యుద్ధభూమిలో పుట్టడం నా తప్పా?: ‘800’ వివాదంపై మురళీధరన్ రియాక్షన్

Share Icons:
ప్రపంచ దిగ్గజ స్పిన్నర్, శ్రీలంక స్టార్ క్రికెటర్ బయోపిక్‌గా తెరకెక్కుతున్న ‘800’ సినిమాపై తమిళనాడులో పెద్దయెత్తున ఆందోళనలు జరుగుతున్న సంగతి తెలిసిందే. మురళీధరన్ పాత్ర పోషిస్తున్న విలక్షణ నటుడు విజయ్ సేతుపతిని సోషల్‌మీడియాలో విపరీతంగా ట్రోల్ చేస్తున్నారు. ఈ సినిమా నుంచి తప్పుకోవాలంటూ విజయ్‌ని సీనియర్ దర్శకుడు భారతీరాజా సూచించారు. శ్రీలంక మత వాదానికి పూర్తిగా మద్దతు పలికిన మురళీధరన్‌ బయోపిక్‌లో నటిస్తే తమిళులను అవమానించేనట్లేని భారతీరాజా కూడా అభిప్రాయపడ్డాడు.

అయితే తన బయోపిక్‌ తమిళనాట వివాదాస్పదం కావడంపై మురళీధరన్ స్పందించాడు. ఈ మేరకు ఓ లేక విడుదల చేశాడు. ‘నాకు వివాదాలు కొత్తేమీ కాదు. క్రికెట్‌లో కొనసాగుతున్నప్పుడే ఎన్నో చూశా. ‘800’ సినిమా ఉద్దేశాన్ని కొన్ని వర్గాలు సరిగ్గా అర్థం చేసుకోవాలని కోరుతున్నా. నా జీవితం యుద్ధభూమిలో మొదలైంది. నాకు ఏడేళ్ల వయసున్నప్పుడు నా తండ్రి చనిపోయారు. యుద్ధ ప్రాబల్య ప్రాంతంలో నిత్యం బిక్కుబిక్కుమంటూ జీవిస్తూ ఎన్నో ఇబ్బందులు ఎదుర్కొన్నాం. చిన్నప్పటి నుంచి నేను ఎదుర్కొన్న కష్టాలు, క్రికెట్లో సాధించి విజయాల ‘800’ సినిమాలో చూపిస్తున్నారు’

‘శ్రీలంక తమిళుడిగా పుట్టడం నా తప్పా?. ఒకవేళ ఇండియాలో పుడితే టీమిండియా తరపున ఆడేవాడిని. నేను తమిళులకు వ్యతిరేకమంటూ వివాదం రేపి దానికి రాజకీయ రంగు పులిమారు. 2009లో శ్రీలంకలోని పరిస్థితులను ఉద్దేశించి నేను చేసిన వ్యాఖ్యలను తప్పుగా ప్రచారం చేశారు. తమిళుల నరమేధానికి నేను మద్దతు పలికానంటూ ఆరోపణలు చేశారు. తమిళుల్లో ఆత్మవిశ్వాసాన్ని నింపేందుకే నా కథను వెండితెరపై చెప్పాలనుకుంటున్నా’ అని మురళీధరన్ పేర్కొన్నాడు.