IPL 2020: ఆయన సలహాతో బ్యాక్ టు బ్యాక్ సెంచరీలు.. సక్సెస్ సీక్రెట్ చెప్పిన ధావన్

Share Icons:
ఈ ఐపీఎల్ సీజన్ ఆరంభంలో అంతగా ఆకట్టుకోలేకపోయిన .. గత నాలుగు మ్యాచ్‌ల్లో అద్భుతంగా బ్యాటింగ్ చేశాడు. రెండు మ్యాచ్‌ల్లో 50 హాఫ్ సెంచరీలు, మరో రెండు మ్యాచ్‌ల్లో సెంచరీలు చేశాడు. అక్టోబర్ 17 ముందు వరకు ఐపీఎల్‌లో ఒక్కటంటే ఒక్క సెంచరీ కూడా చేయలేకపోయిన ధావన్.. ఆ తర్వాత ఐపీఎల్‌లో బ్యాక్ టు బ్యాక్ సెంచరీలు చేసిన తొలి ఆటగాడిగా నిలిచాడు. చివరి నాలుగు మ్యాచ్‌ల్లో మూడింట్లో అజేయంగా నిలిచి అందర్నీ ఆశ్చర్యపరిచాడు. ఓ ఎండ్‌‌లో వికెట్లు పడుతున్నా.. దూకుడుగా ఆడుతూ.. ధావన్ అజేయ శతకాలు బాదిన తీరు నిజంగా అద్భుతం.

ఈ సీజన్ తొలి మ్యాచ్‌లో పంజాబ్‌‌పై పేలవ రీతిలో డకౌట్ అయిన ధావన్.. తర్వాతి మ్యాచ్‌ల్లో 35, 34, 26, 32, 5 చొప్పున రన్స్ చేశాడు. కుదురుకోవడానికి ఇబ్బంది పడటమే కాదు.. స్ట్రైక్ రేట్ కూడా తక్కువగానే నమోదు చేశాడు. దీంతో ధావన్ స్థానంలో రహానేను ఆడించాలని కూడా సలహాలొచ్చాయి. కానీ గత నాలుగు మ్యాచ్‌ల్లో అసలైన ధావన్ బయటకొచ్చాడు.

నెల రోజుల క్రితం చూసిన ధావన్‌కు.. ఇప్పటి ధావన్‌కు ఎంత తేడా అని ఆశ్చర్యపోయేలా ఈ ఓపెనర్ ప్రదర్శన ఉంది. ఆరంభంలో తడబడిన తాను.. ఢిల్లీ క్యాపిటల్స్ హెడ్ కోచ్ రిక్కీ పాంటింగ్‌తో మాట్లాడటం ఉపకరించిందని శిఖర్ తెలిపాడు. ‘నువ్వు బ్యాటింగ్ బాగా చేస్తున్నావ్ అని రిక్కీ భాయ్ చెప్పాడు. నేను కొంచెం వేగంగా ఆడాలని నాకు తెలుసు. ఈ విషయంపైనా రిక్కీతో మాట్లాడాను. నేను ఆరంభంలో చేసింది 20, 30 పరుగులే అయినప్పటికీ.. అవెంతో ముఖ్యమైనవి కావడంతో నేను సంతోషంగానే ఉన్నాను’ అని ధావన్ తెలిపాడు.

‘‘టీ20ల్లో 30 పరుగులే ముఖ్యమైనవి. నేను ఓపెనర్‌ పాత్ర పోషిస్తున్నానని భావించాను. ఒక్కసారి హాఫ్ సెంచరీలు చేయడం మొదలుపెట్టాక.. నాలో ఆత్మవిశ్వాసం పెరిగింది. దేవుడి దయ వల్ల సెంచరీలు చేయగలిగాను’’ అని ధావన్ తెలిపాడు.

‘‘సెంచరీలు చేయడం గురించి ఆలోచిస్తే.. నాపై భారం పడుతుంది. బరిలో దిగడం.. అత్యుత్తమంగా ఆడటం అనేదే నా ఐడియా. నేను అత్యుత్తమ ఆటతీరు కనబరిస్తే.. మిగతావి వాటంతట అవే వస్తాయి. దీని వల్ల మానసికంగా ఇబ్బంది ఎదురవదు’’ అని ధావన్ ప్రశ్నించాడు.

‘‘ఆరంభ మ్యాచ్‌ల్లో నేను హాఫ్ సెంచరీలు చేయలేదు. ఈ సీజన్లో 500కిపైగా రన్స్ చేయడం కష్టమేమో అనిపించింది. కానీ గత కొన్ని సీజన్లలో నేను 500కిపైగా రన్స్ చేశాను. దీంతో ఒత్తిడికి గురయ్యే బదులు.. సానుకూలంగా తీసుకున్నాను. 500కిపైగా రన్స్ చేస్తే మంచిదే.. లేకపోతే లేదు. ఈ సీజన్లో నా జట్టు కోసం అత్యుత్తమ ప్రదర్శన చేయడానికి నేను ప్రయత్నిస్తా’’నని ధావన్ తెలిపాడు. దేన్నయినా తేలికగా తీసుకోవడం.. క్రమశిక్షణతో ఉండాలనేదే నా ఆలోచన. సింపుల్ అనేది అంత సింపుల్ ఏం కాదు. దీనికి మానసికంగా ఎంతో బలంగా ఉండాలని ధావన్ తెలిపాడు.