సినీ కార్మికులకు చిరంజీవి కోటి రూపాయల సాయం

Share Icons:
భయంకర కరోనా వైరస్‌పై ప్రపంచం పోరాడుతోంది. ఆ మహమ్మారిని దేశం నుంచి తరిమికొట్టాలని భారత ప్రభుత్వం 21 రోజులపాటు దేశ వ్యాప్తంగా లాక్‌డౌన్ ప్రకటించింది. కరోనా పోరాటంలో భాగంగా కేంద్ర ప్రభుత్వంతో పాటు రాష్ట్రా ప్రభుత్వాలు తీసుకుంటోన్న చర్యలు, కార్యక్రమాలకు చాలా డబ్బు ఖర్చవుతుంది. అందుకనే, ఈ కష్టకాలంలో ప్రభుత్వాలకు తమ వంతు సాయం అందిస్తున్నారు టాలీవుడ్ స్టార్లు. ఇప్పటికే పవన్ కళ్యాణ్, మహేష్ బాబు, రామ్ చరణ్, నితిన్, అనిల్ రావిపూడి, దిల్ రాజు వంటి సినీ ప్రముఖులు ఆంధ్రప్రదేశ్, తెలంగాణ ముఖ్యమంత్రుల సహాయ నిధులకు విరాళాలు అందజేశారు.

అయితే, లాక్‌డౌన్ కారణంగా సినీ పరిశ్రమలో రోజువారీ వేతనానికి పనిచేసే ఎంతో కార్మికులు తమ ఉపాధిని కోల్పోయారు. సినిమా షూటింగ్‌లు లేకపోతే వారంతా ఆర్థికంగా చాలా ఇబ్బంది పడాల్సి వస్తుంది. అందుకే, వారిని ఆదుకోవడానికి మెగాస్టార్ చిరంజీవి భారీ విరాళం ప్రకటించారు. ఫిల్మ్ వర్కర్స్‌ సహాయార్థం కోటి రూపాయలు విరాళంగా ఇస్తున్నానని చిరంజీవి ట్వీట్ చేశారు.

Also Read:

‘‘కరోనా సంక్షోభాన్ని అధిగమించాలంటే లాక్‌డౌన్ అనేది తప్పనిసరి. అయితే, దీని ప్రభావం దేశంలో ఉన్న రోజువారీ కూలీలు, పేదలపై పడుతుంది. ఇలాంటి వారు తెలుగు సినీ పరిశ్రమలో కూడా ఉన్నారు. దీని దృష్టిలో పెట్టుకుని ఫిల్మ్ వర్కర్స్ సహాయార్థం కోటి రూపాయలు విరాళంగా ఇస్తున్నాను’’ అని చిరంజీవి ట్వీట్ చేశారు.

ఇండస్ట్రీలోని రోజువారీ వేతనానికి పనిచేసే కార్మికుల సహాయార్థం దర్శకుడు వి.వి.వినాయక్ ఇప్పటికే రూ.5 లక్షలు సాయం అందించారు. ఇప్పుడు చిరంజీవి ఏకంగా కోటి రూపాయలు అందజేయడంతో సినీ కార్మికులు హర్షం వ్యక్తం చేస్తున్నారు. తమిళ సినీ పరిశ్రమలో ఉన్న కార్మికుల కోసం సూపర్ స్టార్ రజినీకాంత్ రూ.50 లక్షలు విరాళం అందజేసిన సంగతి తెలిసిందే.