IPL 2020: చెన్నై నిష్క్రమణకు కారణాలివే..! ధోనీసేన ఎందుకిలా..?

Share Icons:
ఐపీఎల్‌లో అత్యంత విజయవంతమైన జట్లలో ఒకటిగా పేరొందిన .. ఈ సీజన్లో ఆకట్టుకోలేకపోతోంది. ఇప్పటి వరకూ ఆడిన పది సీజన్లో మూడుసార్లు టైటిల్ గెలిచి.. ఐదుసార్లు రన్నరప్‌గా నిలిచిన ధోనీ సేన.. తొలిసారి ప్లేఆఫ్స్ చేరకుండానే లీగ్ నుంచి నిష్క్రమిస్తోంది. ఐపీఎల్‌లో తిరుగులేని జట్టుగా పేరొందిన యెల్లో ఆర్మీ.. ఈ సీజన్లో ఇంత దారుణమైన ఆటతీరు కనబర్చడానికి కారణమేంటి..? చెన్నై సూపర్ కింగ్స్‌ చేసిన తప్పిదాలేంటో ఓసారి చూద్దాం..

ఫస్ట్ దెబ్బ కరోనా..
ఐపీఎల్ 2020 కోసం యూఏఈలో అడుగుపెట్టిన తొలినాళ్లలోనే చెన్నై సూపర్ కింగ్స్‌కు షాక్ తగిలింది. పెద్ద సంఖ్యలో ఆటగాళ్లు, సహాయక సిబ్బంది కరోనా బారిన పడ్డారు. మిగతా ఏ ఫ్రాంచైజీల్లోనూ ఈ స్థాయిలో కరోనా కేసులు నమోదు కాలేదు. ఆటగాళ్లు కరోనా నుంచి కోలుకోక ముందే రైనా ఇండియాకు తిరిగి వచ్చేయడంతో చెన్నైకి కోలుకోలేని దెబ్బ తగిలింది. హర్భజన్ సింగ్ సైతం.. ఈ సీజన్లో తాను ఐపీఎల్ ఆడటం లేదని ప్రకటించాడు. భజ్జీ, ఇర్ఫాన్ పఠాన్ ట్వీట్లు ధోనీని టార్గెట్ చేసుకున్నట్లు ఉండటం గమనార్హం.

రెండో దెబ్బ రైనా..
వ్యక్తిగత కారణాలతో ఇండియా తిరిగొచ్చానని రైనా చెబుతున్నా.. అసలు కారణం ఫ్రాంచైజీలో అంతర్గత కలహాలు అనే భావన వ్యక్తమైంది. తర్వాత ఫ్రాంచైజీ ఓనర్‌ శ్రీనివాసన్ తన తండ్రి లాంటి వాడని రైనా చెప్పుకొచ్చినా.. సీఎస్‌కే మాత్రం మెత్తబడలేదు. తిరిగి జట్టులో చేరతానని రైనా సిగ్నల్స్ పంపినా.. యాజమాన్యం మాత్రం ససేమీరా ఒప్పుకోలేదు. పైగా.. వ్యక్తిగత కారణాలతో అతడే వెళ్లాడు కాబట్టి మేం వెనక్కి రమ్మని పిలవబోం అని ప్రకటించింది. రైనా వస్తానని సంకేతాలు పంపినా.. చెన్నై ఆసక్తి చూపకపోవడానికి కారణాలేంటో తెలీదు.

ఇక రైనా, హర్భజన్ స్థానంలో రీప్లేస్‌మెంట్ దిశగానూ చెన్నై సూపర్ కింగ్స్ ఆలోచన చేయలేదు. జట్టులో ఉన్న ఆటగాళ్లతో నెట్టకొచ్చే ప్రయత్నం చేశారు. గాయంతో రాయుడు కొన్ని మ్యాచ్‌లకు దూరమైనా.. బ్రావో ఆరంభ మ్యాచ్‌లు ఆడలేకపోయినా.. వరుస ఓటములు ఎదురవుతున్నా చెన్నై తీరు మారలేదు.

తాహిర్‌కు దొరకని ఛాన్స్
గత సీజన్లో అత్యధిక వికెట్లు తీసి పర్పుల్ క్యాప్ సొంతం చేసుకున్న ఇమ్రాన్ తాహిర్ లాంటి బౌలర్‌కు ముంబైతో మాత్రమే ఆడే అవకాశం చిక్కింది. తుది జట్టులో చోటు దక్కకపోవడంతో.. చివరకు అతడు ఆటగాళ్లకు డ్రింక్స్ బాటిళ్లను అందించాల్సి వచ్చింది. పియూష్ చావ్లా, కర్ణ్ శర్మ, హేజిల్‌‌వుడ్ లాంటి ఆటగాళ్లకు తుది జట్టులో చోటు కల్పించినా.. ఇద్దరు విదేశీ బ్యాట్స్‌మెన్, ఇద్దరు బౌలింగ్ ఆల్‌రౌండర్లనే వ్యూహానికి కట్టుబడి.. ముంబైతో మ్యాచ్ ముందు వరకూ తాహిర్‌కు చాన్స్ ఇవ్వలేదు.

