IPL 2020 Points Table: పంజాబ్ ప్లేఆఫ్ ఆశలు సజీవం.. ఇక అసలైన రేసు మొదలు

Share Icons:
ఐపీఎల్ 2020 సీజన్‌‌లో వరుసగా ఐదు పరాజయాలతో ఢీలాపడిపోయిన కింగ్స్ ఎలెవన్ పంజాబ్.. ఎట్టకేలకి గురువారం రాత్రి రాయల్ ఛాలెంజర్స్ బెంగళూరుపై గెలుపొంది ప్లేఆఫ్ ఆశల్ని సజీవంగా ఉంచుకుంది. ఆఖరి బంతికి ఫలితం తేలిన ఈ మ్యాచ్‌లో 8 వికెట్ల తేడాతో గెలుపొందిన పంజాబ్.. 4 పాయింట్లతో పట్టికలో చిట్టచివరి స్థానంలో నిలిచింది. అయినప్పటికీ.. లీగ్ దశలో మిగిలిన ఆరు మ్యాచ్‌లను ఆ జట్టు గెలిస్తే..? ప్లేఆఫ్ రేసులో నిలిచే అవకాశం ఉంటుంది. ఒకవేళ బెంగళూరుతో మ్యాచ్‌లో ఆ టీమ్ ఓడింటే..? ప్లేఆఫ్ ఆశలకి దాదాపు తెరపడిపోయేది..!

పాయింట్ల పట్టికలో ఇప్పటికే ఢిల్లీ క్యాపిటల్స్ ఆరు విజయాలతో 12 పాయింట్లని ఖాతాలో వేసుకుని టాప్‌లో కొనసాగుతుండగా.. ఆ తర్వాత ముంబయి ఇండియన్స్ (10), రాయల్ ఛాలెంజర్స్ బెంగళూరు (10), కోల్‌కతా నైట్‌రైడర్స్ (8) టాప్-4లో కొనసాగుతున్నాయి. సన్‌రైజర్స్ హైదరాబాద్ ఇటీవల గాడి తప్పగా.. చెన్నై సూపర్ కింగ్స్ రెండు రోజుల క్రితం లయ అందుకుంది. రాజస్థాన్ రాయల్స్ తన ప్రయాణాన్ని పడుతూ లేస్తూ కొనసాగిస్తోంది. మొత్తంగా లీగ్ దశలో ప్రతి జట్టూ 14 మ్యాచ్‌లను ఆడనుండగా.. కనీసం 8 మ్యాచ్‌ల్లో గెలిచిన జట్టు ప్లేఆఫ్ రేసులో నిలిచే అవకాశం ఉంది. దాంతో.. ఇకపై మ్యాచ్‌లు రంజుగా సాగనున్నాయి.

ముంబయి ఇండియన్స్, కోల్‌కతా నైట్‌రైడర్స్ మధ్య అబుదాబి వేదికగా శుక్రవారం రాత్రి మ్యాచ్ జరగనుండగా.. ఈ మ్యాచ్‌లో ముంబయి గెలిస్తే నెం.1 స్థానంలోకి దూసుకెళ్లనుంది. దానికి కారణం.. ఢిల్లీతో పోలిస్తే మెరుగైన నెట్ రన్‌రేట్ ఉండటమే. కోల్‌కతా నైట్‌రైడర్స్ భారీ తేడాతో గెలిస్తే తప్ప.. మూడో స్థానానికి ఎగబాకదు. దానికి కారణం కూడా నెట్‌ రన్‌రేట్.