షాకింగ్.. తెలంగాణలో ఒక్కరోజే 30 కరోనా కేసులు, ముగ్గురు బలి

Share Icons:
హైదరాబాద్: తెలంగాణలో బుధవారం ఒక్క రోజే 30 కరోనా పాజిటివ్ కేసులు నమోదు కాగా ముగ్గురు ప్రాణాలు కోల్పోయారు. గాంధీ హాస్పిటల్‌లో ఇద్దరు, యశోదలో ఒకరు చనిపోయారని ప్రభుత్వం ప్రకటించింది. ఇప్పటి వరకూ కోవిడ్ బారిన పడి చనిపోయిన వారి సంఖ్య రాష్ట్రంలో 9కి చేరింది. ముందుగా వెల్లడించిన మీడియా బులెటిన్ ప్రకారం.. 12 మందికి కరోనా సోకిందని.. ఒకరు మరణించారని తెలిపారు. కానీ 30 కొత్త కేసులు నమోదు కాగా.. మరో ముగ్గురు ప్రాణాలు కోల్పోయారని తెలుస్తోంది. దీంతో రాష్ట్రంలో కరోనా కేసుల సంఖ్య 127కు చేరింది. వీరిలో 14 మంది కోలుకొని డిశ్చార్జ్ అయ్యారు.

ఢిల్లీ నిజాముద్దీన్ మర్కజ్‌కు వెళ్లి వచ్చిన వారితో తెలుగు రాష్ట్రాల్లో కోవిడ్ కేసుల సంఖ్య వేగంగా పెరుగుతోంది. ఏపీలో 24 గంటల్లోనే రికార్డు స్థాయిలో 67 కరోనా పాజిటివ్ కేసులు నమోదు కాగా.. మొత్తం కేసుల సంఖ్య 111కు చేరింది. ఏపీలోని శ్రీకాకుళం, విజయనగరం మినహా మిగతా జిల్లాలకు ఈ వైరస్ పాకింది. బుధవారం ఉదయం నుంచి సాయంత్రం 7 గంటల వరకు కొత్తగా 24 కరోనా పాజిటివ్ కేసులు నమోదు అయ్యాయని ప్రభుత్వం తెలిపింది. గుంటూరు జిల్లాలో అత్యధికంగా 20 మందికి కోవిడ్ పాజిటివ్ అని తేలింది. కడప, కృష్ణా, ప్రకాశం జిల్లాలో 15 మందికి చొప్పున కరోనా సోకింది. పశ్చిమ గోదావరిలో 14 మందికి, విశాఖ జిల్లాలో 11 మందికి, తూర్పు గోదావరిలో 9 మందికి కోవిడ్ పాజిటివ్ అని నిర్ధారించారు. చిత్తూరు జిల్లాలో ఆరుగురికి, నెల్లూరులో ముగ్గురికి, అనంతపురంలో ఇద్దరికి కోవిడ్ సోకినట్లు తేలింది. నెల్లూరు జిల్లాలో ఒకరు, విశాఖలో మరొకరు కోవిడ్ బారి నుంచి కోలుకున్నారు.

గాంధీలో చనిపోయిన కరోనా పేషెంట్ మృతదేహాన్ని తీసుకెళ్లనీయలేదని అతడి బంధువులు గాంధీ హాస్పిటల్‌‌లో డాక్టర్లపై దాడికి దిగారు. దీంతో వైద్యసిబ్బంది ఈ విషయాన్ని పోలీసుల దృష్టికి తీసుకెళ్లారు. ఈ ఘటనను ఆరోగ్య శాఖ మంత్రి ఈటల రాజేందర్, డీజీపీ మహేందర్ రెడ్డి ఖండించారు. డాక్లర్లపై దాడి చేసిన వారిపై కఠిన చర్యలు తీసుకుంటామన్నారు.