దిగ్గజం ఆలీబాబా కొత్త రికార్డ్

alibaba new record in sales
Share Icons:

న్యూఢిల్లీ, నవంబర్ 12:

చైనా ఈ–కామర్స్ దిగ్గజం ఆలీబాబా  నిర్వహించిన ‘సింగిల్స్ డే సేల్’లో కొత్త రికార్డులు సృష్టించింది. ఒక్క రోజులోనే 31 బిలియన్ డాలర్ల అమ్మకాలు జరిగినట్లు అలీబాబా సోమవారం అధికారికంగా ప్రకటించింది. దీని విలువ మన కరెన్సీలో దాదాపు రూ.2 లక్షల కోట్లకు సమానం అన్నమాట. దీంతో గతేడాది సింగిల్స్ డే రోజు నమోదైన 25 బిలియన్ డాలర్ల విక్రయాలను కేవలం 16 గంటల్లోనే సాధించి తన రికార్డు తానే తిరగరాసుకుంది.

తొలి గంటలోనే వెయ్యి కోట్ల డాలర్ల ఉత్పత్తులు అమ్ముడైపోయాయి. పిల్లలకు వాడే డైపర్ల దగ్గర నుంచి మొబైల్స్ వరకు ఎన్నో వస్తువులను సేల్లో ఉంచారు. లాస్ ఏంజిల్స్, టోక్యో, ఫ్రాంక్ఫర్ట్లాంటి ప్రపంచ నగరాల నుంచి కూడా ఆర్డర్లు రావడం విశేషం. ఈ సేల్లో 75 దేశాలకు చెందిన దాదాపు 19వేల బ్రాండ్ల వస్తువులను చైనీయులు కొనుగోలు చేశారు. ప్రతి ఏడాది నవంబరు 11న ‘చైనా సింగిల్స్ డే’ పేరిట అలీబాబా ఆన్లైన్ ఫెస్టివెల్ నిర్వహిస్తుంటోంది.

ఈ సింగిల్స్ డేనే 11/11 పేరుతో పిలుస్తారు. ఈ ఏడాది కూడా అదేమాదిరిగా నిర్వహించగా.. చైనీయులు విపరీతంగా కొనుగోళ్లు చేశారు. సేల్ ప్రారంభమైన రెండు నిమిషాల్లోనే 1.44 బిలియన్ డాలర్ల (రూ.10వేల కోట్ల) వ్యాపారం జరిగినట్లు చైనా పత్రిక జింగ్జువా వెల్లడించింది. తర్వాత 5 నిమిషాల్లో ఈ మొత్తం 22 వేల కోట్లకు చేరిందంటే.. కొనుగోళ్లు ఏ స్థాయిలో జరిగాయో అర్థమవుతోంది.

మామాట: జనం ఎగబడి కొన్నట్టున్నారు...

Leave a Reply