1st ODI ఓటమికి కారణం చెప్పిన ధావన్

Share Icons:
ఆస్ట్రేలియాతో మంగళవారం రాత్రి జరిగిన వాంఖడే వన్డేలో భారత్ జట్టు 10 వికెట్ల తేడాతో ఓటమికి అసలు కారణాన్ని ఓపెనర్ వెల్లడించాడు. మ్యాచ్‌లో టాస్ ఓడి తొలుత బ్యాటింగ్ చేసిన భారత్ జట్టు 49.1 ఓవర్లలో 255 పరుగులకి ఆలౌటైంది. ఓపెనర్ శిఖర్ ధావన్ (74: 91 బంతుల్లో 9×4, 1×6) మాత్రమే చెప్పుకోదగ్గ స్కోరు చేయగా.. కేఎల్ రాహుల్ (47: 61 బంతుల్లో 4×4) ఫర్వాలేదనిపించాడు. రోహిత్ శర్మ (10), విరాట్ కోహ్లీ (16), శ్రేయాస్ అయ్యర్ (8) పూర్తిగా తేలిపోయారు. ఆఖర్లో రిషబ్ పంత్ (28), జడేజా (25) దూకుడుగా ఆడినా కీలక సమయాల్లో వికెట్లు చేజార్చుకున్నారు. లక్ష్యాన్ని ఆస్ట్రేలియా 37.4 ఓవర్లలోనే 258/0తో ఛేదించేసింది. ఓపెనర్లు డేవిడ్ వార్నర్ (128 నాటౌట్: 112 బంతుల్లో 17×4, 3×6), అరోన్ ఫించ్ (110 నాటౌట్: 114 బంతుల్లో 13×4, 2×6) అజేయ సెంచరీలు బాదేశారు.


మ్యాచ్‌లో భారత్ ఓటమిపై శిఖర్ ధావన్ మాట్లాడుతూ ‘మ్యాచ్‌లో తొలి 10-15 ఓవర్లలో బాగా బ్యాటింగ్ చేశాం. కానీ.. మిడిల్ ఓవర్లలో వరుసగా నాలుగు కీలక వికెట్లు చేజార్చుకోవడం టీమ్‌ లయని దెబ్బతీసింది. ఆఖర్లో పుంజుకునేందుకు ప్రయత్నించినా.. లాభం లేకపోయింది. జట్టు స్కోరు 134 (27.1 ఓవర్) వద్ద రాహుల్ ఔటవగానే దూకుడు పెంచాలని ట్రై చేశాం. కానీ.. అదే తప్పిదమైంది. నాలుగు వికెట్లు చేజారడంతో 300 పరుగులు చేయాలనుకున్న మా లక్ష్యం నెరవేరలేదు. ఆ తర్వాత బౌలింగ్‌లోనూ వికెట్లు పడగొట్టలేకపోయాం. నిన్న రోజు మాది కాదు అంతే..!’ అని ధావన్ వెల్లడించాడు.


ఇన్నింగ్స్ 28వ ఓవర్‌లో రాహుల్ ఔటవగా.. ఆ తర్వాత 29వ ఓవర్‌లో శిఖర్ ధావన్, 32వ ఓవర్‌లో విరాట్ కోహ్లీ, 34వ ఓవర్‌లో శ్రేయాస్ అయ్యర్‌లు ఔటైపోయారు. దీంతో.. స్లాగ్ ఓవర్లలో ఆశించిన మేర టీమిండియా పరుగులు రాబట్టలేకపోయింది. జడేజా, పంత్ కూడా వికెట్లు చేజారగానే 49.1 ఓవర్లలోనే భారత్ 255 పరుగులకి కుప్పకూలిపోయిన విషయం తెలిసిందే. ఇక రెండో వన్డే రాజ్‌కోట్ వేదికగా శుక్రవారం మధ్యాహ్నం 1.30 గంటలకి ప్రారంభంకానుంది.