IPL 2020: కోహ్లి, ధోనీ, రోహిత్… కెప్టెన్ల వేతనాలు కళ్లు చెదిరేలా!

Share Icons:
క్రికెట్ అభిమానులంతా ఎప్పుడెప్పుడా అని ఎదురు చూస్తున్న ఐపీఎల్ మరి కొద్ది గంటల్లో ప్రారంభం కానుంది. డిఫెండింగ్ ఛాంపియన్ ముంబై ఇండియన్స్, మాజీ ఛాంపియన్ చెన్నై సూపర్ కింగ్స్ మధ్య తొలి మ్యాచ్ శనివారం రాత్రి జరగనుంది. యూఏఈలో ఎన్నో జాగ్రత్తల మధ్య ఐపీఎల్ మ్యాచ్‌లను నిర్వహించనున్నారు. గత ఆరు నెలలపాటు క్రికెట్‌కు దూరమైన భారత ఆటగాళ్లు.. ఐపీఎల్‌తో తిరిగి మైదానంలో అడుగుపెడుతున్నారు. ఐపీఎల్ 13వ సీజన్ ప్రారంభం అవుతున్న నేపథ్యంలో జట్లకు కెప్టెన్లుగా వ్యవహరిస్తోన్న క్రికెటర్ల వేతనాలు ఎలా ఉన్నాయో ఓసారి పరిశీలిద్దాం..

ఐపీఎల్ చరిత్రలో అత్యధిక మొత్తం పొందుతున్న ఆటగాడు విరాట్ కోహ్లి.. ఆర్సీబీ జట్టు కోహ్లికి రూ.17 కోట్లు చెల్లించి తమతో అంటిపెట్టుకుంది. అన్ని ఐపీఎల్ సీజన్లలోనూ ఆర్సీబీ తరఫున ఆడిన కోహ్లి.. ఆ జట్టుకు పూర్తి స్థాయి కెప్టెన్‌గా వ్యవహరించడం ఇది 8వసారి కావడం విశేషం. ఇప్పటి వరకూ రాయల్ ఛాలెంజర్స్ టైటిల్ మాత్రం గెలవలేకపోయింది.

ఐపీఎల్‌లో అత్యంత విజయవంతమైన సారథిగా రోహిత్ శర్మ గుర్తింపు తెచ్చుకుననాడు. అతడి నాయకత్వంలో ముంబై జట్టు నాలుగుసార్లు ట్రోఫీ గెలిచింది. ముంబై ఇండియన్స్ రూ.15 కోట్లు చెల్లించి రోహిత్‌ను రిటైన్ చేసుకుంది. 2011లో రోహిత్ ముంబై ఇండియన్స్ జట్టులో చేరాడు. కోహ్లితో సమానంగా పొందే అవకాశం ఉన్నప్పటికీ.. రోహిత్‌కు అది ఇష్టం లేదని సమాచారం.

ఐపీఎల్‌లో అత్యంత నిలకడగా జట్టును విజయపథంలో నిలిపిన కెప్టెన్ మహేంద్ర సింగ్ ధోనీ. మహీకి సీఎస్‌కే రూ.15 కోట్లు చెల్లిస్తోంది. ధోనీ నాయకత్వంలో చెన్నై జట్టు మూడుసార్లు ట్రోఫీ గెలవగా.. ఎనిమిది సార్లు ఫైనల్‌కు చేరింది.

2018లో ఢిల్లీ క్యాపిట్స్ రిటైన్ చేసుకున్న చివరి ఆటగాడు శ్రేయస్ అయ్యర్. రిషబ్ పంత్‌ను కెప్టెన్ చేస్తారనే అంచనాలను తలకిందులు చేస్తూ.. కెప్టెన్‌గా శ్రేయస్ అయ్యర్‌ను ఫ్రాంచైజీ ఎంపిక చేసింది. అయ్యర్‌కు ఢిల్లీ జట్టు రూ. 7 కోట్లు చెల్లిస్తోంది. 2012 తర్వాత తొలిసారి గత సీజన్లో ఢిల్లీ క్యాపిటల్స్ ఫ్లే ఆఫ్‌కు అర్హత సాధించింది.

ఆస్ట్రేలియా మాజీ కెప్టెన్ స్టీవ్ స్మిత్‌ను రాజస్థాన్ రాయల్స్ 2018లో రూ.12 కోట్లకు రిటైన్ చేసుకుంది. ఏడాది నిషేధం కారణంగా స్మిత్ ఐపీఎల్ ఆడలేకపోయాడు. 2019లో తిరిగి ఐపీఎల్‌లో అడుగుపెట్టిన స్మిత్… రహానే నుంచి కెప్టెన్సీ పగ్గాలు అందుకున్నాడు. ఈ సీజన్లో రాజస్థాన్ రాయల్స్ పూర్తి స్థాయి కెప్టెన్‌గా స్మిత్ వ్యవహరించనున్నాడు.

స్టార్ ప్లేయర్ డేవిడ్ వార్నర్‌కు సన్‌రైజర్స్ రూ.12 కోట్లు చెల్లిస్తోంది. 2019లో కేన్ విలియమ్సన్ కెప్టెన్సీలో ఆడిన వార్నర్.. ఈ సీజన్లో జట్టుకు నాయకత్వం వహించనున్నాడు. 2019లో 12 మ్యాచ్‌ల్లో 692 పరుగులు చేసిన వార్నర్ ఆరెంజ్ క్యాప్‌ను సొంతం చేసుకున్నాడు.

2018లో కేఎల్ రాహుల్‌ కోసం నాలుగు ఫ్రాంచైజీలు పోటీ పడ్డాయి. ఈ పోటీలో కింగ్స్ ఎలెవన్ పంజాబ్ రూ. 11 కోట్లకు రాహుల్‌ను కొనుగోలు చేసింది.

2018లో కోల్‌కతా నైట్ రైడర్స్ పగ్గాలను రాబిన్ ఉతప్ప చేపడతాడని అందరూ భావించారు. కానీ మేనేజ్‌మెంట్ అనూహ్యంగా దినేశ్ కార్తీక్‌ను కెప్టెన్‌గా ఎంపిక చేసింది. రాజస్థాన్ రాయల్స్, ముంబై ఇండియన్స్, చెన్నై సూపర్ కింగ్స్ ఫ్రాంచైజీలతో పోటీ పడిన కోల్‌కతా.. రూ. 7.4 కోట్లకు దినేశ్ కార్తీక్‌ను సొంతం చేసుకుంది.