Views:
3

రాయలసీమలో మరోసారి ఫ్యాక్షన్ కక్షలు భగ్గుమన్నాయి. కర్నూలు జిల్లా పత్తికొండ నియోజకవర్గం వైఎస్సార్సీపీ ఇన్‌ఛార్జ్ చెరుకులపాడు నారాయణ రెడ్డిని ప్రత్యర్థులు అతి దారుణంగా నరికి చంపారు. ఈరోజు ఉదయం ఓ వివాహానికి హాజరై తిరిగి వస్తున్న నారాయణ రెడ్డిని వెల్దుర్తి మండలం క్రిష్ణగిరి వద్ద ప్రత్యర్థులు పథకం ప్రకారం దారికాసి దాడి చేసి చంపారు. దాదాపు 15 మంది హంతకులు ఈ హత్యాకాండలో పాల్గొన్నట్టు స్థానికులు చెబుతున్నారు.
నారాయణ రెడ్డి ప్రయాణిస్తున్న ఇన్నోవా వాహనాన్ని రెండు ట్రాక్టర్లతో అడ్డగించిన ప్రత్యర్థులు అతడిని వేటకొడవళ్లతో నరికి చంపారు. ఈ దాడిలో నారాయణ రెడ్డి అనుచరుడు సాంభశివుడు కూడా హత్యకి గురయ్యాడు. నారాయణ రెడ్డి వద్ద లైసెన్స్‌డ్ రివాల్వర్ వున్నప్పటికీ.. రెన్యువల్ కోసం నారాయణ రెడ్డి తన వెపన్‌ని సంబంధిత అధికారుల డిపాజిట్ చేసినట్టు అతడి అనుచరులు చెబుతున్నారు.
ఈరోజు ప్రత్యర్థుల చేతిలో హత్యకి గురైన నారాయణ రెడ్డి గత ఎన్నికల్లో డిప్యూటీ సీఎం కేఈ క్రిష్ణమూర్తిపై పోటీచేసి ఓడిపోయారు. కేఈ కృష్ణమూర్తి, నారాయణ రెడ్డిల మధ్య ఎప్పటి నుంచో విభేదాలు నడుస్తున్నాయి. ఇటీవలే కేఈ కృష్ణమూర్తి తనయుడు కేఈ శ్యామ్ బాబు అక్రమంగా ఇసుక తవ్వకాలకి పాల్పడుతున్నట్టు నారాయణ రెడ్డి ఫిర్యాదు చేశారు. ఈ కేసు విచారణలో కొంతమంది అధికారులపై సస్పెన్షన్ వేటు సైతం పడినట్టు సమాచారం.
ఈ నేపథ్యంలోనే తనకి ప్రాణ హానీ వుందని నారాయణ రెడ్డి చాలాసార్లు జిల్లా ఎస్పీకి, స్థానిక పోలీసులకి ఫిర్యాదు చేసినట్టు తెలుస్తోంది. తాను ఊహించినట్టుగానే నారాయణ రెడ్డి ఇవాళ ఉదయం హత్యకి గురయ్యారు. ఎన్డీఏ హయాంలో రైల్వే శాఖ సహాయ మంత్రిగా పనిచేసిన కోట్ల సూర్యప్రకాశ్ రెడ్డికి నారాయణ రెడ్డి వరుసకి బావమరిది అవుతారు. నారాయణ రెడ్డి హత్యతో అతడి స్వగ్రామమైన చెరుకులపాడులో విషాదం అలుముకుంది. వైసీపీ నేత హత్య నేపథ్యంలో క్రిష్ణగిరి, పత్తికొండ, చెరుకులపాడుకి భారీ సంఖ్యలో చేరుకున్న పోలీసులు అల్లర్లు చెలరేగకుండా పికెటింగ్ ఏర్పాటు చేశారు.⁠⁠⁠⁠

Leave a Reply

Your email address will not be published. Required fields are marked *