వన్డేల్లో ఓపెనర్‌గా రోహిత్ శర్మ నెం.1 రికార్డ్

Share Icons:
భారత ఓపెనర్ వన్డేల్లో అరుదైన రికార్డ్‌ని అందుకున్నాడు. ఆస్ట్రేలియాతో రాజ్‌కోట్ వేదికగా శుక్రవారం జరుగుతున్న రెండో వన్డే మ్యాచ్‌లో 44 బంతుల్లో 6×4 సాయంతో 42 పరుగులు చేసిన రోహిత్ శర్మ.. ఓపెనర్‌గా 7 వేల పరుగుల మైలురాయిని అందుకున్నాడు. రోహిత్ శర్మ కేవలం 137 ఇన్నింగ్స్‌ల్లోనే ఈ రికార్డ్‌ని అందుకోగా.. దక్షిణాఫ్రికా మాజీ ఓపెనర్ హసీమ్ ఆమ్లా 147 ఇన్నింగ్స్‌ల రికార్డ్ బ్రేక్ అయ్యింది.

భారత్ తరఫున సచిన్ టెండూల్కర్ 160 ఇన్నింగ్స్‌ల్లో ఈ 7 వేల పరుగుల ఘనతని అందుకోగా.. మాజీ కెప్టెన్ సౌరవ్ గంగూలీ 168 ఇన్నింగ్స్‌ల్లో సాధించాడు. వీరితో పాటు శ్రీలంక మాజీ ఓపెనర్ తిలకరత్నె దిల్షాన్ 165 ఇన్నింగ్స్‌లతో ఈ రికార్డ్‌లో ఉన్నాడు. కానీ.. తాజాగా ఈ అందరి రికార్డ్స్‌ని రోహిత్ శర్మ బద్దలుకొట్టాడు.

2019లో ఏడు వన్డే సెంచరీలు బాదిన రోహిత్ శర్మకి ‘వన్డే ప్లేయర్ ఆఫ్ ద ఇయర్’ అవార్డుని ఇటీవల ఐసీసీ ప్రకటించింది. గత ఏడాది 28 మ్యాచ్‌లాడిన రోహిత్ శర్మ 57.30 సగటుతో ఏకంగా 1,409 పరుగులు చేశాడు. కానీ.. గత మంగళవారం ఆస్ట్రేలియాతో జరిగిన తొలి వన్డేలో 10 పరుగులకే ఔటైన రోహిత్.. రెండో వన్డేలోనూ 42 పరుగుల వద్దే వికెట్ చేజార్చుకున్నాడు.