CSK టీమ్‌లో హిట్టర్‌ని రెడీ చేస్తున్న ధోనీ.. ప్రతి బంతీ సిక్స్

Share Icons:
కెప్టెన్‌గా టీమ్‌లోని సహచరుల నుంచి అత్యుత్తమ ప్రదర్శన రాబట్టడంలో మహేంద్రసింగ్ ధోనీ సిద్ధహస్తుడు. ఎవరికి ఏ బాధ్యతలు అప్పగించాలి..? ఎవరిని ఏ స్థానంలో బ్యాటింగ్‌కి పంపాలి..? అనేదానిపై ధోనీ ఫుల్ క్లారిటీతో ఉంటాడు. ఇక బంతి బంతికీ ఉత్కంఠ రేపే ఐపీఎల్‌లో ధోనీ వ్యూహాలు ఎవరికీ అంతుచిక్కవు.

చెన్నై సూపర్ కింగ్స్ టీమ్‌కి కెప్టెన్సీ వహిస్తున్న ధోనీ.. జట్టులో ఓ ఫించ్ హిట్టర్‌ని తయారు చేస్తున్నట్లు తాజాగా వెలుగులోకి వచ్చింది. ఏ స్థానంలో బ్యాటింగ్‌కి పంపినా..? క్రీజులోకి వచ్చినప్పటి నుంచి వికెట్ గురించి ఆలోచించకుండా ప్రతి బంతినీ హిట్టింగ్ చేయడమే అతని పని. కోల్‌కతా నైట్‌రైడర్స్ జట్టులో సునీల్ నరైన్‌ ఆ పాత్రని చక్కగా పోషిస్తుండగా.. చెన్నై జట్టులో మాత్రం అలాంటి హిట్టర్ ఎవరూ లేరు. దాంతో.. ధోనీ.. పీయూస్ చావ్లాకి ఐపీఎల్ 2020 సీజన్‌లో ఆ బాధ్యతని అప్పగించబోతున్నట్లు తెలుస్తోంది.

షెడ్యూల్ ప్రకారం మార్చి 29 నుంచి ఐపీఎల్ ప్రారంభంకావాల్సి ఉండగా.. కరోనా వైరస్ కారణంగా ఈ టోర్నీని బీసీసీఐ నిరవధికంగా వాయిదా వేసింది. అయితే.. ఈ వాయిదాకి ముందు చెన్నైలోని చెపాక్ స్టేడియంలో ధోనీ, సురేశ్ రైనా, తదితరులు ఓ రెండు వారాల పాటు ఐపీఎల్ కోసం ప్రాక్టీస్ చేశారు. ఆ సమయంలో ధోనీ.. చావ్లాకి ‘బంతిని డిఫెన్స్ చేయకుండా.. ప్రతి బంతినీ సిక్సర్ బాదాలి’ అనే టాస్క్ ఇచ్చాడు. దాంతో.. నెట్స్‌లో చావ్లా హిట్టింగ్ చేసిన వీడియోని చెన్నై సూపర్ కింగ్స్ ఫ్రాంఛైజీ తాజాగా అభిమానులతో పంచుకుంది. ఐపీఎల్ 2020 సీజన్ కోసం వేలంలో రూ. 6.75 కోట్లతో చావ్లాని చెన్నై ఫ్రాంఛైజీ కొనుగోలు చేసింది.