మహేష్‌తో సినిమా క్యాన్సిల్.. ఆ విషయంలో బాధపడుతోన్న వంశీ పైడిపల్లి

Share Icons:
స్టార్ హీరోలతో అనుకున్న ప్రాజెక్టులు ఒక్కోసారి చేతులు మారుతుంటాయి. లేదంటే రద్దవుతాయి. దీనికి చాలా కారణాలే ఉండొచ్చు. స్క్రిప్ట్ నచ్చకపోవచ్చు, రెమ్యునరేషన్ విషయంలో తేడాలు రావొచ్చు, లేదంటే హీరో మనసు మార్చుకోవచ్చు. ప్రస్తుతం మహేష్ బాబు, వంశీ పైడిపల్లి సినిమా విషయంలో మాత్రం స్క్రిప్ట్ కీలక పాత్ర పోషించిందని గత రెండు రోజులుగా ఇండస్ట్రీలో వినిపిస్తోన్న టాక్.

వంశీ పైడిపల్లి సిద్ధం చేసిన స్క్రిప్ట్ మహేష్ బాబుకు నచ్చలేదని.. దీంతో మరో స్క్రిప్ట్ సిద్ధం చేయడానికి వంశీ పూనుకున్నారని వార్తలు వచ్చాయి. అంతేకాదు, ప్రస్తుతానికి మహేష్.. వంశీ ప్రాజెక్ట్‌ను రద్దు చేసుకుని వేరే దర్శకుడితో సినిమా చేయబోతున్నారని కూడా అన్నారు. అయితే, ఈ వార్తలు వంశీ పైడిపల్లిని బాధించాయట. నిజానికి మహేష్ బాబు స్క్రిప్ట్ నచ్చలేదని చెప్పినా వంశీ ఏమీ బాధపడలేదట. మరో స్క్రిప్ట్ సిద్ధం చేస్తాను.. ఈలోపల వేరే కథలు వినండి అని ఆయనే స్వయంగా సలహా ఇచ్చారట. కానీ, మీడియాలో వచ్చిన కథనాలు చూసి వంశీ బాధపడుతున్నారని సమాచారం.

Also Read:

ఎందుకంటే మహేష్ బాబు, వంశీ పైడిపల్లి మధ్య మంచి స్నేహం ఉంది. ఇరు కుటుంబాలు చాలా సన్నిహితంగా ఉంటాయి. ‘మహర్షి’ సినిమా సమయంలో వారి సాన్నిహిత్యం ఎలా ఉంటుందో చూశాం. మహేష్ బాబు, వంశీ పైడిపల్లి కుమార్తెలు సితార, ఆద్య కూడా చాలా క్లోజ్ ఫ్రెండ్స్. ఇటీవల ‘సరిలేరు నీకెవ్వరు’ సినిమా బ్లాక్ బస్టర్ హిట్ అయినప్పుడు కూడా వంశీ ఫ్యామిలీతో కలిసి మహేష్ కుటుంబం సెలబ్రేట్ చేసుకుంది. వీరంతా కలిసి తిరుపతి కూడా వెళ్లొచ్చారు. మరి ఇంతలా మహేష్ బాబుకు కనెక్ట్ అయిపోయిన వంశీ.. ఇప్పుడు ఈ ప్రాజెక్ట్ క్యాన్సిల్ కావడం, దీనిపై మీడియాలో రకరకాల వార్తలు రావడంతో బాగా కలతచెందుతున్నారట.

మరోవైపు, ఈ ప్రాజెక్ట్ క్యాన్సిల్ అయ్యిందనే వార్త వెంటనే మీడియాలో వచ్చేయడం వెనుక మహేష్ టీమ్ హస్తం ఉందని కూడా వంశీ భావిస్తున్నారట. ఇది తనకు జరిగిన అవమానమని ఆయన బాధపడుతున్నట్లు సన్నిహిత వర్గాల ద్వారా తెలిసింది. ‘మహర్షి’ సినిమా సమయంలోనే వంశీపై చాలా విమర్శలు వచ్చాయి. సినిమాను మరింత ఎంటర్‌టైనింగ్ తీయాల్సిందని అన్నారు. అలాంటిది, ఇప్పుడు వంశీ స్క్రిప్ట్ మహేష్‌కు నచ్చలేదంటే ఆయన ఎలాంటి స్క్రిప్ట్‌ను తీసుకెళ్లారో అనే విమర్శలు వస్తు్న్నాయి. మహేష్ బాబు అవకాశం ఇచ్చినప్పుడు సరైన స్క్రిప్ట్ తయారుచేసి తీసుకెళ్లాలి కదా అనేవారు కూడా ఉన్నారు.