KKR విచిత్ర పరిస్థితి.. బ్యాటింగ్ చేయలేకపోతున్న హిట్టర్, వికెట్లు తీయలేకపోతున్న బౌలర్!

Share Icons:
ఐపీఎల్ 2020లో ఇప్పటి వరకూ ఆడిన 8 మ్యాచ్‌ల్లో 4 విజయాలు సాధించిన పాయింట్ల పట్టికలో నాలుగో స్థానంలో నిలిచింది. ముంబైతో మ్యాచ్‌లో ఓడినప్పటికీ.. కోల్‌కతా నాలుగో స్థానంలోనే కొనసాగుతోంది. బ్యాటింగ్‌పై ఫోకస్ పెట్టడం కోసమని దినేశ్ కార్తీక్ కెప్టెన్సీని వదులుకోగా.. ఇయాన్ మోర్గాన్ నాయకత్వ బాధ్యతలు చేపట్టిన సంగతి తెలిసిందే. కాగా హిట్టర్ ఆండ్రీ రస్సెల్ బ్యాటింగ్ చేయలేకపోతుండటం.. ప్యాట్ కమిన్స్ వికెట్లు తీయలేకపోతుండటంతో… కోల్‌కతా నైట్ రైడర్స్‌ విచిత్ర పరిస్థితిని ఎదుర్కొంటోంది.

కోల్‌కతా జట్టులో రస్సెల్ కీలక ఆటగాడు. ఆఖరి ఓవర్లలో బ్యాటింగ్‌కు వచ్చి మ్యాచ్ స్వరూపాన్ని అమాంతం మార్చేగల సత్తా అతడికి ఉంది. కానీ ఈ సీజన్లో బ్యాట్‌తో ఆకట్టుకోలేకపోతున్నాడు. ఇప్పటి వరకూ ఏడు ఇన్నింగ్స్ ఆడిన రస్సెల్ 83 రన్స్ మాత్రమే చేయగలిగాడు. ఐపీఎల్ 2020లో రస్సెల్ కంటే ప్యాట్ కమిన్స్ ఎక్కువ పరుగులు చేయడం గమనార్హం. ముంబైతో జరిగిన మ్యాచ్‌లో హాఫ్ సెంచరీతో జట్టును ఆదుకున్న కమిన్స్.. ఈ సీజన్లో 126 రన్స్ చేశాడు.

బ్యాటింగ్‌లో రస్సెల్ ప్రభావం చూపలేకపోతుండగా.. రూ.15.50 కోట్లు పెట్టి కొనుగోలు చేసిన బౌలింగ్ ఆల్‌రౌండర్ కమిన్స్.. వికెట్లు తీయలేకపోవడం కోల్‌కతాకు మింగుడుపడటం లేదు. ఈ సీజన్లో కమిన్స్ 29 ఓవర్లు బౌలింగ్ చేసి.. 8.62 ఎకానమీతో రెండు వికెట్లు మాత్రమే తీశాడు. మరోవైపు రస్సెల్ బౌలింగ్‌లో రాణిస్తుండటం విశేషం. ఈ సీజన్లో ఇప్పటి వరకూ 16 ఓవర్లు బౌలింగ్ చేసిన రస్సెల్ 9.12 ఎకానమీతో ఆరు వికెట్లు తీశాడు.