‘వరల్డ్ ఫేమస్ లవర్’ మూవీ రివ్యూ

Share Icons:
ప్రేమ ఇచ్చే హాయి మరి ఎందులోనూ ఉండదు.. వెతికినా దొరకదు. హ్యాపీగా ఉండటానికి ఏకైక కారణం ప్రేమే. పుట్టిన ఇళ్లు, చదివిన స్కూలు, పనిచేసే చోటు ఇలా ఎక్కడైనా ఎప్పుడైనా ఎవరివల్లనైనా ప్రేమ పొందుకున్నాం అంటే జాయ్ ఫుల్ లైఫ్ దొరికేసినట్టే. అదే సందర్భంలో ‘నేను’ అనే అహం, ‘నిర్ణక్ష్యం’తో సహవాసం.. నీ నుండి కాని ఎదుటి వ్యక్తుల నుండి ఎదురుపడిందంటే జాయ్ అనుకున్న లైఫ్ కొలాప్స్ కావాల్సిందే. మనం అనుకున్న ప్రేమ.. నిర్ణక్ష్యపు ధోరణితో నేనుగా మారినప్పుడు మదిలో రేగే అలజడులే ఈ ‘వరల్డ్ ఫేమస్ లవర్’.

ఇదే నా చివరి ప్రేమ కథా చిత్రం అని విజయ్ దేవరకొండ ప్రేమికులందరికీ పెద్ద షాక్ ఇస్తూ ‘వరల్డ్ ఫేమస్ లవర్’ చిత్రాన్ని ప్రేమికుల దినోత్సవ కానుకగా నేడు ప్రేక్షకుల ముందుకు తీసుకువచ్చారు. ‘‘నా సినిమాకి వచ్చే ప్రతి ప్రేక్షకుడు ఏదో ఒక కొత్త అనుభూతిని పొందాలనే సినిమాలు చేస్తుంటా.. ఈ సింగిల్ డబుల్స్ కొట్టడం మన వల్ల కాదు.. కొడ్తే సిక్సే.. ప్రతి బాల్‌ని బౌండరీ బాదాలనే చూస్తా. ప్రస్తుతం ‘వరల్డ్ ఫేమస్ లవర్’ చిత్రంతో బంతిని గట్టిగానే కొట్టా.. బంతి గాల్లో ఉంది.. మరి అది బౌండరీ బయటపడిందో.. క్యాచ్ ఔట్ అయ్యిందో సినిమా చూసి చెప్పాలి’ అని ప్రీ రిలీజ్‌లో మాట్లాడారు విజయ్ దేవరకొండ. నిజమే.. ఈసారి బంతిని గాల్లో కాదు.. మెల్లగా బౌండరీకి తరలించారు. అది ఎలా.. ఏంటో సమీక్షలోకి వెళ్లి తెలుసుకుందాం..

గౌతమ్ (విజయ్ దేవరకొండ) ఓ అనాథ. మంచి రచయిత కావాలని కలలు కంటూ తన చదువుకి తగ్గ ఉద్యోగం వచ్చినప్పటికీ దాన్ని పక్కనపెట్టి మంచి పుస్తకం రాయాలనుకుంటాడు. కాలేజ్‌లో యామిని (రాశీ ఖన్నా) పరిచయంతో అతని లైఫ్ గోల్ టర్న్ అవుతుంది. కడుపు మార్చుకుంటూ రచయిత కాలేం కదా.. నాకోసం మన ప్రేమ కోసం ఉద్యోగం చేయి అని చెప్పడంతో ప్రేయసి కోసం ఉద్యోగంలో చేరి మంచి స్థితికి వస్తాడు గౌతమ్. అదే సందర్భంలో కోటీశ్వరురాలైన (రాశీ ఖన్నా)తో పెళ్లికి అతని తండ్రి ఒప్పుకోడు. దీంతో పేరెంట్స్ ఒప్పుకునేంత వరకూ లివింగ్ రిలేషన్ షిప్‌లో ఉందాం అని గౌతమ్, యామిని వేరే ఇంటిలో ఉంటారు. కొన్నాళ్లకు గౌతమ్ ఉద్యోగం మానేసి రాయడం మొదలుపెడతారు. అయితే తన కథల్లో సోల్ దొరక్కపోవడంతో మెల్లగా యామినిని నిర్ణక్ష్యం చేస్తాడు.

