1st Test: రెండోరోజు కివీస్‌దే.. భారత్ తడబాటు

Share Icons:
న్యూజిలాండ్‌తో వెల్లింగ్టన్ వేదికగా జరుగుతున్న తొలి టెస్టు మ్యాచ్‌లో భారత్ జట్టు తడబడుతోంది. తొలుత బ్యాటింగ్‌లో తత్తరపాటుకి గురైన ఈరోజు తొలి ఇన్నింగ్స్‌లో 165 పరుగులకి ఆలౌటవగా.. అనంతరం కివీస్ బ్యాట్స్‌మెన్‌ల దెబ్బకి భారత బౌలర్లు రెండో సెషన్‌లో లయ తప్పారు. దీంతో.. మ్యాచ్‌లో రెండో రోజైన శనివారం ఆట ముగిసే సమయానికి న్యూజిలాండ్ 216/5తో నిలిచింది. క్రీజులో వాట్లింగ్ (14 బ్యాటింగ్), గ్రాండ్‌హోమ్ (4 బ్యాటింగ్) ఉండగా.. ఇప్పటికే 51 పరుగుల తొలి ఇన్నింగ్స్ ఆధిక్యం కివీస్‌కి లభించింది.

Read More:

ఈరోజు ఓవర్‌నైట్ స్కోరు 122/5తో తొలి ఇన్నింగ్స్‌ని కొనసాగించిన టీమిండియా.. మొదటి సెషన్‌లోనే అదీ 43 పరుగుల వ్యవధిలోనే మిగిలిన ఐదు వికెట్లనీ చేజార్చుకుంది. ఈరోజు ఆరంభంలోనే కళ్లుచెదిరే సిక్స్‌తో మంచి ఊపుమీద కనిపించిన రిషబ్ పంత్ (19: 53 బంతుల్లో 1×4, 1×6) ఆ తర్వాత కొద్దిసేపటికే అజింక్య రహానె (46: 138 బంతుల్లో 5×4)తో సమన్వయలోపం కారణంగా రనౌటయ్యాడు. ఇక ఆ దశ నుంచి భారత్ కోలుకోలేకపోయింది. ఆ తర్వాత వచ్చిన అశ్విన్ (0), ఇషాంత్ శర్మ (5), మమ్మద్ షమీ (21) వరుసగా వికెట్లు చేజార్చుకున్నారు. దీంతో.. 68.1 ఓవర్లలోనే భారత్ ఇన్నింగ్స్ ముగిసింది.

భారత్‌ని ఆలౌట్ చేసిన తర్వాత తొలి ఇన్నింగ్స్ ప్రారంభించిన న్యూజిలాండ్‌ని ఆరంభంలోనే ఫాస్ట్ బౌలర్ ఇషాంత్ శర్మ ఒత్తిడిలోకి నెట్టగలిగాడు. ఓపెనర్లు టామ్ లాథమ్ (11), బ్లండెల్ (30)ని ఇషాంత్ ఔట్ చేసేశాడు. కానీ.. ఆ తర్వాత వచ్చిన కెప్టెన్ కేన్ విలియమ్సన్ (89: 153 బంతుల్లో 11×4) క్రీజులో పాతుకుపోయాడు. కెరీర్‌లో 100వ టెస్టు మ్యాచ్ ఆడుతున్న రాస్ టేలర్ (44: 71 బంతుల్లో 6×4, 1×6)తో కలిసి కివీస్ ఇన్నింగ్స్‌ని నడిపించిన విలియమ్సన్.. మూడో వికెట్‌కి 93 పరుగుల భాగస్వామ్యం నెలకొల్పాడు. అయితే.. విలియమ్సన్‌ని షమీ బుట్టలో వేయగా.. టేలర్‌ని మళ్లీ ఇషాంత్ బోల్తా కొట్టించాడు. ఇక ఆఖర్లో హెన్రీ నికోలస్(17)ని అశ్విన్ ఔట్ చేయడంతో.. కివీస్ ఈరోజుని 216/5తో ముగించింది.