IND vs SA టెస్టు, వన్డే మ్యాచ్‌ ఫిక్సింగ్.. ఢిల్లీ పోలీస్ ఛార్జ్‌షీట్

Share Icons:
భారత్, దక్షిణాఫ్రికా మధ్య 2000లో జరిగిన సుదీర్ఘ సిరీస్‌‌లో ఓ రెండు మ్యాచ్‌ల్లో బుకీలు ఫిక్సింగ్‌కి పాల్పడినట్లు తాజాగా ఢిల్లీ పోలీసులు ఛార్జ్‌షీట్‌లో పేర్కొన్నారు. ఈ ఫిక్సింగ్‌లో అప్పటి దక్షిణాఫ్రికా కెప్టెన్ హాన్సీ క్రానే ప్రధాన పాత్ర పోషించగా.. బుకీ సంజీవ్ చావ్లాపై ఇప్పటికీ విచారణ కొనసాగుతోంది. ఇటీవల సంజీవ్ చావ్లా‌కి బెయిల్ లభించడంతో ఢిల్లీ కోర్టు అతని వాయిస్ శాంపిల్స్, చేతిరాతని విచారణ అధికారులకి అందజేయాలని ఆదేశించింది. చావ్లాకి బెయిల్ లభించడంపై ఢిల్లీ పోలీసులు సుప్రీంకోర్టుని ఆశ్రయించగా.. విచారణ జూన్‌కి వాయిదాపడింది. దాంతో.. మరోసారి ఈ ఫిక్సింగ్‌ తెరపైకి వచ్చింది.

Read More:

ఢిల్లీ పోలీసులు అప్పటి ఫిక్సింగ్ కుంభకోణంలో భాగస్వామ్యులుగా ఉన్నవారందరిపైనా ఛార్జ్‌షీట్ దాఖలు చేశారు. అందులో.. అప్పుడు ఫిక్సింగ్ జరిగిన తీరు గురించి సవివరంగా పోలీసులు పొందుపరిచారు. ముంబయి వేదికగా భారత్, దక్షిణాఫ్రికా మధ్య జరిగిన తొలి టెస్టుతో పాటు కోచిలో జరిగిన తొలి వన్డే కూడా ఫిక్స్ అయినట్లు అందులో రాసుకొచ్చిన పోలీసులు.. మెయిన్ ఫిక్సర్ చావ్లా సూచించిన విధంగా దక్షిణాఫ్రికా టీమ్ స్కోరు 250కి లోపే ఉండేలా క్రానే పావులు కదిపినట్లు వెల్లడించారు. రెండు మ్యాచ్‌లను ఫిక్స్ చేసిన బుకీలు.. మరో మూడు మ్యాచ్‌ల్లో టీమ్ తుది జట్టు సమాచారాన్ని క్రానే నుంచి సేకరించినట్లు అందులో పేర్కొన్నారు. అప్పట్లో ఫిక్సింగ్ నేరాన్ని ఒప్పుకున్న క్రానే‌పై నిషేధం వేటు పడగా.. ఆ తర్వాత విమాన ప్రమాదంలో అతను దుర్మరణంపాలయ్యాడు.

Read More:

‘‘ముంబయిలో జరిగిన ఆ టెస్టు మ్యాచ్‌ ఆరంభానికి ముందు అప్పటి దక్షిణాఫ్రికా కెప్టెన్ క్రానేతో బుకీ సంజీవ్ చావ్లా ఓ ఒప్పందం చేసుకున్నాడు. అది ఏంటంటే..? దక్షిణాఫ్రికా టీమ్ రెండు ఇన్నింగ్స్‌ల్లోనూ స్కోరు 250కి దాటకూడదని. బుకీలు చెప్పినట్లుగానే సఫారీ జట్టు రెండు ఇన్నింగ్స్‌ల్లోనూ వరుసగా 176, 164 పరుగులు చేసింది. ఆ తర్వాత కోచి వేదికగా జరిగిన తొలి వన్డే సమయంలోనూ క్రానేతో బుకీలు సంప్రదింపులు జరిపారు’’ అని ఢిల్లీ పోలీసులు ఛార్జ్‌షీట్‌లో పేర్కొన్నారు.

ముంబయి వేదికగా జరిగిన ఆ టెస్టు మ్యాచ్‌లో మొదట బ్యాటింగ్ చేసిన భారత్ 225 పరుగులు చేయగా.. దక్షిణాఫ్రికా ఫస్ట్ ఇన్నింగ్స్‌లో 176 పరుగులకి ఆలౌటైంది. దాంతో.. 49 పరుగుల ఆధిక్యాన్ని అందుకున్న టీమిండియా.. రెండో ఇన్నింగ్స్‌లో అనూహ్యంగా 113 పరుగులకే ఆలౌటవగా.. 163 పరుగుల టార్గెట్ సఫారీల ముందు నిలిచింది. అనంతరం లక్ష్యాన్ని 164/6తో దక్షిణాఫ్రికా ఛేదించింది.