IPL 2020 ఫైనల్లో రోహిత్ శర్మకి అజేయ రికార్డ్.. సెంటిమెంట్ కూడా

Share Icons:
ఐపీఎల్‌లో మరో టైటిల్‌పై ముంబయి ఇండియన్స్ కన్నేసింది. ఇప్పటికే 2009, 2013, 2015, 2017, 2019లో ఫైనల్‌కి చేరిన ముంబయి టీమ్ 2009లో మినహా అన్ని ఫైనల్లోనూ విజయాన్ని అందుకుని టైటిల్‌ని ముద్దాడింది. ఆ టీమ్ చివరిగా ఆడిన నాలుగు ఫైనల్లోనూ రోహిత్ శర్మ కెప్టెన్సీలోనే ఆడి గెలుపొందగా.. ఈరోజు రాత్రి ఢిల్లీ క్యాపిటల్స్‌పై తుది పోరులోనూ రోహిత్ శర్మ కెప్టెన్సీలోనే ముంబయి టీమ్ తలపడబోతోంది. మరో ఆసక్తికరమైన విషయం ఏంటంటే..? ఐపీఎల్ ఫైనల్లో ఆడే టీమ్‌లో రోహిత్ శర్మ ఉంటే ఆ టీమ్ టైటిల్ గెలుపొందడం సెంటిమెంట్‌గా కొనసాగుతోంది.

2009 ఐపీఎల్ ఫైనల్లో ఆడిన దక్కన్ ఛార్జర్స్ టీమ్‌లో రోహిత్ శర్మ ఉండగా.. ఆ ఏడాది ఆ టీమ్ టైటిల్ గెలిచిన విషయం తెలిసిందే. 2010లో ఫైనల్లో ఆడిన ముంబయి టీమ్‌లో రోహిత్ శర్మ లేడు. ఆ ఏడాది సచిన్ టెండూల్కర్ కెప్టెన్సీలో ముంబయి బరిలోకి దిగి చెన్నై చేతిలో 22 పరుగుల తేడాతో ఓడిపోయింది. ఆ తర్వాత దక్కన్ ఛార్జర్స్ నుంచి ముంబయి టీమ్‌లోకి ఎంట్రీ ఇచ్చిన రోహిత్ శర్మ.. కెప్టెన్‌గా మారి ఆ టీమ్‌కి నాలుగు టైటిల్స్‌ని అందించాడు.

13 ఏళ్ల ఐపీఎల్ చరిత్రలో అత్యధిక టైటిల్స్ గెలిచిన జట్ల జాబితాలో ముంబయి ఇండియన్స్ నాలుగు టైటిల్స్‌లో అగ్రస్థానంలో కొనసాగుతుండగా.. చెన్నై సూపర్ కింగ్స్ మూడు, కోల్‌కతా నైట్‌రైడర్స్ రెండు టైటిల్స్ గెలిచాయి. ఇక సన్‌రైజర్స్ హైదరాబాద్, దక్కన్ ఛార్జర్స్, రాజస్థాన్ రాయల్స్ ఒక్కోసారి టైటిల్ విజేతగా నిలిచాయి. ఇప్పటికే అత్యధిక టైటిల్స్ గెలిచిన కెప్టెన్‌గా రికార్డుల్లో కొనసాగుతున్న రోహిత్ శర్మ.. ఈరోజు మ్యాచ్‌లో ముంబయిని గెలిపిస్తే..? ఆ రికార్డ్ మరింత మెరుగవనుంది.