బ్యాట్ రివర్స్.. పాక్ క్రికెటర్ రనౌట్ మిస్

Share Icons:
క్రికెట్ ప్రపంచానికి పాకిస్థాన్ ఆటగాళ్లు కొత్త తరహా రనౌట్లని పరిచయం చేస్తున్నారు. ఒకే ఎండ్‌వైపు ఇద్దరు బ్యాట్స్‌మెన్‌లు పరుగెత్తడం, బంతి వికెట్లని తాకే సమయంలో గాల్లోకి జంప్ చేయడం, తికమకతో పిచ్ మధ్యలో ఆగిపోయి రనౌటవడం పాకిస్థాన్ క్రికెటర్లకి మామూలే. తాజాగా ఆ దేశ యువ క్రికెటర్ కొత్త తరహాలో రనౌటవబోయాడు. కానీ.. కొద్దిలో తప్పించుకున్నాడు. పాకిస్థాన్ మాజీ కెప్టెన్ మోయిన్ ఖాన్ కొడుకే ఈ అజామ్ ఖాన్. అతని పైరవీలతోనే అజామ్‌కి గ్లాడియేటర్స్ టీమ్‌లో చోటు దక్కిందనే విమర్శలూ వినిపిస్తున్నాయి.

పాక్‌లో తాజాగా జరుగుతున్న పాకిస్థాన్ సూపర్ లీగ్ (పీఎస్‌ఎల్)లో గ్లాడియేటర్స్ తరఫున మ్యాచ్‌లు ఆడుతున్న అజామ్ నిలకడగా రాణిస్తున్నాడు. తాజాగా కరాచీ కింగ్స్‌తో జరిగిన మ్యాచ్‌లో అజామ్ ఖాన్ (46: 30 బంతుల్లో 4×4, 2×6) మెరుపులు మెరిపించడంతో 157 పరుగుల లక్ష్యాన్ని గ్లాడియేటర్స్ టీమ్ మరో 6 బంతులు మిగిలి ఉండగానే 157/5తో ఛేదించేసింది. అయితే.. జట్టు స్కోరు 140 వద్ద అజామ్ బ్యాట్‌ని పట్టుకోవడంలో తత్తరపాటుకి గురై కొద్దిలో రనౌటవబోయాడు.

వాస్తవానికి బంతి వికెట్లకి సమీపించేలోపే అజామ్ ఖాన్ క్రీజు దగ్గరికి చేరుకున్నాడు. కానీ.. బ్యాట్‌ని ఎడమ చేతి నుంచి కుడిచేతికి మార్చుకునే సమయంలో తత్తరపాటుకి గురయ్యాడు. దీంతో.. బ్యాట్ పూర్తిగా రివర్స్ అయిపోగా.. అప్పటికే బంతిని అందుకున్న ఫీల్డర్ వికెట్లపైకి దాన్ని విసిరాడు. దీంతో.. తప్పనిసరి పరిస్థితుల్లో క్రీజులో బ్యాట్ హ్యాండిల్‌ని ఉంచాల్సి వచ్చింది. రనౌట్ నుంచి తప్పించుకునేందుకు కొత్త తరహా పద్ధతిని పాక్ క్రికెటర్లు కనిపెట్టారంటూ అభిమానులు సెటైర్లు పేలుస్తున్నారు.