KXIP vs MI: డికాక్, పొలార్డ్ మెరుపులు.. పంజాబ్ టార్గెట్ 177

Share Icons:
ఐపీఎల్ 2020 సీజన్‌లో ముంబయి ఇండియన్స్ మరోసారి మిడిలార్డర్ మెరవడంతో గౌరవప్రదమైన స్కోరుని అందుకోగలిగింది. కింగ్స్ ఎలెవన్ పంజాబ్‌తో దుబాయ్ వేదికగా ఆదివారం జరుగుతున్న మ్యాచ్‌లో 16.3 ఓవర్లు ముగిసే సమయానికి 119/6తో తక్కువ స్కోరుకే పరిమితమయ్యేలా కనిపించిన ముంబయి ఇండియన్స్.. కీరన్ పొలార్డ్ (34 నాటౌట్: 12 బంతుల్లో 1×4, 4×6), కౌల్టర్ నైల్ (24 నాటౌట్: 12 బంతుల్లో 4×4) దూకుడుతో ఆఖరికి 176/6తో నిలిచింది. పంజాబ్ బౌలర్లని చివరి మూడు ఓవర్లలో ఉతికారేసిన ఈ జోడీ ఏకంగా 54 పరుగులు రాబట్టింది. అంతకముందు ఓపెనర్ డికాక్(53: 43 బంతుల్లో 3×4, 3×6) హాఫ్ సెంచరీతో యాంకర్ ఇన్నింగ్స్ ఆడాడు. పంజాబ్ బౌలర్లలో మహ్మద్ షమీ, అర్షదీప్ సింగ్ చెరో రెండు వికెట్లు పడగొట్టగా.. క్రిస్ జోర్దాన్, రవి బిష్ణోయ్ తలో వికెట్ తీశారు.

మ్యాచ్‌లో టాస్ గెలిచిన ముంబయి కెప్టెన్ రోహిత్ శర్మ బ్యాటింగ్ ఎంచుకుని.. డికాక్‌తో కలిసి ఇన్నింగ్స్ ఆరంభించాడు. కానీ.. తొలి పవర్ ప్లేలో దూకుడుగా ఆడే ప్రయత్నంలో రోహిత్ శర్మ (9: 8 బంతుల్లో 2×4) ఔటవగా.. అనంతరం వచ్చిన సూర్యకుమార్ యాదవ్ (0), ఇషాన్ కిషన్ (7) నిరాశపరిచారు. దాంతో ఒకానొక దశలో ముంబయి 96/4తో కష్టాల్లో నిలిచింది. కానీ.. కృనాల్ పాండ్య (34: 30 బంతుల్లో 4×4, 1×6)తో కలిసి ఇన్నింగ్స్ నిర్మించిన డికాక్.. హాఫ్ సెంచరీ నమోదు చేయగా.. ఓవర్ల వ్యవధిలో కృనాల్ పాండ్య, హార్దిక్ పాండ్య (8: 4 బంతుల్లో 1×6) ఔటైపోయారు. అయితే.. ఆఖర్లో కౌల్టర్‌ నైల్‌తో కలిసి బ్యాట్ ఝళిపించిన పొలార్డ్ ముంబయికి 176 స్కోరుని అందించాడు.