IPL 2020: MI vs CSK మ్యాచ్ టర్నింగ్ పాయింట్స్.. ధోనీ బుర్రే బుర్ర

Share Icons:
ఐపీఎల్ 2020 సీజన్ ఫస్ట్ మ్యాచ్‌లోనే చెన్నై సూపర్ కింగ్స్ కెప్టెన్ మహేంద్రసింగ్ ధోనీ తన వ్యూహ చతురతతో ఆకట్టుకున్నాడు. టాస్ దగ్గర నుంచి ఆఖర్లో చెన్నై టీమ్ బ్యాటింగ్ ఆర్డర్‌లో మార్పులు వరకూ ధోనీ మార్క్ సర్‌ప్రైజ్‌లు కనిపించాయి. మ్యాచ్ గమనానికి అనుగుణంగా వ్యూహాల్ని మార్చడంలో ముంబయి ఇండియన్స్ కెప్టెన్ రోహిత్ శర్మ విఫలమవగా.. ధోనీ మాత్రం మంచి మార్కులు కొట్టేశాడు. ఆఖర్లో డీఆర్‌ఎస్ కోరడంలోనూ ధోనీ తన స్టయిన్‌ని చూయించాడు.

Read More:

* మ్యాచ్‌లో టాస్ గెలిచిన ధోనీ ఫీల్డింగ్ ఎంచుకున్నాడు. పిచ్ నెమ్మదిగా మారబోతోందని తెలిసినా.. మంచు కురిసే సూచనలు కనిపించంతో ఛేదనకే ధోనీ మొగ్గు చూపాడు. ఆ మంచే ముంబయి బౌలర్లు, ఫీల్డర్లకి శాపంగా మారింది.

* ముంబయి ఇండియన్స్ ఓపెనర్లు రోహిత్ శర్మ- డికాక్ దూకుడు పెంచుతున్న దశలో.. ఈ జోడీని విడదీసేందుకు నాలుగో ఓవర్‌లోనే పీయూస్ చావ్లాని ధోనీ రంగంలోకి దించాడు. దాంతో.. ఓవర్ వ్యవధిలోనే ఈ ఇద్దరూ పెవిలియన్‌కి చేరిపోయారు. రోహిత్ శర్మ లెగ్ స్పిన్‌‌ బలహీనతని పసిగట్టడంలో ధోనీ ఇక్కడ సక్సెస్ అయ్యాడు.

* చెన్నై బౌలింగ్‌లో రెగ్యులర్ స్పెల్ కనిపించలేదు. లుంగి ఎంగిడి, దీపక్ చాహర్‌, శామ్ కరన్‌‌లతో పాటు జడేజా, పీయూస్ చావ్లాతో ఓవర్ల మధ్యలో గ్యాప్‌ ఇస్తూ బౌలింగ్ చేయించాడు. ముఖ్యంగా కుడిచేతి వాటం బ్యాట్స్‌మెన్‌‌లు సౌరవ్ తివారి, హార్దిక్ పాండ్య దూకుడు పెంచుతున్న సమయంలో ఎడమ చేతి వాటం స్పిన్నర్ జడేజాని బౌలింగ్‌కి దించి వారిని కట్టడి చేశాడు. కానీ.. రోహిత్ శర్మ మాత్రం లెప్ట్ హ్యాండర్ శామ్ కరన్ దూకుడుగా ఆడుతుంటే కృనాల్ పాండ్యాతో బౌలింగ్ చేయించి మూల్యం చెల్లించుకున్నాడు.

* ఐపీఎల్‌లో అసలైన స్కోరు వచ్చేది చివరి నాలుగు ఓవర్లలోనే. ధోనీ చివరి నాలుగు ఓవర్లని ఫాస్ట్ బౌలర్లతో వేయిస్తే..? రోహిత్ శర్మ మాత్రం స్పిన్నర్లని ఆశ్రయించి దెబ్బతిన్నాడు.

* బ్యాటింగ్ ఆర్డర్‌‌లోనూ ధోనీ అనూహ్యమైన మార్పులు చేశాడు. బంతులు, పరుగుల మధ్య అంతరం పెరిగిపోతున్నా.. తాను బ్యాటింగ్ ఆర్డర్‌లో వెనక్కి వెళ్లి రవీంద్ర జడేజా, శామ్ కరన్‌లను ముందుకు పంపాడు. దాంతో.. ధోనీ ఉన్నాడనే ధీమాతో.. వారిద్దరూ క్రీజులో ఉన్నంతసేపు హిట్టింగ్‌కే ప్రాధాన్యమిచ్చారు. ఆ దూకుడే చెన్నై టీమ్‌ని విజయతీరాలకి కూడా చేర్చింది. ఒకవేళ ధోనీ ఐదో స్థానంలో బ్యాటింగ్‌కి వెళ్లి.. ఔటై ఉండింటే..? చెన్నైపై ఒత్తిడి పెరిగేది.

* ఫీల్డింగ్ కూర్పులోనూ రోహిత్ శర్మ తన మార్క్‌ కనబర్చలేకపోయాడు. చెన్నై బ్యాట్స్‌మెన్‌లు పదే పదే బంతిని గాల్లోకి లేపినా.. క్యాచ్‌లు అందుకోలేకపోయారు. ముఖ్యంగా.. చెన్నై విన్నింగ్ షాట్ ఆడిన డుప్లెసిస్‌కి రెండు జీవనదానాలు లభించాయి. కానీ.. చెన్నై టీమ్‌ ఫీల్డింగ్‌లో అదరగొట్టింది. డుప్లెసిస్ బౌండరీ లైన్ వద్ద సిక్స్‌గా వెళ్తున్న బంతుల్ని క్యాచ్‌లుగా అందుకోగా.. శామ్ కరన్, వాట్సన్ చక్కగా క్యాచ్‌‌లను అందుకున్నారు.

* ఫీల్డింగ్ తప్పిదాల సమయంలోనూ రోహిత్ శర్మలో అసహనం స్పష్టంగా కనిపించింది. ఆ ప్రభావం ఫీల్డర్లపై ఒత్తిడి పెంచగా.. ధోనీ మాత్రం తప్పిదాలు చేసిన బౌలర్లు, ఫీల్డర్లతో ఓవర్ మధ్యలో మాట్లాడుతూ సూచనలు ఇవ్వడం కనిపించింది.