ఎంతలా అంటే.. ‘ప్రాణం లేని వస్తువునైనా సరిగా చూడకపోతే ఎందుకూ పనికి రాకుండా పోతుంది.. ప్రాణం ఉన్న పట్టించుకోకపోతే ఎలా గౌతమ్.. ఈ ప్రపంచంలో నిస్వార్ధమైనది ప్రేమ ఒక్కటే.. ఆ ప్రేమలో కూడా నేను అనే రెండు అక్షరాలు సునామినే రేపగలవు. ప్రేమంటే ఒక కాంప్రమైస్ కాదు ప్రేమంటే ఒక సాక్రిఫైస్ ప్రేమలో ఒక దైవత్వం ఉంటుంది అవేవి నీకు అర్ధం కావు’ అని యామిని రోధించేలా. ఏ నిస్వార్ధమైన ప్రేమను గౌతమ్‌లో కోరుకుందో.. అదే లేకపోవడంతో పాటు తాను రచయిత కావాలనుకున్న గోల్‌ని కూడా గౌతమ్‌ పక్కన పెట్టడంతో అతనితో బ్రేకప్ చెప్పేస్తోంది యామిని.

యామిని దూరమైన తరువాత గౌతమ్ ఒంటరి వాడు అవుతాడు. తాను రాయడం లేదనే కదా యామిని దూరమైందని తెలుసుకుని.. ఓ పేపర్‌లో బొగ్గుగనిలో చనిపోయిన భర్తకోసం రోధించే భార్య ఫొటో చూసి ‘వరల్డ్ ఫేమస్ లవర్’ కథ రాయడం మొదలుపెడతాడు గౌతమ్. అలా అతని కలం నుండి వచ్చిన ప్రేమ కథలోని పాత్రలే శీను(విజయ్ దేవరకొండ), సువర్ణ( ఐశ్వర్యా రాజేష్‌), ఈజా బెల్లా (ఈజా), స్మిత (క్యాథరిన్ త్రెసా)లు. ఈ పాత్రల ద్వారా ‘వరల్డ్ ఫేమస్ లవర్’ అనే కథకు గౌతమ్ ఎలాంటి ముగింపు ఇచ్చారు. యామిని ప్రేమను ఎలా సాధించాడు. యామిని దూరమైన తరువాత గౌతమ్‌లో వచ్చిన మార్పులేంటి? అన్నదే మిగతా కథ.

వరల్డ్ ఫేమస్ లవర్ మూవీ టైటిల్ అనౌన్స్ చేసినప్పుడే విజయ్ దేవరకొండ మళ్లీ అర్జున్ రెడ్డిగా మారారని చాలా మంది ఫిక్స్ అయిపోయారు. ఆ తరువాత టీజర్, ట్రైలర్‌లతో ఇది పక్కా అర్జున్ రెడ్డి పార్ట్ 2 మాదిరే ఉందనే అభిప్రాయం చాలా మందిలో వచ్చింది. రొమాంటిక్ సీన్లు, రాశి ఖన్నాతో బోల్డ్ సీన్లు, ఒక్కరు కాదు ఇద్దరు కాదు.. ఏకంగా నలుగురు హీరోయిన్లు విజయ్ సినిమాలో అనేటప్పటికీ ఈ సినిమాపై బోల్డ్ ముద్ర పడింది. టీజర్, ట్రైలర్స్‌ని చూసి ప్రేక్షకుడి మదిలో ఒక కథకు ఫిక్స్ కాగా.. తెరపై ఒక పార్టనల్, ఒక వైఫ్, ఒక ఫాంటసీ, ఒక గర్ల్ ఫ్రెండ్ నేపథ్యంలోని ఓ డిఫరెంట్ ప్రేమకథతో కొత్త అనుభూతిని కలిగించారు.

