KXIP: గేల్ ఈజ్ బ్యాక్.. టీ20ల్లో యూనివర్సల్ బాస్ అరుదైన రికార్డ్!

Share Icons:
2020లో యూనివర్సల్ బాస్ అద్భుతంగా ఎంట్రీ ఇచ్చాడు. ఆడిన తొలి మ్యాచ్‌లోనే హాఫ్ సెంచరీ బాదిన గేల్.. కింగ్స్ ఎలెవన్ పంజాబ్ విజయంలో కీలక పాత్ర పోషించాడు. ఈ సీజన్లో ఏడు మ్యాచ్‌లపాటు బెంచ్‌కే పరిమితమైన గేల్.. ఆర్సీబీపై బరిలో దిగి అభిమానులను అలరించాడు. జనవరి తర్వాత తొలిసారి బ్యాట్ పట్టిన గేల్.. ఆరంభంలో ఆచితూచి ఆడాడు. ఈ మ్యాచ్‌లో మూడో స్థానంలో బ్యాటింగ్‌కు వచ్చిన గేల్.. కుదురుకోవడానికి సమయం తీసుకున్నా.. ఐదు సిక్సులు, ఓ ఫోర్ బాది తనలో సత్తా తగ్గలేదని చాటాడు. 45 బంతుల్లో 53 రన్స్ చేసిన గేల్.. పంజాబ్ విజయానికి ఒక్క పరుగు దూరంలో రనౌట్ అయ్యాడు.

ఈ మ్యాచ్‌లో 5 సిక్సర్లతో అభిమానులను అలరించిన గేల్.. టీ20ల్లో అరుదైన రికార్డ్‌ను క్రియేట్ చేశాడు. 13,349 రన్స్‌తో.. టీ20ల్లో అత్యధిక పరుగులు చేసిన ఆటగాడిగా పేరొందిన గేల్.. బౌండరీల ద్వారానే పది వేల పరుగుల్ని పూర్తి చేయడం విశేషం. టీ20ల్లో గేల్ 1027 ఫోర్లు, 982 సిక్సులు బాదాడు. ప్రస్తుతం గేల్ కాకుండా కీరన్ పోలార్డ్, షోయబ్ మాలిక్ టీ20ల్లో పది వేలకుపైగా పరుగులు చేశారు. కోహ్లి ఇటీవలే టీ20ల్లో 9 వేల పరుగుల మైలురాయిని చేరుకున్న సంగతి తెలిసిందే.

ఇక మ్యాచ్ విషయానికి వస్తే.. టాస్ గెలిచిన కోహ్లి బ్యాటింగ్ ఎంచుకోగా.. ఆర్సీబీ 20 ఓవర్లలో 6 వికెట్ల నష్టానికి 171 పరుగులు చేసింది. కోహ్లి 48 రన్స్ చేయగా.. డివిలియర్స్ 2 రన్స్‌కే ఔటై నిరాశపర్చాడు. కానీ ఆఖర్లో క్రిస్ మోరిస్ 8 బంతుల్లోనే 25 రన్స్ చేయడంతో ఆర్సీబీ పోరాడే స్కోరు చేసింది.

షార్జా పిచ్‌ మీద 172 పరుగుల లక్ష్యంతో బరిలో దిగిన పంజాబ్‌కు ఓపెనర్లు కేఎల్ రాహుల్, మయాంక్ అగర్వాల్ శుభారంభం ఇచ్చారు. తొలి వికెట్‌కు 78 పరుగులు జోడించాక మయాంక్ ఔటైనా.. క్రీజ్‌లోకి వచ్చిన గేల్, రాహుల్‌తో కలిసి పంజాబ్‌ను విజయం దిశగా నడిపాడు. ఆఖర్లో గేల్ ఔటవడంతో కొంత ఉత్కంఠ నెలకొన్నప్పటికీ చివరి బంతికి సిక్స్ బాదిన పూరన్ పంజాబ్‌ను గెలిపించాడు. ఈ సీజన్లో పంజాబ్ రెండు విజయాలు సాధించగా.. ఆ రెండూ బెంగళూరుపైనే కావడం విశేషం.