KKR vs MI: దినేశ్ కార్తీక్ ఎకాగ్రత చెదిరింది.. దెబ్బకి బెయిల్ ఎగిరింది

Share Icons:
ఐపీఎల్ 2020 సీజన్‌లో కోల్‌కతా నైట్‌రైడర్స్ మాజీ కెప్టెన్ దినేశ్ కార్తీక్ మెరుపులు ఒక మ్యాచ్‌కే పరిమితమయ్యాయి. ముంబయి ఇండియన్స్‌తో శుక్రవారం రాత్రి మ్యాచ్‌కి కొన్ని గంటల ముందు కోల్‌కతా కెప్టెన్సీ నుంచి దినేశ్ కార్తీక్ తప్పుకోగా.. ఇయాన్ మోర్గాన్ కెప్టెన్సీలో ఆ టీమ్ మ్యాచ్ ఆడింది. దాంతో.. ఈ మ్యాచ్‌లో దినేశ్ కార్తీక్ (4: 8 బంతుల్లో 1×4) స్వేచ్ఛగా చెలరేగిపోతాడని అంతా ఊహిస్తే..? అతను మాత్రం పేలవ షాట్‌తో వికెట్ సమర్పించుకున్నాడు. బ్యాటింగ్ ఆర్డర్‌లో నెం.4.. అదీ ఆరో ఓవర్‌లోనే బ్యాటింగ్‌కి వెళ్లిన కార్తీక్‌లో మునుపటి ఆత్మవిశ్వాసం కనిపించలేదు. దానికి కారణం.. బహుశా కెప్టెన్సీ మార్పు కావొచ్చు.

ఇన్నింగ్స్ 8వ ఓవర్ వేసిన స్పిన్నర్ రాహుల్ చాహర్.. రెండో బంతికి ఓపెనర్ శుభమన్ గిల్ (21: 23 బంతుల్లో 2×4) వికెట్ తీసి.. మూడో బంతికి దినేశ్ కార్తీన్‌ని బోల్తా కొట్టించేశాడు. ఆఫ్ స్టంప్‌కి వెలుపలగా పడిన బంతిని సాహసోపేతంగా దినేశ్ కార్తీక్ స్వీప్ షాట్‌తో ఫైన్ లెగ్ దిశగా హిట్ చేసేందుకు ప్రయత్నించాడు. కానీ.. బ్యాట్ అంచు తాకిన బంతి అనంతరం ఫ్యాడ్‌ని తాకుతూ నేరుగా వెనక్కి వెళ్లి లెగ్ స్టంప్‌ని గీరాటేసింది. వాస్తవానికి వికెట్ పడిన వెంటనే దినేశ్ కార్తీక్ అలా సాహాసోపేత షాట్‌కి ప్రయత్నించి ఉండకూడదు. అతను చేసిన తప్పిదం కారణంగా.. బ్యాక్ టు బ్యాక్ వికెట్ దక్కించుకున్న ముంబయి.. మరింతగా బౌలింగ్ దూకుడు పెంచి కోల్‌కతాని 148/5కే పరిమితం చేయగలిగింది.

దినేశ్ కార్తీక్‌కి మైదానం నలువైపులా బంతిని తరలించగల సామర్థ్యం ఉంది. స్పిన్నర్ల బౌలింగ్‌లో స్వీప్, రివర్స్ స్వీప్ షాట్స్‌ని కూడా అతను చక్కగా ఆడగలడు. కానీ.. రాహుల్ చాహర్ విసిరిన బంతి సరిగా కనెక్ట్ చేయలేకపోయాడు. బంతి ఆఫ్ స్టంప్ లైన్‌పై పడుతుందని ఊహించి ముందే స్వీప్ షాట్‌కి సిద్ధమైపోగా.. రాహుల్ చాహర్ తెలివిగా.. ఆఫ్ స్టంప్‌కి దూరంగా విసిరి కట్ చేశాడు. దాంతో.. కార్తీక్ బంతిని ఊహించిన విధంగా కనెక్ట్ చేయలేకపోయాడు. కొన్ని క్షణాల పాటు బంతి వెనక్కి వెళ్లి వికెట్ల గీరాటేసిన తీరుని దినేశ్ కార్తీక్ కూడా నమ్మలేకపోయాడు. ఈ మ్యాచ్‌లో ముంబయి 8 వికెట్ల తేడాతో అలవోక విజయాన్ని అందుకుంది.