పృథ్వీ షా హాఫ్ సెంచరీ.. చెన్నై టార్గెట్ 176

Share Icons:
ఐపీఎల్ 2020 సీజన్‌లో వరుసగా రెండో మ్యాచ్‌లోనూ ఢిల్లీ క్యాపిటల్స్ బ్యాటింగ్‌లో మెరుగైన ప్రదర్శన కనబర్చింది. దుబాయ్ వేదికగా చెన్నై సూపర్ కింగ్స్‌తో శుక్రవారం రాత్రి జరుగుతున్న మ్యాచ్‌లో ఓపెనర్ పృథ్వీ షా (64: 43 బంతుల్లో 9×4, 1×6) హాఫ్ సెంచరీ బాదడంతో టాస్ ఓడి తొలుత బ్యాటింగ్ చేసిన ఢిల్లీ క్యాపిటల్స్ 3 వికెట్ల నష్టానికి 175 పరుగులు చేసింది. చెన్నై బౌలర్లలో పీయూస్ చావ్లా రెండు వికెట్లు పడగొట్టగా.. శామ్ కరన్‌కి ఒక వికెట్ దక్కింది.

మ్యాచ్‌‌లో టాస్ గెలిచిన చెన్నై కెప్టెన్ ధోనీ ఫీల్డింగ్ ఎంచుకున్నాడు. దాంతో.. ఢిల్లీ ఇన్నింగ్స్ ప్రారంభించిన పృథ్వీ షా, శిఖర్ ధావన్ (35: 27 బంతుల్లో 3×4, 1×6) జోడీ తొలి వికెట్‌కి 94 పరుగుల భాగస్వామ్యం నెలకొల్పింది. ఇన్నింగ్స్ 11వ ఓవర్‌లో ధావన్ ఔటవగా.. 13వ ఓవర్‌‌లో పృథ్వీ షా పేలవరీతిలో స్టంపౌటయ్యాడు. అనంతరం వచ్చిన రిషబ్ పంత్ (37 నాటౌట్: 25 బంతుల్లో 6×4), శ్రేయాస్ అయ్యర్ (26: 22 బంతుల్లో 1×4) వేగంగా ఆడలేకపోయారు.

కానీ.. ఆఖరి ఓవర్‌లో క్రీజులోకి వచ్చిన మార్కస్ స్టాయినిస్ (5: 3 బంతుల్లో 1×4) దూకుడుగా ఆడటంతో ఢిల్లీ 175 పరుగులు చేయగలిగింది. చివరి ఓవర్ వేసిన హేజిల్‌వుడ్‌ బౌలింగ్‌లో రెండో బంతిని పంత్‌ ఫోర్‌‌గా తరలించగా.. నాలుగు, ఐదో బంతిని ధోనీ పక్క నుంచి స్టాయినిస్ బౌండరీకి పంపాడు. ఇందులో ఒకటి లెగ్‌ బైస్.