఈ సీజన్లో బెంగళూరుపై పంజాబ్ రెండు మ్యాచ్‌ల్లో గెలవగానే టీమిండియా కోచ్‌గా అనిల్ కుంబ్లేకు ఉద్వాసన పలికిన ఎపిసోడ్ తెర మీదకు వచ్చింది. కోహ్లిపై కుంబ్లే పర్‌ఫెక్ట్ రివేంజ్ తీర్చుకున్నాడని క్రికెట్ ఫ్యాన్స్ ట్వీట్లు చేస్తున్నారు.

అనిల్ కుంబ్లే టీమిండియా హెడ్ కోచ్‌గా పని చేస్తున్న సమయంలో కెప్టెన్ కోహ్లితో విబేధాలు పొడచూపాయి. కుంబ్లే వ్యవహార శైలి పట్ల కోహ్లి తీవ్ర అభ్యంతరాలు వ్యక్తం చేశాడు. అతడు కోచ్‌గా కొనసాగడానికి వీల్లేదని బీసీసీఐ క్రికెట్ సలహా సంఘం ముందు విరాట్ కుండ బద్ధలు కొట్టినట్లు అప్పట్లో వార్తలొచ్చాయి.

టీమిండియా ఇంగ్లాండ్ పర్యటనలో ఉండగానే.. కోచ్, కెప్టెన్ మధ్య విబేధాలు తారా స్థాయికి చేరాయి. దీంతో వీరి మధ్య సయోధ్య కుదర్చడం కోసం బీసీసీఐ చేసిన ప్రయత్నాలేవి ఫలించలేదు. చివరకు కోహ్లి పంతమే నెగ్గింది. కెప్టెన్ డిమాండ్‌కు బీసీసీఐ తలొగ్గడంతో.. ఏడాది కాంట్రాక్ట్ ముగియగానే కుంబ్లే కోచ్ పదవిని తప్పుకోవాల్సి వచ్చింది. వాస్తవానికి 2019 వరల్డ్ కప్ ముగిసే వరకూ కుంబ్లే కాంట్రాక్ట్ పొడిగిస్తారని భావించినా.. అలా జరగలేదు.

కుంబ్లే కోచ్‌గా ఉన్న సమయంలో టీమిండియా మంచి విజయాలే సాధించింది. అయినప్పటికీ.. అవమానకర రీతిలో అతడు కోచ్ పదవి నుంచి తప్పుకోవాల్సి వచ్చింది. ఇప్పుడు ఐపీఎల్‌లో కోహ్లి నాయకత్వంలోని ఆర్సీబీపై రెండు మ్యాచ్‌ల్లోనూ గెలవడం ద్వారా కుంబ్లే ప్రతీకారం తీర్చుకున్నాడని ఫ్యాన్స్ గతాన్ని గుర్తు చేస్తున్నారు.