వి’ సినిమా ప్రసారం.. లోకల్‌ ఛానల్‌కి భారీ షాకిచ్చిన జెమిని టీవీ!

Share Icons:
గతంలో కొత్త సినిమాలు రిలీజైన చాలా నెలల వరకు టీవీల్లో ప్రసారమయ్యేవి కాదు. కానీ ఇటీవల థియేటర్లలో తీసిన వెంటనే ఎంటర్‌టైన్‌మెంట్ ఛానల్స్ వాటిని టెలీకాస్ట్ చేస్తున్నాయి. దీనికి తోడు కోట్లు పెట్టి హక్కులు కొనుగోలు చేసుకుంటున్న ఓటీటీ సంస్థలు కొద్దిరోజులకే క్వాలిటీ ఫ్రింట్‌ను ప్రేక్షకులకు అందిస్తున్నాయి. వీటిని డౌన్‌లోడ్ చేసుకుని కొన్ని లోకల్ ఛానల్స్‌ నిబంధనలకు విరుద్ధంగా ప్రసారం చేస్తుంటాయి. అప్పటికే ఆ సినిమా చాలామంది చూసి ఉంటారు కాబట్టి ఎవరూ పట్టించుకునేవారు కాదు. కానీ ఇప్పుడు కాలం మారింది.

Also Read:

కరోనా కారణంగా థియేటర్లు మూతపడటంతో ఇటీవల చాలా సినిమాలు డైరెక్ట్‌గా ఓటీటీలోనే రిలీజ్ అవుతున్నాయి. ప్రేక్షకులు థియేటర్‌కి వెళ్లి సినిమా చూసే పరిస్థితి లేకపోవడంతో నిర్మాతలు ఓటీటీ, శాటిలైట్ రైట్స్‌నే నమ్ముకుని గట్టెక్కుతున్నారు. మరోపక్క ఆ సినిమాలో టెలీకాస్ట్‌ చేసేందుకు ఛానల్స్‌ సిద్ధమవుతున్న సమయంలో కొన్ని లోకల్ ఛానళ్లు అక్రమంగా వాటిని టెలీకాస్ట్‌ చేస్తున్నాయి. ఇలాంటి వాటిని ఇన్నాళ్లూ చూసిచూడనట్లు వదిలేసిన పెద్ద ఛానళ్ల యాజమాన్యాలు ఇటీవల కొంచెం సీరియస్ అవుతున్నాయి.

ఇటీవల నాని, సుధీర్‌బాబు నటించిన ‘వి’ సినిమా అమెజాన్ ప్రైమ్ ద్వారా రిలీజైన సంగతి తెలిసిందే. ఈ చిత్రం శాటిలైట్ హక్కులను జెమిని టీవీ భారీ ధరకు కొనుగోలు చేసింది. అయితే ఇటీవలే హైదరాబాద్‌లోని ఓ లోకల్ ఛానల్‌ ‘వి’ సినిమాను టెలికాస్ట్ చేసింది. ఈ విషయాన్ని సీరియస్‌గా తీసుకున్న జెమిని టీవీ ఆ లోకల్ ఛానల్‌కు నోటీసులు చేసినట్లు తెలుస్తోంది. నిబంధనలకు విరుద్ధంగా సినిమా టెలికాస్ట్ చేసినందుకు ఏకంగా రూ.2కోట్ల జరిమానా చెల్లించాలని కోరిందట. జెమిని టీవీ తీసుకున్న ఈ నిర్ణయంపై మిగతా ఛానల్స్ కూడా హర్షం వ్యక్తం చేస్తున్నట్లు సమాచారం.