IND vs AUS 3RD ODI: సిరీస్ భారత్‌దే.. 7 వికెట్లతో విజయం

Share Icons:
ఆస్ట్రేలియాతో జరిగిన మూడు వన్డేల సిరీస్‌ను భారత్ కైవసం చేసుకుంది. బెంగళూరులో ఆదివారం జరిగిన నిర్ణయాత్మక మూడో వన్డేలో భారత్ 7 వికెట్లతో విజయం సాధించింది. దీంతో సిరీస్‌ను 2-1తో ఇండియా కైవసం చేసుకుంది. ఈక్రమంలో గతేడాది సొంతగడ్డపై తమను 3-2తో ఓడించిన కంగారూలకు దీటైన బదులిచ్చింది. ఈ సిరీస్‌లో ముంబైలో జరిగిన తొలి వన్డేలో ఆసీస్ గెలవగా.. రాజ్‌కోట్‌లో జరిగిన రెండో వన్డేలో ఇండియా నెగ్గింది. రోహిత్‌కు ‘మ్యాన్ ఆఫ్ ది మ్యాచ్’, విరాట్ కోహ్లీకి ‘ మ్యాన్ ఆఫ్ ది సిరీస్’ అవార్డులు దక్కాయి.

అంతకుముందు టాస్ నెగ్గి తొలుత బ్యాటింగ్ చేసిన ఆసీస్ నిర్ణీత 50 ఓవర్లలో 9 వికెట్లకు 286 పరుగులు చేసింది. మాజీ కెప్టెన్ స్టీవ్ స్మిత్ (131 ; 132 బంతులు, 14 ఫోర్లు, 1 సిక్స్) టాప్ స్కోరర్‌గా నిలిచాడు. మార్నస్ లబుషేన్ (54) ఫిఫ్టీతో ఆకట్టుకున్నాడు. భారత బౌలర్లలో షమీ (4/63) సత్తాచాటాడు. రవీంద్ర జడేజా (2/44) ఆకట్టుకున్నాడు. నవదీప్ సైనీ, కుల్దీప్ యాదవ్‌కు చెరో వికెట్ దక్కింది.

Read Also :
ఓ మాదిరి టార్గెట్‌తో బరిలోకి దిగిన భారత్‌ 47.3 ఓవర్లలో మూడు వికెట్లకు 289 పరుగులు చేసి విజయం సాధించింది. ఛేదనలో భారత్‌కు ఓపెనర్లు శుభారంభం అందించారు. ముఖ్యంగా రోహిత్ శర్మ (119 ; 128 బంతుల్లో 8 ఫోర్లు, 6 సిక్సర్లు) ఈ ఏడాది తొలి సెంచరీ సాధించాడు. మరో ఓపెనర్‌ లోకేశ్ రాహుల్ (19)తో కలిసి 69 పరుగులు జోడించి గట్టి పునాది వేశాడు. రాహుల్ ఔటైన తర్వాత విరాట్ కోహ్లీ (89; 91 బంతుల్లో 8 ఫోర్లు)-రోహిత్ ద్వయం కంగారూ బౌలర్లను అలవోకగా ఎదుర్కొంది. వీరిద్దరూ రెండో వికెట్‌కు 137 పరుగులు జోడించి మ్యాచ్‌ను భారత్ వశం చేశారు. సెంచరీ పూర్తయ్యాక భారీ షాట్‌కు ఔటై ప్రయత్నించి రోహిత్ పెవిలియన్‌కు చేరాడు. ఈదశలో శ్రేయస్ అయ్యర్ (44 నాటౌట్ ; 35 బంతుల్లో, 6 ఫోర్లు, 1 సిక్స్)తో కలిసి కోహ్లీ జట్టును దాదాపు విజయం ముంగిటకు చేర్చాడు. వీరిద్దరూ 68 పరుగులు జోడించడంతో ఛేదన మరింత సులువైంది. చివర్లో కోహ్లీ ఔటైనా.. మనీశ్ పాండే (8 నాటౌట్)తో కలిసి శ్రేయస్ లాంఛనం పూర్తి చేశాడు. ఆసీస్ బౌలర్లలో జోష్ హేజిల్‌వుడ్, అగర్, జంపాలకు తలో వికెట్ దక్కింది. ఈమ్యాచ్‌లో రోహిత్ 9వేల పరుగును మార్కును దాటిన మూడో వేగవంతమైన క్రికెటర్‌గా నిలిచాడు. అలాగే 5వేల పరుగులను అత్యంత వేగంగా పూర్తి చేసిన కెప్టెన్‌గా కోహ్లీ వరల్డ్ రికార్డు నెలకొల్పాడు

Read Also :