స్పందించనూ అంటూనే.. బాధ మొత్తం వెళ్లగక్కిన సంజయ్ మంజ్రేకర్!

Share Icons:
కామెంటేటర్‌గా మారిన మాజీ క్రికెటర్ సంజయ్ మంజ్రేకర్‌ను 13వ సీజన్ కామెంట్రీ ప్యానెల్ నుంచి బీసీసీఐ తప్పించిన సంగతి తెలిసిందే. అంతకు ముందు దక్షిణాఫ్రితో జరగాల్సిన వన్డే సిరీస్‌కు కూడా మంజ్రేకర్‌కు బోర్డు ఛాన్స్ ఇవ్వలేదు. కానీ ఆ సిరీస్ రద్దయ్యింది. 2019 వరల్డ్ కప్ సమయంలో రవీంద్ర జడేజా విషయంలో ‘బిట్స్ అండ్ పీసెస్’ అంటూ మంజ్రేకర్ చేసిన కామెంట్ తీవ్ర దుమారానికి దారి తీసింది. తోటి కామెంటేటర్ హర్షా భోగ్లేను హేళన చేస్తూ మాట్లాడటం కూడా అతడికి మైనస్‌గా మారింది.

తనను కామెంట్రీ ప్యానెల్‌లో ఉంచాలని బీసీసీఐకి అనేక లేఖలు రాసినా ఫలితం లేకపోయింది. బోర్డు మార్గదర్శకాల ప్రకారమే నడుచుకుంటాని చెప్పినా.. ఐపీఎల్ కవరేజీకి ఎంపిక చేయలేదు. ఈ విషయమై సంజయ్ మంజ్రేకర్ వివరణ కోరగా.. స్పందించడానికి నిరాకరించాడు.

టోర్నమెంట్ సమయంలో అనేక మీడియా సంస్థలతో కలిసి పని చేస్తున్నానని మంజ్రేకర్ తెలిపాడు. ‘కామెంట్రీ ప్యానెల్‌లో చోటు దక్కని విషయమై కామెంట్ చేయకపోవడం బెటర్. క్రిక్ఇన్ఫోలో మ్యాచ్‌కు ముందు, తర్వాత షోలు చేస్తాను. ఓ న్యూస్ ఛానెల్‌తో చర్చలు తుది దశలో ఉన్నాయి. ఫాంటసీ లీగ్ ప్రోగ్రాంలో ఇన్‌ హౌస్ ఎక్స్‌పర్ట్‌గా ఉంటానని మంజ్రేకర్ చెప్పాడు. కాలమ్స్ రాయడంతోపాటు ఓ ఎఫ్ఎం రేడియో స్టేషన్‌‌కు అప్డేట్స్ ఇస్తానని చెప్పాడు.

రవీంద్ర జడేజాను ఉద్దేశించి తాను చేసిన ‘బిట్స్ అండ్ పీసెస్’ కామెంట్‌ను పూర్తిగా అపార్థం చేసుకున్నారని సంజయ్ మంజ్రేకర్ వివరణ ఇచ్చాడు. కొందరు భారత క్రికెటర్లు మైదానం చురుకుగా కదలరని చెప్పడం కోసం ‘డాంకీస్ ఆన్ ది ఫీల్డ్’ అని ఇంగ్లాండ్ మాజీ క్రికెటర్ నాసిర్ హుస్సేన్ గతంలో చేసిన వ్యాఖ్యలు కూడా తీవ్ర వివాదానికి దారి తీశాయి. ఇంగ్లిష్ భాషను తరచుగా అపార్థం చేసుకుంటున్నామని.. తన విషయంలోనూ అదే జరిగిందన్నాడు.

‘మన భారతీయులు విమర్శను భరించలేకుండా చాలా సెన్సిటివ్‌గా మారుతున్నారు. ఇంగ్లిష్ భాషను తరచుగా తప్పుగా అర్థం చేసుకోవడం మరో సమస్య. చాలా మందికి ఇంగ్లిష్ రెండో భాష కూడా కాదు. నేను వాడిన చాలా పదాలు తప్పుగా అర్థమయ్యాయి. టెండుల్కర్ సంబంధిత విషయాలను ఎలిఫెంట్ ఇన్ ది రూమ్‌తో పోల్చినప్పుడు కూడా సచిన్ భారంగా మారాడని నేను వ్యాఖ్యానించానని తప్పుగా అర్థం చేసుకున్నార’ని మంజ్రేకర్ ఆవేదన వ్యక్తం చేశాడు.