శెభాష్ పోలీస్.. నీది కరుకు గుండే కాదు, మంచి మనసు కూడా!

Share Icons:
ది సికింద్రాబాద్ చిలకలగూడ ఏరియా. రాష్ట్రవ్యాప్తంగా లాక్‌డౌన్ విధించడంతో ప్రజలు ఇళ్లకే పరిమితమయ్యారు. రాత్రి 7 గంటలకు సమీపిస్తుండటంతో వివిధ పనుల నిమిత్తం బయటకు వెళ్తున్న కొద్ది మంది కూడా గబాగబా ఇంటి దారి పట్టారు. ఆ సమయంలో ఓ మహిళ దీనంగా రోడ్ల వెంట తిరుగుతోంది. అటుగా వెళ్తున్న బాలగంగిరెడ్డి తన వాహనంలో నుంచి ఆమెను గమనించారు. ఏదో కష్టంలో ఉందని చూడగానే అర్థమైంది. వెంటనే తన వాహనాన్ని ఆపి, ఆమె వద్దకు వెళ్లి విషయం ఆరా తీశారు. గర్భిణి అయిన తన కోడలికి పురిటినొప్పలు వస్తున్నాయని, ఆస్పత్రికి తరలిద్దామంటే.. రోడ్లపై ఎలాంటి వాహనం లేదని ఆమె తన గోడు వెళ్లబోసుకుంది.

మరో మాట లేకుండా వెంటనే ఎస్‌ఐ గంగిరెడ్డి తన వాహనాన్ని ఇచ్చి ఆ గర్భిణిని ఆస్పత్రికి పంపిచారు. తమవి లాఠీలు ఝళిపించే కరుకు గుండెలే కావు, కష్టమొస్తే ఆదుకునే మంచి మనసు కూడా అని మరోసారి నిరూపించారు. సికింద్రాబాద్‌లోని చిలకలగూడ పోలీస్ స్టేషన్ పరిధిలో బుధవారం (మార్చి 25) సాయంత్రం 6.30 గంటలకు ఈ ఘటన చోటు చేసుకుంది. మానవత్వం చాటుకున్న సబ్ ఇన్‌స్పెక్టర్ బాలగంగిరెడ్డిపై పలువురు ప్రశంసలు కురిపిస్తున్నారు.

Must Read:

మంగళవారం సాయంత్రం వారసిగూడా నుంచి చిలకలగూడ పోలీస్ స్టేషన్ వైపు వెళ్తున్న సమయంలో ఎస్‌ఐ గంగిరెడ్డి వాహనానికి ఒక మహిళ అడ్డువచ్చింది. అది చూసిన ఆయన వెంటనే వాహనాన్ని అపి ఏమైందని అడిగారు. తన కోడలు ప్రసూతి నొప్పులతో బాధ పడుతుందని.. రోడ్లపై ఎలాంటి వాహనం లేదని, ఏదైనా వాహనాన్ని ఏర్పాటు చేసి ఆసుపత్రికి తరలించమని ఆమె కోరింది. వెంటనే స్పందించిన బాలగంగిరెడ్డి తాను కిందికి దిగి గర్భవతిని ఆసుపత్రికి తరలించాల్సిందిగా డ్రైవర్‌ను పురమాయించారు. ఎస్‌ఐ జీప్‌లో ఆ మహిళలను సకాలంలో స్ప్రింగ్ హాస్పిటల్‌లో చేర్చారు.

కరోన మొదలైన కొత్తలో గాంధీ ఆసుపత్రిలో ఓ డాక్టర్ ఆత్మహత్యాయత్నం చేసిన ఘటన కలకలానికి కారణమైన సంగతి తెలిసిందే. నాడు ఆ వైద్యుడిని అతి చాకచక్యంగా కాపాడి ప్రజల మన్ననలను పొందింది కూడా ఎస్‌ఐ గంగిరెడ్డే కావడం విశేషం. హైదరాబాద్ పోలీస్ కమిషనర్ అంజనీ కుమార్ చేతుల మీదుగా 10 వేల రూపాయల రివార్డు కూడా అందుకున్నారు.

Also Read: