పసిబిడ్డకు గుక్కెడు పాల కోసం పాట్లు.. ‘మహా’ సీఎంకు పవన్ రిక్వెస్ట్

Share Icons:
లాక్‌డౌన్ కారణంగా మహారాష్ట్రలో ఇబ్బందులు పడుతున్న తమ వలస కూలీలను ఆదుకోవాలని ఆ రాష్ట్ర సీఎం ఉద్దవ్ థాక్రేను జనసేన అధినేత పవన్ కళ్యాణ్ కోరారు. కర్నూలు జిల్లాకు చెందిన 500పైగా కుటుంబాలు మహారాష్ట్రకు వలస వెళ్లాయని.. లాక్‌డౌన్ కారణంగా వీరింతా ముంబై శివార్లలోని గోమహళ్లి వద్ద చిక్కకుపోయారని తెలిపారు. సరైన ఆహారం, వసతితోపాటు కనీస సౌకర్యాలు లేకపోవడంతో వారంతా ఇబ్బందులు పడుతున్నారని తెలిపారు.

వీరు పని చేసే కంపెనీ లాక్‌డౌన్ సమయంలో వేతనాలు చెల్లించడానికి అంగీకరించలేదని మహారాష్ట్ర సీఎంకు జనసేనాని తెలిపారు. మూడు నెలల పసికందులను చంకలో వేసుకొని.. వారి ఆకలి తీర్చడం కోసం.. తల్లులు ఓ గ్లాసు పాలకు తిప్పలు పడుతున్నారని పవన్ తెలిపారు. సామాజిక దూరం పాటించే విషయమై అవగాహన లేకపోవడంతో వీరు గుంపులుగా ఉంటూ సాయం కోసం ఎదురు చూస్తున్నారన్నారు.

సాధ్యమైనంత త్వరగా వీరిని ఆదుకోవాలని ఉద్దవ్ థాక్రేను పవన్ కళ్యాణ్ కోరారు. పరాయి రాష్ట్రంలో ఆకలితో అలమటిస్తోన్న మన ప్రజలకు సాయం చేయడం కోసం మహారాష్ట్ర ప్రభుత్వంతో ఏపీ సర్కారు చర్చలు జరపాలని జనసేనాని సూచించారు. ఆలూరు, ఆదోనీ, మంత్రాలయం, ఎమ్మిగనూరు ప్రాంతాలకు చెందిన వీరికి వెంటనే సాయం అందేలా చూడటంక కోసం కర్నూలు జిల్లా కలెక్టర్ చొరవ చూపాలన్నారు. ముంబై శివార్లలో తెలుగు కుటుంబాలు చిక్కుకుపోయిన జీపీఎస్ లొకేషన్‌ను కూడా పవన్ షేర్ చేశారు.

లాక్‌డౌన్ కారణంగా చెన్నై హర్బర్‌లో చిక్కుకుపోయిన శ్రీకాకుళం మత్స్యకారులకు సాయం అందించాలని తమిళనాడు సీఎం పళనిస్వామిని పవన్ కళ్యాణ్ కోరగా.. ఆయన వెంటనే స్పందించి సాయం అందించిన సంగతి తెలిసిందే.