Ambati Rayudu: అదరగొట్టిన అంబటి రాయుడు.. ఎమ్మెస్కేపై ఓ రేంజ్‌లో ‘3-డీ’ ట్రోలింగ్

Share Icons:
ఐపీఎల్ తొలి మ్యాచ్‌లో చెన్నై సూపర్ కింగ్స్ అదరగొట్టింది. గత సీజన్లో ముంబై చేతిలో ఓటములకు ప్రతీకారం తీర్చుకుంది. టాస్ గెలవగానే ధోనీ ఎలాంటి సంకోచం లేకుండా ఫీల్డింగ్ ఎంచుకున్నాడు. రోహిత్ శర్మ-డికాక్ మెరుగ్గానే ఆరంభించినప్పటికీ.. ఈ జోడి ఎక్కువ సేపు క్రీజులో నిలవలేకపోయింది. చివర్లో వేగంగా వికెట్లు కోల్పోవడంతో ముంబై ఇండియన్స్ 9 వికెట్ల నష్టానికి 162 పరుగులకే పరిమితమైంది. తర్వాత బ్యాటింగ్ ప్రారంభించిన చెన్నై వరుస ఓవర్లలో వాట్సన్, మురళీ విజయ్ వికెట్లను చేజార్చుకుంది.

ఈ స్థితిలో మరో వికెట్ పడితే చెన్నై మీద ఒత్తిడి పెరిగేది. కానీ , డుప్లెసిస్ జోడి ఆచితూచి ఆడుతూ వికెట్ పడకుండా జాగ్రత్త పడ్డారు. క్రీజ్‌లో కాస్త కుదురుకోగానే రాయుడు చెలరేగిన తీరు అద్భుతం. బౌల్ట్, బుమ్రా బౌలింగ్‌ల్లోనూ బౌండరీలు బాదాడు. బుమ్రా బౌలింగ్‌లో ఫోర్ కొట్టడంతోపాటు.. నోబాల్ ఫ్రీహిట్‌ను సిక్స్‌గా మలిచాడు. బుమ్రా బౌలింగ్‌లోనే స్ట్రయిట్ బౌండరీతో హాఫ్ సెంచరీ పూర్తి చేసుకున్నాడు. ఈ ఐపీఎల్ సీజన్లో హాఫ్ చేసిన పూర్తి చేసుకున్న తొలి ఆటగాడు రాయుడు.

ఐపీఎల్ సీజన్‌కు రైనా అనూహ్యంగా దూరం కావడంతో.. ఆ లోటును ఎవరు పూడుస్తారనే ప్రశ్న ఉత్పన్నమైంది. కానీ తొలి మ్యాచ్‌లోనే అసలైన టీ20 హిట్టింగ్‌తో ముంబైపై రాయుడు విరుచుకుపడ్డాడు. రైనా లేని లోటు తెలియకుండా.. దూకుడుగా ఆడుతూ చెన్నైపై ఒత్తిడి తగ్గించాడు. చివర్లో అవుటైనా అప్పటికే చెన్నై విజయానికి చేరువలో ఉంది.

గత సీజన్లో 17 ఇన్నింగ్స్ ఆడిన రాయుడు 23.5 సగటుతో 282 పరుగులు చేశాడు. స్ట్రైక్ రేట్ 93.07 శాతం. 2019 ఐపీఎల్‌లో వంద కంటే ఎక్కువ బంతులు ఆడి ఇంత తక్కువ స్ట్రైక్ రేట్‌తో పరుగులు చేసిన మరెవరూ లేరు. కానీ లాక్‌డౌన్ సమయాన్ని అద్భుతంగా సద్వినియోగం చేసుకున్న రాయుడు.. ట్రైనింగ్‌లోనే సమయం గడిపాడు.

రైనాకు కెప్టెన్‌గా..
2004లో అండర్-19 వరల్డ్ కప్ జట్టుకు రాయుడు సారథ్యం వహించాడు. ఆ వరల్డ్ కప్‌లో రాయుడు నాయకత్వంలో ఆడిన భారత అండర్-19 జట్టులో రాబిన్ ఉతప్ప, శిఖర్ ధావన్, సురేశ్ రైనా, దినేశ్ కార్తీక్, ఆర్పీ సింగ్ సభ్యులు. కానీ ఆ తర్వాత రాయుడు కెరీర్ ఇబ్బందుల్లో పడింది. కొన్ని తప్పుడు నిర్ణయాలు.. మరికొన్ని రాజకీయాల కారణంగా రాయుడు అనేక ఎత్తుపల్లాలు ఎదుర్కొన్నాడు. ఐసీఎల్‌లో చేరి ఇబ్బందులు పడ్డాడు. లిస్ట్ ఏ క్రికెట్లో తొలి సెంచరీ చేసిన 13 ఏళ్ల తర్వాత గానీ రాయుడు మరో సెంచరీ చేయలేకపోయాడంటే అతడు ఎంతలా సతమతం అయ్యాడో అర్థం చేసుకోవచ్చు.

చేజారిన వరల్డ్ కప్ ఛాన్స్:
గత వరల్డ్ కప్ ఆడే అవకాశం వచ్చినా అనూహ్యంగా తుది జట్టులో స్థానం దక్కించుకోలేకపోయాడు. ఆల్‌రౌండర్ అనే కారణంతో విజయ్ శంకర్‌కు జట్టులో స్థానం దక్కింది. ఆ తర్వాత విజయ్ శంకర్, ధావన్ గాయాలతో దూరమైనా.. రాయుడికి జట్టులో చోటు దక్కలేదు. దీంతో తీవ్ర మనోవేదనకు లోనైన రాయుడు ఆవేశంలో క్రికెట్‌కు రిటైర్మెంట్ ప్రకటించాడు. కానీ తర్వాత తన నిర్ణయాన్ని వెనక్కి తీసుకున్నాడు.

అంబటి రాయుడు వరల్డ్ కప్ జట్టులో చోటు దక్కించుకోకపోవడానికి నాటి చీఫ్ సెలక్టర్ ఎమ్మెస్కే ప్రసాదే కారణమని అతడి ఫ్యాన్స్ బలంగా నమ్ముతున్నారు. ఐపీఎల్ తొలి మ్యాచ్‌లో రాయుడు అదరగొట్టడంతో మరోసారి ఎమ్మెస్కేను టార్గెట్ చేశారు.