ఎంగీడిపై వేటు‌‌
ఈ సీజన్లో చెన్నై సూపర్ కింగ్స్ తరఫున ఫాస్ట్ బౌలర్ లుంగీ ఎంగీడీ ఒకే మ్యాచ్ ఆడాడు. షార్జా లాంటి చిన్న గ్రౌండ్లో.. రాజస్థాన్ రాయల్స్‌పై ఆడిన ఎంగీడి.. 56 పరుగులిచ్చి ఒకే వికెట్ తీశాడు. ఈ సౌతాఫ్రికా బౌలర్ ధారాళంగా పరుగులిచ్చాడనేది నిజమే. కానీ ఆ మ్యాచ్‌లో రెండు జట్లూ 200కిపైగా రన్స్ చేశాయి. ఒక్క మ్యాచ్‌లో విఫలమైనందుకే అతణ్ని తిరిగి తుది జట్టులోకి తీసుకోలేదు.

జగదీషన్ స్పార్క్ కనపడలేదు కానీ..
లుంగీ ఎంగీడిది కాస్త నయం.. యువ బ్యాట్స్‌మెన్ జగదీషన్ పరిస్థితి ఇంకా దారుణం. ఆర్సీబీతో జరిగిన మ్యాచ్‌లో ఆడిన జగదీషన్.. 28 బంతుల్లో 33 పరుగులు చేసి రనౌటయ్యాడు. మిడిలార్డర్‌లో స్ట్రైక్ రోటేట్ చేయడంలో జగదీషన్ ఉపయోగపడతాడు. ఆడిన ఒక్క మ్యాచ్‌లో ఫర్వాలేదనిపించినా.. తర్వాతి మ్యాచ్‌ల్లో అతడికి చోటు దక్కలేదు. కానీ ఈ సీజన్లో 8 మ్యాచ్‌లు ఆడి 62 రన్స్ చేసిన కేదార్ జాదవ్‌కు మాత్రం పదే పదే అవకాశాలు ఇవ్వడం చెన్నై సూపర్ కింగ్స్‌కే చెల్లింది. ముంబైపై ఆడించినా అప్పటికే సమయం మించిపోయింది.

ఈ సీజన్లో ముంబైతో జరిగిన తొలి మ్యాచ్‌లో జాదవ్‌కు బ్యాటింగ్ చేసే అవకాశం రాలేదు. ఆ తర్వాత రెండు మ్యాచ్‌ల్లో 22, 26 చొప్పున రన్స్ చేసిన జాదవ్.. తర్వాత మూడు ఇన్నింగ్స్‌లో బ్యాటింగ్ చేస్తే మూడు సింగిల్ డిజిట్ స్కోర్లే.

కరన్‌తో అతి ప్రయోగాలు
సామ్ కరన్‌ను ఓపెనర్‌గా ప్రమోట్ చేసి.. బౌలర్‌గానూ వాడుతున్న చెన్నై.. వాట్సన్-డుప్లెసిస్ లాంటి విజయవంతమైన ఓపెనింగ్ జోడిని విడదీసింది. కరన్ ఓపెనర్‌గా ఆడుతున్నప్పటి నుంచి చెన్నై ఇంత వరకూ ఒక్క మ్యాచ్‌లోనూ మెరుగైన ఆరంభం ఇవ్వలేకపోయింది.

ముంబైతో మ్యాచ్‌కు ముందు.. జగదీషన్, తాహిర్, లుంగీ ఎంగిడీ లాంటి ఆటగాళ్లను ఆడించకపోవడమే కాదు.. రాజస్థాన్‌‌తో జరిగిన మ్యాచ్‌లో సామ్ కరన్‌తో ధోనీ ఒక్క ఓవర్ మాత్రమే బౌలింగ్ చేయించాడు. ఇద్దరు కుడిచేతి వాటం బ్యాట్స్‌మెన్ క్రీజులో కుదురుకుంటున్నప్పుడు.. ఎడమ చేతి వాటం బౌలర్ అయిన కరన్‌తో బౌలింగ్ చేయించకపోవడం అందర్నీ ఆశ్చర్యపరిచింది.

తుది జట్టు ఎంపికలో తికమక
అదనపు బౌలర్ అవసరమైన మ్యాచ్‌‌లో అదనపు బ్యాట్స్‌మెన్‌న జట్టులోకి తీసుకోవడం.. అదనపు బ్యాట్స్‌మెన్ అవసరమైన మ్యాచ్‌లో అదనపు బౌలర్‌ను జట్టులోకి తీసుకోవడం.. మిడిలార్డర్ వైఫల్యం.. ఆటగాళ్ల గాయాలు.. యాజమాన్యం అతి ధీమా.. ధోనీ ఇంతకు ముందులా చురుగ్గా వ్యవహరించలేకపోవడం.. ఇవన్నీ చెన్నైకి శాపంగా మారాయి. కర్ణుడికి చావుకి కారణాల్లా.. చెన్నై ఓటములకు కారణాలు అనేకం. అందులో చేజేతులా చేసుకున్నవే ఎక్కువ. వచ్చే సీజన్లో అయినా ఈ డాడీస్ ఆర్మీలో యువ ఆటగాళ్లకు చోటు దక్కుతుందని ఆశిద్దాం.