భారత స్పిన్నర్‌కి మూడోసారి హ్యాట్రిక్ మిస్..!

Share Icons:
భారత మహిళల జట్టు స్పిన్నర్ మరోసారి హ్యాట్రిక్‌ని చేజార్చుకుంది. ఐసీసీ టీ20 ప్రపంచకప్‌లో భాగంగా ఈరోజు ఆస్ట్రేలియాతో జరిగిన మ్యాచ్‌లో వరుసగా రెండు వికెట్లు పడగొట్టిన పూనమ్.. వికెట్ కీపర్ తప్పిదంతో హ్యాట్రిక్‌ని చేజార్చుకుంది. ఈ మ్యాచ్‌లో 17 పరుగుల తేడాతో గెలుపొందిన భారత్ జట్టు.. టోర్నీని ఘనంగా ఆరంభించింది.

Read More:

మ్యాచ్‌లో ఇన్నింగ్స్ 12వ ఓవర్ వేసిన పూనమ్ యాదవ్.. మూడో బంతికి రచెల్ (6), నాలుగో బంతికి పెర్రీ(0)ని ఔట్ చేసింది. దీంతో.. హ్యాట్రిక్ కోసం భారత కెప్టెన్ హర్మన్‌ప్రీత్ కౌర్ ప్రత్యేకంగా ఫీల్డింగ్‌ని కూడా సెట్ చేసింది. కానీ.. ఐదో బంతికి కీపర్ తనియా భాటియా సులువుగా అందుకోవాల్సిన క్యాచ్‌ని తత్తరపాటులో చేజార్చింది. దీంతో.. మైదానంలోనే పూనమ్ యాదవ్ నిరాశతో గట్టిగా అరవడం కనిపించింది. గాయం నుంచి ఇటీవల కోలుకుని పూనమ్ మళ్లీ టీమ్‌లోకి రీఎంట్రీ ఇచ్చిన విషయం తెలిసిందే.

‘గాయం సమయంలో నా ఫిజియో, టీమ్‌మేట్స్ చాలా మద్దతుగా నిలిచారు. గతంలో నేను ఇక్కడ (ఆస్ట్రేలియా) మెరుగ్గా బౌలింగ్ చేశాను. కాబట్టి.. అదే జోరుని టోర్నీలో కొనసాగించాలని ఆశిస్తున్నా. ఇక హ్యాట్రిక్ గురించి అంటారా..? కెరీర్‌లో ఇది మూడోసారి అనుకుంటా హ్యాట్రిక్ చేజారడం’ అని పూనమ్ వెల్లడించింది.

మ్యాచ్‌లో 4 ఓవర్లు బౌలింగ్ చేసిన పూనమ్ 19 పరుగులిచ్చి నాలుగు వికెట్లు పడగొట్టింది. దీంతో.. భారత్‌ని గెలిపించే ప్రదర్శన చేసిన పూనమ్‌కి ప్లేయర్ ఆఫ్ ద మ్యాచ్ అవార్డు లభించింది.