IPL 2020 తొలి మ్యాచ్‌లో ధోనీ వరల్డ్ రికార్డ్.. ముంబై చెత్త రికార్డ్

Share Icons:
ముంబై ఇండియన్స్‌తో జరిగిన తొలి మ్యాచ్‌లో ధోనీ సేన విజయం సాధించింది. రాయుడు, డుప్లెసిస్ రాణించడానికి తోడు.. ఆఖర్లో సామ్ కుర్రాన్ మెరుపులతో 163 పరుగుల లక్ష్యాన్ని సునాయాసంగా చేధించింది. ఈ మ్యాచ్‌లో రాయుడు-డుప్లెసిస్ 115 పరుగుల భాగస్వామ్యం నమోదు చేశారు. తద్వారా ఈ సీజన్లో సెంచరీ పార్టనర్‌‌షిప్ నమోదు చేసిన తొలి జోడీగా నిలిచారు. కెప్టెన్ కూల్ ధోనీ ఒక్క పరుగు కూడా చేయాల్సిన అవసరం లేకుండా చెన్నై గెలుపొందింది.

ముంబైపై విజయం ద్వారా గత సీజన్లో ఓటములకు చెన్నై ప్రతీకారం తీర్చుకుంది. చెన్నై సూపర్ కింగ్స్ కెప్టెన్‌గా ధోనీకి ఇది వందో విజయం కావడం విశేషం. ఐపీఎల్‌లో వంద విజయాలు అందుకున్న తొలి కెప్టెన్‌గా మహీ గతేడాదే రికార్డ్ క్రియేట్ చేశాడు. కానీ గతంలో పుణే జట్టు కెప్టెన్‌గానూ వ్యవహరించాడు. తాజాగా ముంబైపై విజయంతో ఒక్క చెన్నై జట్టుకే వంద విజయాలను అందించినట్లయ్యింది. ఐపీఎల్‌లో ధోనీ 175 మ్యాచ్‌ల్లో కెప్టెన్‌గా వ్యవహరించాడు. టీ20ల్లో 250 ఔట్లలో భాగం పంచుకున్న తొలి వికెట్‌ కీపర్‌గా మహీ రికార్డుల్లోకి ఎక్కాడు. 238 ఔట్లతో పాక్ వికెట్ కీపర్ కమ్రాన్ అక్మల్ రెండో స్థానంలో ఉన్నాడు.

ఈ మ్యాచ్‌లో రోహిత్ శర్మ వికెట్ తీసిన పియూష్ చావ్లా 151 వికెట్లతో.. ఐపీఎల్‌లో అత్యధిక వికెట్లు తీసిన బౌలర్ల జాబితాలో మూడో స్థానానికి చేరాడు. లసిత్ మలింగ 170 వికెట్లతో అగ్రస్థానంలో ఉండగా.. అమిత్ మిశ్రా (157) రెండోస్థానంలో ఉన్నారు. హర్భజన్‌ (150)ను చావ్లా వెనక్కి నెట్టాడు.

ముంబై ఇండియన్స్ జట్టు మరోసారి సీజన్‌ను ఓటమితో ప్రారంభించింది. 2013 నుంచి ముంబై జట్టు ప్రతి సీజన్లో ఐపీఎల్ తొలి మ్యాచ్‌లో ఓడుతోంది. 2014లో యూఏఈలో ఆడిన ఐదు మ్యాచ్‌ల్లో ఓడిన ముంబై ఇండియన్స్.. తాజా మ్యాచ్‌లో చెన్నై చేతిలో ఓడింది. దీంతో యూఏఈలో ఇప్పటి వరకూ ఆడిన అన్ని మ్యాచ్‌ల్లోనూ ఆ జట్టు ఓడినట్లయ్యింది.

ఈ ఐపీఎల్‌లో..
ఫస్ట్ బాల్: దీపక్ చాహర్
ఫస్ట్ బ్యాట్: రోహిత్ శర్మ
ఫస్ట్ ఫోర్: రోహిత్ శర్మ
ఫస్ట్ వైడ్: లుంగీ ఎంగీడి
ఫస్ట్ సిక్స్: సౌరభ్ తివారీ
ఫస్ట్ వికెట్: పియూష్ చావ్లా (రోహిత్ శర్మ)
ఫస్ట్ క్యాచ్: సామ్ కుర్రాన్
ఫస్ట్ ఎల్బీ: ట్రెంట్ బౌల్ట్ (వాట్సన్)
ఫస్ట్ డీఆర్ఎస్: చావ్లా/ధోనీ (ఫెయిల్)
ఫస్ట్ హాఫ్ సెంచరీ: అంబటి రాయుడు
ఫస్ట్ విన్: చెన్నై సూపర్ కింగ్స్
ఫస్ట్ మ్యాన్ ఆఫ్ ది మ్యాచ్: రాయుడు