IPL 2020: మ్యాచ్‌ టైమ్‌లో సిగరెట్ తాగుతూ దొరికిపోయిన RCB ప్లేయర్

Share Icons:
ఐపీఎల్ 2020 సీజన్‌లో రాయల్ ఛాలెంజర్స్ బెంగళూరు మళ్లీ లయ అందుకుంది. రాజస్థాన్ రాయల్స్‌తో దుబాయ్ వేదికగా శనివారం జరిగిన మ్యాచ్‌లో ఏబీ డివిలియర్స్ (55 నాటౌట్: 22 బంతుల్లో 1×4, 6×6) అద్భుత ఇన్నింగ్స్ ఆడటంతో 7 వికెట్ల తేడాతో విజయాన్ని అందుకున్న బెంగళూరు.. 12 పాయింట్లతో పట్టికలో మూడో స్థానంలో నిలిచింది. ఆ జట్టు ప్లేఆఫ్ రేసులో నిలవాలంటే మిగిలిన ఆరు మ్యాచ్‌లకిగానూ కనీసం రెండింటిలో గెలుపొందాల్సి ఉంటుంది.

రాజస్థాన్‌తో మ్యాచ్‌లో బెంగళూరు విజయానికి చివరి 12 బంతుల్లో 25 పరుగులు అవసరమవగా.. ఇన్నింగ్స్ 19వ ఓవర్ వేసిన జయదేవ్ ఉనద్కత్ బౌలింగ్‌లో ఏబీ డివిలియర్స్ వరుసగా మూడు సిక్సర్లు బాదేసి మొత్తం ఆ ఓవర్‌లో 25 పరుగులు రాబట్టేశాడు. అయినప్పటికీ.. చివరి ఓవర్‌ని అగ్రశ్రేణి ఫాస్ట్ బౌలర్ జోప్రా ఆర్చర్ వేసేందుకు రావడంతో బెంగళూరు శిబిరంలో కంగారు మొదలైంది. దానికి కారణం.. ఆ ఓవర్ తొలి బంతికి డివిలియర్స్ కాకుండా గుర్‌కీరత్‌ సింగ్ స్ట్రైకింగ్‌లో ఉండటమే. అప్పటికి 15 బంతులు ఎదుర్కొన్న గుర్‌కీరత్ చేసిన పరుగులు 16 మాత్రమే. ఇందులో చాలా బంతులు డాట్‌కాగా.. అతను కనీసం బంతుల్ని టచ్ కూడా చేయలేకపోయాడు. దాంతో.. డ్రెస్సింగ్ రూము వెలుపల కోహ్లీ.. డగౌట్‌లో కూర్చుని ఉన్న ఆటగాళ్లు, కోచింగ్ స్టాఫ్ టెన్షన్‌తో కనిపించారు. అయితే.. తొలి బంతికి డబుల్ తీసిన గుర్‌కీరత్.. రెండో బంతికి సింగిల్ తీసివ్వగా.. మూడో బంతికి డబుల్ తీసిన ఏబీడీ.. నాలుగో బంతిని సిక్సర్‌గా మలిచేసి బెంగళూరుని గెలిపించాడు.

చివరి ఓవర్‌లో బెంగళూరు టీమ్ డగౌట్, డ్రెస్సింగ్ రూము టెన్షన్ వాతావరణాన్ని అభిమానులకి చూపించేందుకు ఒక కెమెరాని బ్రాడ్‌కాస్టర్ అటు వైపు తిప్పగా.. డ్రెస్సింగ్ రూము డోర్ వద్ద నిల్చొని ఆ టీమ్ ఓపెనర్ అరోన్ ఫించ్ ఎలక్ట్రానిక్ సిగరెట్ తాగుతూ కనిపించాడు. ఫించ్ సిగరెట్ తాగే సమయంలో డ్రెసింగ్ రూము వెలుపల కెప్టెన్ విరాట్ కోహ్లీ కూడా ఉండటం గమనార్హం. దాంతో.. డ్రెస్సింగ్ రూములో సిగరెట్ తాగడానికి మేనేజ్‌మెంట్ ఎలా అనుమతించింది..? అంటూ అభిమానులు ప్రశ్నిస్తున్నారు. కోహ్లీ అక్కడే ఉండి.. చోద్యం చూస్తుండటంపై కూడా మొట్టికాయలు వేస్తున్నారు. ఈ మ్యాచ్‌లో అరోన్ ఫించ్ 11 బంతులు ఎదుర్కొని రెండు సిక్సర్ల సాయంతో 14 పరుగులు చేసి ఔటయ్యాడు.