ఇదో ఛార్మి సినిమా కథ….

Share Icons:

అనంతపురం, ఆగస్టు 29,

కాలేజీకని బయలుదేరి వెళ్లిన ఆ అమ్మాయి సాయంత్రం కాస్త ఆలస్యంగా ఇల్లు చేరుకుంది. అప్పటికే ఆమె తండ్రి సెల్‌ఫోన్‌కు ఆమె కాలేజీకి రాలేదంటూ సందేశం వచ్చింది.  ఆ తండ్రి వచ్చీరాగానే కూతుర్ని  నిలదీయడంతో.. బోటనీ లెక్చరర్ తనకు మాయమాటలు చెప్పి నిర్జన ప్రదేశానికి తీసుకెళ్లి అసభ్యకరంగా ప్రవర్తించాడని చెప్పి బోరుమంది. తన కాళ్లు, చేతులు కట్టేసి ఓ చోట వదిలిపెట్టగా స్థానికుల సాయంతో విడిపించుకొని వచ్చినట్లు తెలిపింది. ఆగ్రహంతో ఊగిపోయిన ఆ తండ్రి స్థానికులు, కొంత మంది బంధువులను వెంటబెట్టుకు వెళ్లి ఆ లెక్చరర్‌ను చితకబాది పోలీసులకు అప్పగించాడు.

అయితే, పోలీసుల విచారణలో ఆ రోజు ఆ లెక్చరర్.. కాలేజీ విడిచి ఎక్కడికి వెళ్లలేదని తేలింది. కానీ, ఈలోపే ఆయనకు తీరని అవమానం జరిగింది. అమ్మాయిని అదుపులోకి తీసుకొని విచారించగా అసలు విషయం బయటపడింది. అనంతరం సదరు లెక్చరర్‌కు సారీ చెప్పడానికి వెళ్లిన ఆ అమ్మాయి తండ్రికి ఊహించని ట్విస్ట్ ఎదురైంది. చార్మి కథానాయికగా వచ్చిన ‘అనుకోకుండా ఒక రోజు’ సినిమా కథను తలపిస్తున్న ఈ ఉదంతం అనంతపురం జిల్లా కదిరిలో జరిగింది.

తమ అమ్మాయిపై అఘాయిత్యం చేశాడని కదిరి పట్టణానికి చెందిన ఓ వ్యక్తి సోమవారం బంధుమిత్రులతో కలిసి లెక్చరర్‌ రమేశ్‌పై దాడి చేశాడు. ఎస్టీ వర్గానికి చెందిన ఆ అధ్యాపకుడి దుస్తులు విప్పదీసి, చెట్టుకు కట్టేసి తీవ్రంగా కొట్టారు. అనంతరం కదిరి పోలీసులకు అప్పగించారు. తాను ఎలాంటి తప్పూ చేయలేదని, కాలేజీలో విచారించాలని లెక్చరర్ రమేశ్ పోలీసులను వేడుకున్నారు. దీంతో పోలీసులు కళాశాలకు వెళ్లి విచారించగా.. ఘటన జరిగిన రోజు ఆయన కాలేజీలోనే ఉన్నట్లు సహచర అధ్యాపకులు, విద్యార్థులు తెలిపారు. కాలేజీలో అమర్చిన సీసీటీవీ కెమెరాల ఫుటేజీలను పరిశీలించగా.. ఆయన ఆ రోజు కళాశాల సమయం ముగిసేవరకూ అక్కడే ఉన్నట్లు తేలింది.

దీంతో ఆరోపణలు చేసిన అమ్మాయిని అదుపులోకి తీసుకొని విచారించగా తన బాయ్‌ఫ్రెండ్‌తో కలిసి బయటకు వెళ్లినట్టు చెప్పింది. సదరు అధ్యాపకుడికి కూడా నచ్చజెప్పి పంపించారు. కూతురు చేసిన తప్పు కారణంగా విలువలతో కూడిన వ్యక్తిత్వం ఉన్న ఓ అధ్యాపకుడికి తీరని అవమానం జరగడంతో ఆ కన్నతండ్రి కుమిలిపోయాడు. లెక్చరర్ రమేశ్‌ను వ్యక్తిగతంగా కలిసి క్షమాపణ కోరాలని భావించాడు. ఇందు కోసం మంగళవారం ఉదయం ఆయన నేరుగా కాలేజీకి వెళ్లగా.. విద్యార్థులు, ఫ్యాకల్టీ సిబ్బంది ఆగ్రహం కట్టలు తెంచుకుంది. ఎలాంటి మచ్చ లేని తమ మాష్టారును తీవ్రంగా కొట్టారని వారంతా కలిసి ఆయణ్ని కాలేజీ గదిలో బంధించారు. సమాచారం అందుకున్న పోలీసులు కాలేజీ వద్దకు వచ్చి ఇరువర్గాలకు నచ్చజెప్పారు. ఆ తండ్రిని విడిపించి ఇంటికి తిరిగి పంపించారు. బాలిక భవిష్యత్తును దృష్టిలో ఉంచుకొని ఎలాంటి కేసులు పెట్టలేదని కదిరి అర్బన్ ఎస్సై గోరంట్ల మాధవ్ తెలిపారు. ఇదండి సినేమాలు చేస్తున్న పని.

 

మామాట:  సినిమాలు సరదాగా చూడండి… అనుసరించవద్దండి

Leave a Reply