సైకిల్ యాత్రవెళదామా!

Share Icons:

అరకు,జూలై 29,  ట్రావెలింగ్ మనసుకు ఎంతో ఆనందాన్ని, ఉత్సాహాన్ని అందిస్తుంది. అందమైన కొండ కోనలూ చూసినప్పుడు అక్కడే ఉండి, తనివితీరా ఆస్వాదించాలనిపిస్తుంది. అయితే, మోటారు వాహనాల్లో విహరించడం కంటే.. సైకిలింగ్ చేస్తూ పర్యటిస్తే మనసుకు ఆహ్లాదమే కాదు, శరీరానికి తగిన ఆరోగ్యం కూడా లభిస్తుంది.


నిత్యం సైకిలింగ్ చేయడం ఆరోగ్యానికి మంచిది. అందుకే చాలామంది బైక్ ట్రిప్ తరహాలో సైకిల్ ట్రిప్‌లనూ ఇష్టపడతారు. ఫిట్‌నెస్ కోసం సుదీర్ఘంగా సైకిలింగ్ చేస్తారు. మీకూ ఇదే ఆలోచన ఉంటే.. ఇండియాలోని ఈ అద్భుతమైన ప్రాంతాల్లో హాయిగా సాగిపోవచ్చు.

చెన్నై – పుదుచ్ఛెరీ: నీలి సంద్రం హోరు, హత్తుకునే చల్లగాలి మధ్య సైకిలింగ్ చేయడం సరికొత్త అనుభూతి ఇస్తుంది. తమిళనాడులోని చెన్నై నుంచి పుదుచ్ఛెరీ బీచ్ రోడ్ మీదుగా సైకిలింగ్ చేస్తున్నప్పుడు ఎన్నో ప్రకృతి అందాలు ఆప్యాయంగా పలకరిస్తాయి. పచ్చిక బయళ్లు, ఆలయాల మీదుగా సాగే ఈ ప్రయాణాన్ని ఎప్పటికీ మరిచిపోలేరు.

విశాఖటప్నం – భీమిలి: ప్రకృతి అందాలతో పర్యాటకులను ఆకట్టుకునే వైజాగ్‌.. సైకిలింగ్‌కు కూడా ఎంతో అనుకూలంగా ఉంటుంది. ముఖ్యంగా ఆర్కేబీచ్ రోడ్ నుంచి భీమిలి బీచ్ రోడ్డు మీదుగా ప్రయాణం ఎంతో ఆహ్లదకరంగా ఉంటుంది. మార్గమధ్యలో కైలాసగిరి, తొట్లకొండ, బావికొండ, ఎర్రమట్టి దిబ్బల అందాలను చూస్తూ ప్రయాణం సాగించవచ్చు. తొడ్లకొండ ఎదురుగా ఉన్న సముద్ర తీరంలో ప్రకృతిసిద్ధంగా ఏర్పడిన శిలాతోరణం (ఆర్చ్), రాతి నేలను చూడటం అస్సలు మరవద్దు.

ముంబయి – డామన్: సుదీర్ఘ సైకిలింగ్ చేయాలంటే.. ముంబయి నుంచి డామన్‌కు వెళ్లండి. ముంబయికి ఉత్తరంలో సుమారు 170 కిమీల దూరంలో ఉన్న డామన్‌ వెళ్లే మార్గంలో ప్రకృతి అందాలు మెస్మరైజ్ చేస్తాయి. పర్వతాలు, జలపాతాలు.. అలసటను దూరం చేస్తాయి. దేవకా బీచ్, బామ్ జీసస్ చర్చ్, మోతీ దామన్ కోట తదితర ప్రాంతాలు ఆకట్టుకుంటాయి.

మంగళూరు – గోవా: 17వ నెంబరు జాతీయ రహదారి ద్వారా మంగళూరు నుంచి గోవాకు చేరుకోవచ్చు. మార్గ మధ్యలో బగా, కలంగుటే, సెయింట్ మేరీ ఐలాండ్, ఆలయాల నగరం గోకర్ణ, దూద్ సాగర్ జలపాతాలను చూస్తూ సైకిలింగ్ చేయొచ్చు. 

ఉదయ్‌పూర్ – జోద్‌పూర్: సరస్సుల నగరం ఉదయ్‌పూర్ నుంచి జోద్‌పూర్‌కు సైకిలింగ్ సరికొత్తగా ఉంటుంది. హల్దీఘాటీ, రంక్పూర్, దిల్వార్ ఆలయాలు, ‘ఓమ్’ బుల్లెట్ బాబా ఆలయాలను సందర్శిస్తూ సైకిలింగ్ పూర్తి చేయొచ్చు.

మనాలి – లేహ్: అడ్వేంచర్లు ఇష్డపడేవారికి ఈ మార్గం తప్పకుండా నచ్చుతుంది. రోడ్ ట్రిప్‌లకే కాదు, సైకిలింగ్‌కూ ఈ ప్రాంతం అనుకూలంగా ఉంటుంది. మంచుతో కప్పబడి ఉండే రొహతంగ్ పాస్, తంగ్లాంగ్ లా పాస్‌ల మీదుగా ప్రయాణం.. మీకు సరికొత్త లోకాన్ని పరిచయం చేస్తుంది. అయితే, పర్వతాలు మీదుగా సైకిలింగ్ చేయాలంటే తప్పకుండా ఫిట్‌గా ఉండాలి. ప్రతికూల వాతావరణాన్ని సైతం తట్టుకునే సామర్థ్యం ఉండాలి.

మామాట: కొండదారుల్లో సైకిల్ తొక్కడం ఎంతో మంచిది 

Leave a Reply