G20 Virtual Summit: ప్రపంచీకరణ విఫలం.. ఆర్థిక లక్ష్యాలు కాదు మానవాళి ముఖ్యం: మోదీ

Share Icons:
కరోనా మహమ్మారి ప్రపంచ దేశాలను బెంబేలెత్తిస్తోన్న వేళ.. జీ20 దేశాల అధినేతలు వీడియో కాన్ఫరెన్స్‌లో ద్వారా చర్చలు జరిపారు. కోవిడ్-19ను అరికట్టేందుకు చర్యలు తీసుకోవాలని ఈ సందర్భంగా సభ్యదేశాలు తీర్మానించాయి. ఆర్థిక వ్యవస్థను కోవిడ్ అతలాకుతలం చేస్తుండటంతో.. రూ.5 లక్షల కోట్ల డాలర్లను ప్రపంచ ఆర్థిక వ్యవస్థలోకి పంప్ చేయాలని నిర్ణయించాయి. కరోనాపై పోరాటానికి ప్రపంచ దేశాలు యుద్ధం ప్రకటించాలని చైనా అధ్యక్షుడు జిన్‌పింగ్ పిలుపునిచ్చారు. ప్రపంచం ఆర్థిక మాంద్యంలోకి మళ్లకుండా చూడటం కోసం టారిఫ్‌లు తగ్గించాలని, వాణిజ్య ఆంక్షలను తొలగించాలని జిన్‌పింగ్ సభ్య దేశాలకు పిలుపునిచ్చారు. వైరస్‌కు సరిహద్దులు లేవన్న ఆయన.. మనంతా ఉమ్మడి శత్రువుతో పోరాడుతున్నామన్నారు.

జీ20 వర్చువల్ సమ్మిట్‌లో ప్రసంగించిన ప్రధాని మోదీ.. కరోనా కేసుల్లో 90 శాతం, మరణాల్లో 88 శాతం జీ20 సభ్యదేశాల్లో నమోదు అవుతున్నాయని తెలిపారు. ప్రపంచ జీడీపీలో 80 శాతం, జనాభాలో 60 శాతం ఈ దేశాలదేనన్నారు. కరోనా కట్టడి కోసం సభ్య దేశాలు కార్యచరణ రూపొందించాలన్నారు. మనం ఆర్థిక లక్ష్యాలపై కాకుండా మనుషులపై దృష్టి కేంద్రీకరించాలని ప్రధాని మోదీ సభ్య దేశాలకు పిలుపునిచ్చారు.

ఉగ్రవాదంపై పోరాటం కావచ్చు, వాతావరణ మార్పుల విషయం కావచ్చు.. అనేక అంశాల్లో గ్లోబలైజేషన్ విఫలమైందన్న మోదీ.. సమస్త మానవాళి శ్రేయస్సుకు ప్రాధాన్యం ఇచ్చేలా నూతన ప్రపంచీకరణ అవసరమన్నారు. ఈ అసాధారణ జీ20 సదస్సుకు పిలుపునిచ్చిన సౌదీ రాజు ధన్యవాదాలు తెలిపారు. ప్రస్తుతం జీ20 కూటమికి సౌదీ అధ్యక్షత వహిస్తోంది.

అంతర్జాతీయ సహకారం, ఆర్థిక స్థిరత్వం కోసం జీ-20 కూటమిని 1999లో ఏర్పాటు చేశారు. ఇందులో యూరోపియన్ యూనియన్‌తోపాటు 19 దేశాలకు సభ్యత్వం ఉంది. భారత్‌తోపాటు ఆస్ట్రేలియా, కెనడా, సౌదీ అరేబియా, అమెరికా, రష్యా, దక్షిణాఫ్రికా, టర్కీ, అర్జెంటీనా, బ్రెజిల్, మెక్సికో, ఫ్రాన్స్, జర్మనీ, ఇటలీ, యూకే, చైనా, జపాన్ ఇండోనేసియా, జపాన్, దక్షిణ కొరియా దేశాలకు ఇందులో సభ్యత్వం ఉంది. ఏడాదికో దేశం ఈ గ్రూప్‌కు అధ్యక్షత వహిస్తుంది.