ఈ కథలో గౌతమ్, యామినిలు మెయిన్ రోల్స్ అయినప్పటికీ.. కథలో భాగంగా వచ్చే పాత్రల్లోని శీనయ్య, సువర్ణ పాత్రలు సినిమాకి మేజర్ హైలైట్. ‘ఇల్లందులో బాగా చదువుకుని అందమైన అమ్మాయిని పెళ్లి చేసుకుని ఎంజాయ్ చేయాలని కలలు కనే శీనయ్య అనుకోకుండా.. బొగ్గుగని పని చేసే తన తండ్రికి యాక్సిడెంట్ కావడంతో బొగ్గుగని కార్మికుడిగా మారతాడు. శీనుకి 20 ఏళ్లకే సువర్ణ (ఐశ్వర్య రాజేష్)ని ఇచ్చి పెళ్లి చేస్తారు. వీళ్లకి ఆరేళ్ల కొడుకు. తాను కోరుకున్న లైఫ్ దొరక్కపోవడంతో తన చుట్టూ ఉన్న ప్రేమను పొందలేకుండా.. తను కావాలనుకున్న ప్రేమకోసం వెతుకుతుంటాడు శీనయ్య. అలాంటి సందర్భంలో బొగ్గుగనికి వెల్ఫేర్ ఆఫీసర్‌గా వచ్చిన స్మిత అట్రాక్షన్‌లో పడతాడు శీనయ్య. స్మిత ఎంట్రీ తరువాత శీనయ్య-సువర్ణ లైఫ్‌లో జరిగిన పరిణామాలను చాలా ఎమోషనల్‌గా భావోద్వేగ సన్నివేశాలతో హృదయాలను హత్తుకునేలా చూపించారు దర్శకుడు క్రాంతి మాధవ్.

చదువు రాని భార్య.. తనకి ఆల్ ది బెస్ట్ చెప్పిందని ఇంటికి కేబుల్ కట్ చేయించేటంత కఠినంగా చూపిస్తూనే.. తనకు ఎవరో కొత్త బట్టలు కొంటే.. తన భార్యకు కూడా రెండు చీరలు కొనే సహజ సిద్ధమైన భార్య భర్తల ప్రేమను శీనయ్య-సువర్ణ పాత్రల్లో చూపించారు. ముఖ్యంగా బొగ్గుగని కార్మికుడిగా శీనయ్య తన యాస, భాషల్లో మెస్మరైజ్ చేస్తే.. సువర్ణగా ఐశ్వర్య రాజేష్ తన పెర్ఫామెన్స్ కట్టిపడేసింది. తనకంటే ఎక్కువ చదుకున్నానంటే భర్త అహం ఎక్కడ దెబ్బతింటుందోనని నిజాన్ని దాచి.. అదే భర్త చదువుకుని మోడ్రన్‌గా ఉండే అమ్మాయిని ఇష్టపడుతున్నాడని తెలుసుకుని గోల్డ్ మెడల్ సాధించి మోడ్రన్‌గా రెడీ అయ్యే సీన్‌లో ఐశ్వర్య రాజేష్ తాను ఏడుస్తూనే ప్రేక్షకుల కళ్లు చెమ్మగిల్లేలా చేసింది. ఇక స్మిత పాత్రలో క్యాథరిన్ త్రెసా తన పాత్రకు న్యాయం చేసింది.

ఇక ‘వరల్డ్ ఫేమస్ లవర్’ ప్రేమ కథ ఫ్యారిస్‌కి ఫిఫ్ట్ అయిన తరువాత ఫస్టాఫ్ వరకూ సాఫీగా సాగిన కథ నెమ్మదించడం మొదలుపెట్టింది. గౌతమ్ (విజయ్) విదేశీ భామ పైలెట్ ఈషా (ఈజా బెల్లా) ప్రేమలో పడటం.. ఇతని వల్ల ఆమెకు కళ్లు పోవడం, ఆమె కోసం ఇతని కళ్లు దానం చేయడం అంతా నాటకీయంగా అనిపిస్తుంది. ‘వరల్డ్ ఫేమస్ లవర్’ కథ మొత్తం గౌతమ్, యామినిల చుట్టూనే ఉన్నా.. వీరిద్దరూ కలపడం కోసం దర్శకుడు శీను, సువర్ణ, ఈజా పాత్రల్ని పరిచయం చేసి కథను నడిపారు. ‘వరల్డ్ ఫేమస్ లవర్’ కథ ఎలా ముగుస్తుంది? గౌతమ్-యామినిలు ఎలా కలుసుంటారనే ఆసక్తిని ప్రేక్షకుల్లో కలిగించిన దర్శకుడు చివర్లో సరైన ముగింపు ఇవ్వలేదనే అనిపిస్తుంది. ఫస్టాఫ్ శీనయ్య- సువర్ణ పాత్రలతో మంచి హైప్‌కి వెళ్లిన సినిమా సెకండాఫ్‌లో నెమ్మదించింది. అయితే డిఫరెంట్ వేరియేషన్స్ ఉన్న పాత్రల్లో విజయ్ దేవరకొండ మెచ్యూర్డ్ నటనతో ఆకట్టుకున్నారు. లవ్ ఫెయిల్యూర్ అయిన ప్రేమికుడిగా తనకంటే ఎవరూ బాగా నటించలేరేమో అన్నట్టుగా పాత్రలో ఒదిగిపోయాడు. యామని.. యామిని అంటూ పిచ్చిపట్టిన వాడిలా పాత అర్జున్ రెడ్డిని గుర్తు చేశాడు.

