వన్డే సిరీస్‌లో భారత క్రికెటర్లకి షేక్‌హ్యాండ్ ఇవ్వబోం: దక్షిణాఫ్రికా చీఫ్ కోచ్

Share Icons:
భారత్, దక్షిణాఫ్రికా మధ్య మార్చి 12 నుంచి జరగనున్న మూడు వన్డేల సిరీస్‌లో ఆటగాళ్లు క్రికెట్ సంప్రదాయాన్ని కాస్త పక్కనపెట్టే సూచనలు కనిపిస్తున్నాయి. సాధారణంగా మ్యాచ్ ముగిసిన తర్వాత ఇరు జట్ల ఆటగాళ్లు షేక్‌హ్యాండ్స్ ఇచ్చుకోవడం పరిపాటి. కానీ.. భారత్‌లో వ్యాప్తి చెందుతుండటంతో వన్డే సిరీస్‌లో టీమిండియా ఆటగాళ్లతో కరచాలనంపై పునాలోచించబోతున్నట్లు దక్షిణాఫ్రికా టీమ్ చీఫ్ కోచ్ మార్క్ బౌచర్ వెల్లడించాడు.

భారత్‌లో ఇప్పటికే 40 మందికిపైగా కరోన్ వైరస్ సోకగా.. దాదాపు 3వేల మందిని అనుమానితులు గుర్తించి శాంపిల్స్‌ని సేకరించారు. ఈ నేపథ్యంలో.. సిరీస్‌ కోసం భారత్‌కి బయల్దేరే ముందు దక్షిణాఫ్రికా ఆటగాళ్లకి వైద్య సిబ్బందితో కరోనా వైరస్‌పై అవగాహన కల్పించారు. అంతేకాకుండా.. ఓ మెడికల్ టీమ్‌ కూడా క్రికెట్ జట్టుతో వస్తున్నట్లు తెలుస్తోంది. భారత్ గడ్డపై అడుగుపెట్టనున్న దక్షిణాఫ్రికా జట్టు.. వైద్య సిబ్బంది సూచనలకి అనుగుణంగానే టూర్‌లో నడుచుకోబోతున్నట్లు చీఫ్ కోచ్ మార్క్ బౌచర్ వెల్లడించాడు.

దక్షిణాఫ్రికాతో వన్డేలకి సెలక్టర్లు ప్రకటించిన భారత్ జట్టు ఇదే: శిఖర్ ధావన్, పృథ్వీ షా, విరాట్ కోహ్లీ (కెప్టెన్), కేఎల్ రాహుల్, మనీశ్ పాండే, శ్రేయాస్ అయ్యర్, రిషబ్ పంత్, హార్దిక్ పాండ్య, రవీంద్ర జడేజా, భువనేశ్వర్ కుమార్, యుజ్వేందర్ చాహల్, జస్‌ప్రీత్ బుమ్రా, నవదీప్ సైనీ, కుల్దీప్ యాదవ్, శుభమన్ గిల్

మూడు వన్డేల ఈ సిరీస్‌లో తొలి మ్యాచ్ ధర్మశాల వేదికగా మార్చి 12న జరగనుండగా.. ఆ తర్వాత 15న లక్నో వేదికగా రెండో వన్డే జరుగుతుంది. ఇక చివరి మ్యాచ్ కోల్‌కతాలోని ఈడెన్ గార్డెన్స్ వేదికగా 18న నిర్వహిస్తారు. సిరీస్‌లో మూడు మ్యాచ్‌లూ మధ్యాహ్నం 1.30 గంటలకి ప్రారంభంకానున్నాయి.