భారత్ షూటర్ కారుని ఎత్తుకెళ్లిన దొంగలు

Share Icons:
భారత సీనియర్ షూటర్ కారుని దొంగలు ఎత్తుకెళ్లిపోయారు. ఢిల్లీలోని తన బంధువుల వివాహ వేడుకకి హాజరైన దీపక్ కుమార్.. తన హోండా WR-V కారుని వీఐపీ పార్క్‌ వెలుపల పార్క్ చేశానని.. అయితే తిరిగొచ్చేసరికి కారు అక్కడ లేదని ఆవేదన వ్యక్తం చేశాడు. 2018లోనూ దీపక్ కారులో ఉంచిన ఖరీదైన వస్తువుల్ని దొంగతనం చేశారు.

2018 ఆసియా గేమ్స్‌లో రజత పతకం గెలిచిన దీపక్ కుమార్.. ఈ ఏడాది జరగనున్న టోక్యో ఒలింపిక్స్‌లో 10మీ ఎయిర్ రైఫిల్ ఈవెంట్‌లో పోటీపడనున్నాడు. అందుకే తన దృష్టి మొత్తం ఇప్పుడు ఒలింపిక్స్‌పైనే ఉందన్న దీపక్.. కారు దొంగతనం గురించి ఎక్కువగా ఆలోచించడం లేదని చెప్పుకొచ్చాడు. అయితే.. కారు కనిపించకపోయిన వెంటనే పోలీసులకి ఫిర్యాదు చేసినా.. వారు సరిగా స్పందించలేదని ఈ షూటర్ ఆరోపించాడు.

‘ప్రపంచకప్‌ కోసం ఢిల్లీలో మార్చి 15 నుంచి ప్రాక్టీస్ మొదలెట్టబోతున్నాను. టోర్నీలో అత్యుత్తమ ప్రదర్శన కనబర్చేందుకు ప్రయత్నిస్తా. అయితే.. ఇలాంటి విషయాలు (కారు దొంగతనం) నా ఏకాగ్రతని ఏమాత్రం దెబ్బతీయలేవు. కానీ. నాకే ఎందుకు ఇలా జరుగుతుందో..? అర్థం కావడం లేదు’ అని దీపక్ వెల్లడించాడు.