లవ్‌ని ఎక్స్‌పెక్ట్ చేసి ఈ సినిమాకి రండి.. ఇద్దరి మధ్య ప్రేమ ఎప్పుడూ అలాగే ఉంటుంది. కాని లవ్‌ని ఎక్స్ ప్రెస్ చేసే విధానంలో కాని.. దాన్ని ఎడాప్ట్ చేసుకునే ధోరణిలో కాని జనరేషన్.. జనరేషన్‌కి మార్పు వస్తోంది. పదేళ్లు క్రితం జనరేషన్ లవ్ ఒకలా ఉంటుంది. ప్రజెంట్ జనరేషన్ లవ్ మరోలా ఉంది. దశాబ్ధాలు పాటు సాగే ప్రేమ కథలకు కాలం చెల్లిన తరుణంలో అన్ని జనరేషన్‌కి చేరువయ్యే ప్యూర్ లవ్ స్టోరీని ఈ ‘వరల్డ్ ఫేమస్ లవర్’ చిత్రంలో చూపించారు దర్శకుడు క్రాంతి మాధవ్.

నిర్లక్ష్యాన్ని భరించలేక అలిసిపోయిన ఓ హృదయం చూట్టూ అక్షరాల మధనంతో హృద్యమైన కథను అల్లుకున్నారు క్రాంతి మాధవ్. ఓనమాలు, మళ్లీ మళ్లీ ఇది రాని రోజు మంచి చిత్రాలుగా మిగిలాయి కాని.. అందరికీ కనెక్ట్ కాలేదు. అందరిచేతా వావ్ అనిపించే కామన్ ప్లాట్ ఫామ్ కాలేకపోయాయి క్రాంతి మాధవ్ చిత్రాలు. ‘వరల్డ్ ఫేమస్ లవర్‌’తో ఒక పార్టనల్, ఒక వైఫ్, ఒక ఫాంటసీ, ఒక గర్ల్ ఫ్రెండ్ ఇలా భిన్నమైన క్యారెక్టరైజేషన్‌తో కొత్త అనుభూతిని కలిగించారు. అయితే ఫస్టాఫ్ వరకూ కథపై పట్టుకోల్పోకుండా పెన్ పవర్ చూపించారు దర్శకుడు. సెకండాఫ్‌లో స్లో కావడం, స్క్రీన్ ప్లే‌తో మాయచేయలేకపోవడం ఈ సినిమాకి మైనస్.

ఇక టెక్నికల్ పరంగా సీనియర్ నిర్మాత కే ఎస్ రామారావు ఖర్చుకు వెనకాడకుండా చాలా రిచ్‌గా సినిమాను రూపొందించారు. గోపీ సుందర్ పాటలు ఓ మోస్తరుగా అనిపిస్తాయి. బొగ్గుగనిలో సాంగ్ బాగా వచ్చింది. బ్యాగ్రౌండ్ మ్యూజిక్ పర్వాలేదనిపించారు. జయక్రిష్ణ గుమ్మడి సినిమాటోగ్రఫీ సినిమాకి హైలైట్ అనిచెప్పొచ్చు. కోటగిరి వెంకటేశ్వర రావు ఎడిటింగ్ వర్క్ సెకండాఫ్‌లో మరి కాస్త వాడి ఉంటే.. సినిమా స్లో అనే ఫీలింగ్ తగ్గేదేమో.

ఓవరాల్‌గా ‘వరల్డ్ ఫేమస్ లవర్’ సినిమా ఓ కొత్త అనుభూతి. రొమాన్స్, లిప్ లాక్స్ అంటూ అర్జున్ రెడ్డిని దృష్టిలో పెట్టుకుని సినిమాకి వెళ్లిన ప్రేక్షకులకు సర్ ప్రైజ్‌గా అనిపిస్తుంది. ‘వరల్డ్ ఫేమస్ లవర్’ ప్రేమికులకు మాత్రమే కాదు.. ఫ్యామిలీతో కలిసి చూసే చిత్రమే. సెకండాఫ్ స్లో అనే కంప్లైంట్ తప్పితే విజయ్ స్లోగా బౌండరీ బాదినట్టే.