KKRలో ఏదో తప్పు జరుగుతోంది.. అందుకే ఇలా.. బ్రియాన్ లారా అనుమానాలు

Share Icons:
కోల్‌కతా నైట్ రైడర్స్‌‌కు కెప్టెన్సీ ఎప్పుడూ సమస్య కాదని వెస్టిండీస్ దిగ్గజ క్రికెటర్ బ్రియాన్ లారా అభిప్రాయపడ్డాడు. సునీల్ నరైన్‌ను తిరిగి ఆడించాలని లారా సూచించాడు. కోల్‌కతా లక్ష్యాలను కాపాడుకొని మ్యాచ్‌లు గెలవడంలో నరైన్ కీలక పాత్ర పోషించాడన్న లారా.. అతడు బౌలింగ్ యాక్షన్ సమస్యను పరిష్కరించుకొని తిరి ఆడాలన్నాడు. పంజాబ్‌తో జరిగిన మ్యాచ్ సందర్భంగా నరైన్ బౌలింగ్‌ యాక్షన్‌పై అంపైర్లు ఫిర్యాదు చేసిన సంగతి తెలిసిందే. మరోసారి ఇలాంటి ఫిర్యాదు వస్తే.. ఐపీఎల్‌కు అతడు పూర్తిగా దూరం అవుతాడు.

ఆండ్రీ రస్సెల్ పరుగులు చేయాల్సిన అవసరం ఉందన్న లారా.. కెప్టెన్‌ను మార్చి కోల్‌కతా ఒత్తిడి కొని తెచ్చుకుందన్నాడు. ఇప్పుడు అందరి కళ్లూ ఆ జట్టుపైనే ఉన్నాయన్నాడు. ‘కోల్‌కతా కెప్టెన్‌ను మార్చింది. ఆ క్యాంప్‌లో జరగకూడనిది ఏదో జరుగుతోంది. కోల్‌కతా అంత చిత్తుగా (మంబై చేతిలో పరాజయం గురించి..) ఓడిపోవడం నేనెప్పుడూ చూడలేదు’ అని బ్రియాన్ తెలిపాడు.

ముంబైతో జరిగిన మ్యాచ్‌లో కోల్‌కతా 5 వికెట్ల నష్టానికి 148 రన్స్ మాత్రమే చేసింది. ఆరంభంలోనే వికెట్లు కోల్పోయిన నైట్ రైడర్స్‌ను ప్యాట్ కమిన్స్ (53 నాటౌట్) ఆదుకున్నాడు. క్వింటన్ డికాక్ (44 బంతుల్లో 78 నాటౌట్) అర్ధ శతకం బాదడంతో.. స్వల్ప లక్ష్యాన్ని ముంబై మరో 19 బంతులు మిగిలి ఉండగానే చేధించింది.