KKR కెప్టెన్ దినేశ్ కార్తీక్‌తో రసెల్ గొడవపై మెంటార్ క్లారిటీ

Share Icons:
ఐపీఎల్ 2019 సీజన్‌లో కోల్‌కతా నైట్‌రైడర్స్ ఓడిపోయే మ్యాచ్‌ల్ని కూడా తన విధ్వంసక హిట్టింగ్‌తో ఆండ్రీ రసెల్ గెలిపించాడు. సీజన్ ఆరంభంలో మిడిలార్డర్‌లో రసెల్‌ని ఆడించిన ఆ జట్టు కెప్టెన్ దినేశ్ కార్తీక్.. ఆ తర్వాత క్రమంగా లోయర్ బ్యాటింగ్ ఆర్డర్‌కి అతడ్ని మార్చాడు. దాంతో.. కొన్ని మ్యాచ్‌ల్లో రసెల్‌కి కనీసం 2-3 ఓవర్లు ఆడే అవకాశం కూడా దక్కలేదు. ఐపీఎల్ 2019 సీజన్‌లో 14 మ్యాచ్‌లాడిన ఆండ్రీ రసెల్ ఏకంగా 204.81 స్ట్రైక్‌రేట్‌తో 510 పరుగులు చేశాడు. ఇందులో 31 ఫోర్లు, 52 సిక్సర్లు ఉండటం అతని దూకుడుకి నిదర్శనం.

మ్యాచ్ గమనానికి అనుగుణంగా ఆండ్రీ రసెల్‌ బ్యాటింగ్ ఆర్డర్‌ని దినేశ్ కార్తీక్ మార్చినా.. కొన్ని మ్యాచ్‌ల్లో ఆ ప్లాన్ ఫెయిలైంది. దాంతో.. రసెల్ సైతం కెప్టెన్ కార్తీక్ తీరుపై మండిపడ్డాడు. మ్యాచ్ చేజారిపోతున్న సమయంలోనూ తనని పక్కనపెట్టడంపై బాహాటంగానే పెదవి విరిచిన వెస్టిండీస్ హిట్టర్.. కోల్‌కతా నైట్‌రైడర్స్ యాజమాన్యానికి గత ఏడాది ఫిర్యాదు చేసినట్లు వార్తలు వచ్చాయి. దాంతో.. ఇద్దరి మధ్య డ్రెస్సింగ్ రూములోనూ గొడవైందని రూమర్స్ వినిపించాయి. కానీ.. ఐపీఎల్ 2020 ముంగిట వారిద్దరూ చాలా ఫ్రెండ్లీగా ఉన్నారని కోల్‌కతా నైట్‌రైడర్స్ మెంటార్ డేవిడ్ హస్సీ తాజాగా వెల్లడించాడు.

‘‘ఆండ్రీ రసెల్, దినేశ్ కార్తీక్ మధ్య ప్రస్తుతం ఎలాంటి గొడవల్లేవు. ఇద్దరూ ఇప్పుడు చాలా ఫ్రెండ్లీగా మాట్లాడుకుంటున్నారు. కెప్టెన్ కార్తీక్ ముక్కుసూటి మనిషి. సహచరులకి మద్దతుగా నిలుస్తూ జట్టుని గెలిపిస్తుంటాడు. అతను మంచి నాయకుడు కూడా. ఐపీఎల్‌ మ్యాచ్‌లలో ఉన్న తీవ్రత కారణంగా కొన్నిసార్లు కఠిన నిర్ణయాలు తీసుకోవచ్చు.. కానీ.. అందులో చెడు ఉద్దేశం ఏమీ ఉండదు. అతని టార్గెట్‌ టీమ్‌ని గెలిపించడమే’’ అని హస్సీ చెప్పుకొచ్చాడు.